Гуртъёсты улӟыто фермеръёс

Ангелина Снигирева
By Ангелина Снигирева Сентябрь 19, 2019 09:24

Эгра ёросысь Мувыр гуртын вуоно арын выльысь улӟись гуртъёслы сӥзем фестиваль ортчоз. Кызьы со радъяськоз? Та пумысен кенешизы элькун кивалтӥсьёс но Эгра палась фермеръёс.

А. Бречалов тодматске Мувыр гуртэн

Мувыр гурт ачиз паймытъямысь уг дугды. Ас вакытаз угось сое, тракторен донгаса, музъем вылысь ӵушизы ни вал. 2009-тӥ арын Россиысь Правительстволэн постановлениезъя гинэ выльысь берыктыны, нимзэ карта вылэ пыртыны луиз. Ваньмыз со Мувырез улӟытӥсь удмурт воргорон Александр Корепанов сюлмаськемен. Со гольык бусы шоры корка пуктӥз, ферма ӝутӥз, калыклы уж сётӥз. Туннэ татын 25 улӥсез ни, пӧлазы нылпиос но вань. Гидын 260 сюро таза пудозы, та пӧлысь кысконо скалъёссы — 124. Алигес Александр Корепанов гуртазы переработка усьтыны 10 миллион манет грант утӥз.

— 1 литр йӧлдэ заводъёсы 23 манетэн келялод яке, солэсь ачид чылкыт йогурт, йӧлвыл, кузятэм лэсьтод но 35-40 манетэн вузалод, — шуэ фермер. — Вуоно арын переработка усьтыса, сиён-юонмес Москвае келян вылысь ужаны малпаськомы. Завод лэсьтӥмы ке, гуртмы эшшо кужмогес луоз.

Александр Геннадьевичлэн Мувырын агротуризм но радъямез потэ. Адямиос, пе, мед адӟозы кытысь йӧл потэ, кызьы нянь будэ, шуэ. 2 лэсьтэм ӵыпетаз форель лэзиз ни. Татчы шутэтскыны ветлӥсьёс лачак. Интыосыз но туж чебересь ук. Калыкен пумиськыны, гуртлэн улон-вылонэныз матэгес тодматскыны вуылӥз Удмуртилэн Тӧроез Александр Бречалов но. Ёросысьтызы эшшо 3 фермерен соос объектъёстӥ котырскизы, ульчаостӥ ортчизы. Александр Корепановлэн мылкыдъёсызлы синмаськизы.

— Котьма лэсьтыны луэ: сюресэз асфальтэн шобыртыны, кыӵе ке соцобъект пуктыны, уксёен юрттыны. Но гуртын сюлмо адямиос ӧз луэ ке, ваньмыз пашмыны быгатоз, — шуиз Александр Бречалов. — Нош Мувыр быремысь выльысь вордскиз. Со понна Александр Геннадьевичлы тау кароно. Вуоно арын фестивалез ортчытон понна мон дась юрттӥськыны. Калыклэсь азинскыны мылкыдзэ санэ басьтоно.

Нялтас вераса, Александр Корепанов мукет фермеръёслы но адӟем карымон луэ. Ӵапак со шоры учкыса, районысьтызы 3 гурт али выльысь сайка. Озьы Саля гуртэз ӝутыны ӧдъяз Константин Петров, Мужберын уж кылдытэ Андрей Пчеловодов, Полянцы гуртэз зуркатэ Альберт Хаертдинов. Таос ваньзы пудо вордон борды басьтӥськизы. Ужзэс азинтыны Гурт удысъя но сиён-юонъя министерство соослы быдэн 3 миллион манетэн грант висъяз. Сертификатъёсты фермеръёслы ӵапак Мувырын люкылӥз Удмуртилэн Тӧроез. Та уксёен производствозэс юнматыны, эшшо тросгес пудо басьтыны, техниказэс йылэтыны быгатозы. Уж кылдӥз ке, гуртъёсазы берытскисьёс сюрозы шуыса, оскон юнма. Кылсярысь, Саля гуртын туннэ 2 корка гинэ. Огаз арлыдо пиосмурт улэ, мукетсэ ӝутэ Петровъёслэн семьязы. 2 ар талэсь азьло соос татысь 9 гектар музъемез басьтӥзы. Отӥяз эшшо 15-сэ арендае кутӥзы. Татчы пуктыны кутскизы гидъёс. Табере фермаын 15 ош, скал, 60 така, ӟазегъёс. Гуртэ асьсэос ик тыл но кыскизы. Сюрес артэ.

Бусыосты эскерон

— Герефорд выжыысь скал басьтэме потэ, — шуэ Константин Петров. — Нокыӵе кезьыт куазьлэсь уг кышка, шуо. Утялтонэз но капчи. Кунянъёсыз мумызэс 6 толэзь ӵоже ноныса будо, озьыен, скалэз кыскыса курадӟонэз ӧвӧл, кунянъёс но ӝог чеберско. Сӥлез кытчы келяны но интымы но вань: варманай пельмен кутонэн выре.

Константин Константиновичлэн 4 ар талэсь азьвыл Саля гурт сярысь кылылэмез ик ӧй вал. Со ачиз угось Краснодар улосысь. Эгра ёросысь нылашлы синмаськыса, асьме палъёсы выжиз. Кышноез ик музъем уж борды кыскиз: ачиз бакча сиён будэтонэн мылысь-кылысь выре угось. 2 нылпиоссы котырысьтызы уг кошкыло, музъем ужез али ик валаса будо.

— Курег возён кадь капчи ӧвӧл пудо вордон — курег гидъёсы Краснодарын вал. Но отын гурт удысэз азинтыны секытгес — музъем туж дуно, кун ласянь нокыӵе юрттэт уг сётӥськы. Удмуртиын со ласянь му но дунтэм, субсидия но висъяське. Эшшо ке тани грант утӥмы. Соин но фермаос кредитъёстэк пуктыны быгатӥмы. Оскисько: Саля но выльысь калыкен тырмоз ай. Мувырын фестивалез ортчытыны, ми но, фермеръёс, юрттӥськомы. Отӥяз асьме дорын но сыӵе праздник лэсьтыны луоз, — шуэ Константин Петров.

Гурт удысъя но сиён-юонъя министр Ольга Абрамова пусъемъя, агростартап программая грантлы конкурсэ шаерысьтымы 81 мурт пыриськиз. 43-езлы проектсэс быдэстыны но азинтыны юрттэт висъяськиз. Осконъёс вань, октябрь толэзе эшшо кӧня ке проектъёслы грант висъяны кылдоз шуыса. Соку мукет гуртъёслы но выль шокчон кузьманы быгатомы, шуэ Ольга Викторовна.

Елена Сараматова

Туспуктэмъёс басьтэмын udmurt.ru сайтысь

Ангелина Снигирева
By Ангелина Снигирева Сентябрь 19, 2019 09:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<