ДондыДор нылъёс палёмыто

Ангелина Снигирева
By Ангелина Снигирева Сентябрь 11, 2019 12:06

Глазов ёросысь ДондыДор парк «Тыло толэзь» фестиваль шаерысьтымы чеберайёсты люкалляз. Туэ нылмуртъёс калыкез абдратыны быгатэмзэс возьматӥзы, ужрад яркыт шоу выллем ортчиз.

Глазов ёросысь Пониноысь Е. Урсегова
Туспуктэм: Ирина Кооль

«Тыло толэзь» этно-арт фестивале вуизы Глазов, Балезино, Эгра, Дэбес ёросъёсысь, Пермь улосысь Кудымкарысь 12 чеберайёс.

— Фестивалез ортчытэмлэсь азьло нылашъёсты юромо люкам, кенешим, мар соослэсь витиськом шуыса, — вераз фестивалез одӥгез радъясь Глазов ёросысь культурая но туризмъя центрысь методист Ольга Боталова. — Шаерысьтымы дизайнеръёс, косметологъёс но мукет специалистъёс. Соосты шонер буяськыны, йырсизэс чебер пуныны, асьсэлы тупась дӥськут быръйыны дышетӥзы. Но вань туала амалъёс удмуртъёслэн вашкала культуразы, сям-йылолъёссы вылэ пыкиськыса, кутэмын вал. Татысен ик нылашъёс понна чебер фотосессия радъяськиз. Глазов ёросысь устооссэ фотографъёсты юромо ӧтчамы.
Дышетон ужрад юнме ӧз ортчы. Нылъёс зол дасяськиллям: шоголь дӥсьёс, яркыт номеръёс возьматон понна коньдонзэс но, дырзэс но ӧвӧл жаляллям. Паймытӥз Глазовысь Наталья Ассылова. Со Светлана Лободалэсь «Супер звезда» кырӟанзэ удмурт кылэ берыктэм. Номерзэ юрттыны возьматӥзы эшъёсыз — брейк-данс эктыса но пиштӥсь тылъёсын шудыса. Фестиваль фин-угор калыкъёслы сӥземын вал ке но, мукет выжы калыкъёс но вожвылъяськизы. Глазов ёросысь Кожиль гуртысь армян выжыысь нылаш Нарина Габриэлян ӝуась тылын шоу возьматӥз. Ваньмыз абдразы дӥсезлы, конкурслы шуыса сое юромо Армениысь ӵыжы-выжыосыз келяллям, пе. Калык абдраз но шумпотӥз Глазовысь Юлия Бикмулина понна но. Нылашлы пияшез сцена вылысен бызьыны ӵектӥз.
Нылъёс ассэ быгатонлыксэс возьматэм сяна, купальникъёсын дефиле ортчизы, квадроциклъёсын ворттылӥзы.

Кудымкарысь Е. Ракишева квадроциклэн зол ворттылыны быгатӥз
Туспуктэм: Ирина Кооль

— Ми возьматыны тыршимы: удмурт нылъёсмы пужыятскыны, чильпаськыны быгатэм сяна, тыл, ву пыртӥ потыны, корт валэн кыткыны быгато. Соин ик соосты руль сьӧры пуктӥм. Но огшоры машина сьӧры ӧм — квадроцикл сётӥм. Уноез соин нырысьсэ ворттылӥзы. Зэм, палэнэ синйылтытэк ӧм кельтэ нылашъёслэсь мукет быгатонлыкъёссэс но: кин ке дӥсь вуриз, кин ке удмурт калыклэсь сям-йылолъёссэ возьматӥсь пусъёсын татуировка суредаз, кылбур, монолог вольыт лыдӟемзэс возьматӥз, — азинтыса вераз О. Боталова.
Озьы, вань ӵошатсконъёс пыр потыса, устоез луиз Кудымкарысь Екатерина Ракишева.

Ангелина Снигирёва

Ангелина Снигирева
By Ангелина Снигирева Сентябрь 11, 2019 12:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<