Ижкарын усьтӥськиз выльдӥськем шор площадь

Ангелина Снигирева
By Ангелина Снигирева 18 сентября, 2019 17:06
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

19-тӥ сентябре — Пыӵал тӥрлык поттӥсьлэн нуналаз — шоркарын улӥсьёс но куноос ас синмынызы адӟыны, дунъяны быгатӥзы выльдӥськем, шоголь, туала луэм карлудэз.

Карлудлы синмаськизы ни городын улӥсьёс

Быдэс гужем Ижысь Шор площадьын техника гуретӥз. Нуналлы быдэ лэсьтӥськон ужъёсты син азязы возизы элькун кивалтӥсьёс. Выльдэмын площадьлэн Пушкинской урамысен ЦУМ дорозь люкетэз. Карлуд учкымон но данъяськымон пӧрмем. Отчы огвакытэ 100 сюрс мурт тэроз.
Выльдэм карлуд, калыклэсь мылкыдъёссэ лыдэ басьтыса, лэсьтэмын. Отчы 112 писпу мерттэмын, 171 светильник пуктэмын, котькытын — ӟусъёс, коляскаен ветлӥсьёс сярысь сюлмаськыса пандусъёс лэсьтэмын, писпуосын аллея сайкытгес луиз, отысь сюресъёс табере брусчаткаен шобыртэмын. Площадьысь одӥгез данъяськымонэз но учкымонэз — фонтан. Со аспӧртэмлыко: крезьгур чузъяськем улсын ву тросэтӥ интыысь 20 пӧртэм сямен пызйыса потэ — ву шапыкъёс, ог-огенызы шудыса, экто кадь.

— Площадь — со быдэс городлэн тусыз, со огшоры кулэ луыны ӧвӧл, — вераз карлудлэсь дизайнзэ малпасьёс пӧлысь одӥгез Любовь Варламова. — Соин ик площадь тӧдьы изъёсын шобыртэмын, та буёл праздникез возьматэ. Тыршимы сое лэсьтыны озьы, татчы поръяны, шулдыръяськыны лыктэм котькуд адямилэн умой мылкыдыз мед кылёз шуыса. Калыкмы шундылэсь ӝужамзэ, пуксемзэ пумитаны, туспуктыны яратэ. Тае лыдэ басьтыса, карлудын инкуазьлэсь ӵыдонтэм луэмзэ адӟон понна трос интыос чакламын.
Вераны кулэ, карлуд выльдӥськиз «Жильё и городская среда» нацпроект улсын. Та ужрад чотын туэ 136 азбаръёсты но 93 трос калык люкаськон интыосты тупатыны чакламын. Уноез ужъёс быдэстэмын ни. Шор карлудэз тупатон 229 миллион манет тыр усиз, фонтанэз лэсьтонлы ог 98 миллион манет мында быдтэмын. Карлуд калыкез чебереныз кема мед шумпоттоз шуыса, сое вань улӥсьёсын ӵош утёно, шаерамы улӥсьёслы вазиськизы кивалтӥсьёс.
Площадьлэн уллапалзэ — ЦУМ дорысен Эшъяськон монумент дорозь — 2020-тӥ — 2021-тӥ аръёсы тупатыны чакламын.

Ангелина Снигирёва

Туспуктӥз М. Егоров

Ангелина Снигирева
By Ангелина Снигирева 18 сентября, 2019 17:06