Губиязы но, шулдыръяськизы но

Ангелина Снигирева
By Ангелина Снигирева 18 сентября, 2019 14:23
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Яр каргуртын 3-тӥ ползэ губилы сӥзем шулдыръяськон ортчиз. Улоскуспо ужрадэ 3 сюрслэсь трос калык пыриськиз — шаерысьтымы 10 ёросысь, Пермь но Киров улосъёсысь куноос вуылӥзы.

Фестивалез шулдыртӥзы воргоронъёс

Тужгес кыдёкысь куно луиз Краснодар улосысь семья. Та вакытэ, пе, соос Грак ёросын улӥсь тодмоосыз дорын куноя вылэм. Ужрад сярысь иворез кылыса, Яр ёросын губияны мылкыд карем. Ёросысь культурая но туризмъя центрен кивалтӥсь Николай Трефилов ивортэмъя, губилы сӥзем фестивалез дунъяны вуылӥзы Тимченко фондысь кураторъёс но. Угось ӵапак та фонд проектлы коньдон висъяз.
Ужрадэз яръёс синмаськымон ортчытӥзы.

— Фестивальлы дасяськонмес вазен ик мытӥмы, сое 3 люкетлэсь радъямы, — вераз Николай Трефилов. — 1-тӥ Май праздниклы ёросын улӥсьёс пӧлын ялэмын вал губилэсь сиён пӧранъя рецептъёслы конкурс. Вожвылъяськонэ нимаз адямиос но вань муниципал кылдытэтъёс пыриськизы. Соку сиёнъёс лэсьтэмын вал толлы сылалтыса, куасьтыса, кынтыса, дасям губиослэсь. Нош август толэзе ёросын улӥсьёс пусйизы Яр каргуртлэсь нуналзэ. Таяз учыре выль бичам губилэсь сиёнъёс дасязы ни. Тужгес ческыт но умой пӧрамъёсты ёрос библиотекаын ужасьёс туспуктӥзы но рецептъёссэс гожтыса кельтӥзы. Озьы фестивальлы шуыса, уйпал удмуртъёслэн пӧраськон амалъёссылы сӥзем 15 пӧртэм открыткаос дасямын вал.
Губилы сӥзем фестиваль котьку сямен ик каргурт вӧзысь «Ярская» шутэтскон базаын ортчиз. Тросгес калыкез кыскон вылысь базалэсь азбарзэ арысь аре шулдыргес но чебергес каро. Ёросъёсысь вуэм кибашлыос киужъёсынызы адӟытон радъязы, мылкыд карисьёсты векчи ньӧрлэсь турлы арбериос лэсьтыны дышетӥзы. Люкаськем калыкез паймытӥзы Яр ёросысь ветеранъёслэн огазеяськонъёссы но — губилэсь пӧртэм пумо сиён пӧраллям. Со сяна, фестивальын «Губиё Яре базаре», «Шырыт сямо губи азбар» но трос мукет площадкаос ужазы. Нимысьтыз площадка сӥземын вал нылпиослы. «Пиналъёс — пичи губиос» площадкае лэсьтӥзы «Маша и медведь» выжыкылысь геройёслэсь корказэс. Отын пӧртэм шудонъёс но мастер-классъёс радъяськизы. Тэшкылиослы тужгес тунсыко потӥз губиез микроскоп улын эскерон.

Нылпиос губиослы пӧрмытскыса эсктӥзы

Та нуналэ нокинлы мӧзмыт ӧй вал. Мылкыд карисьёс — 28 мурт — «Нюлэскы губияны» конкурсэ пыриськизы. Со сяна, кужымзэс эскеризы командаос но, котькудаз луыны кулэ вал 3 мурт. Ужрадэз ортчытӥсьёс губиян инты азьпал ик бырйизы. Бичаськыны 2 час сётӥськиз. Нимаз ӵошатскисьёс пӧлын котькинлэсь трос, 1 килограмм 300 грамм, губи люказ Яр ёросысь Валентина Семакина, командаос пӧлын — Юкаменскысь «Боровички». Тужгес егитэз губиясь вал 4 аресъем Никита Кутявин, котькинлэсь зӧк, 350 граммъем губи шедьтӥз Балезино ёросысь Екатерина Казакова. Фестивальлы туэ воргорон шӧм пыӵатыны чаклам, — веранзэ азинтӥз Николай Михайлович. — Малпанмес быдэстыны быгатӥмы. Ужрадэз воргоронъёс нуэм сяна, соос волонтёръёс но вал, мастер-классъёс но ортчытӥзы. Ярысь воргоронъёслэн «Зарни люкамъёс» но пинал пиослэн «Веснушки» ансамбльёссы ужрадэз усьтон дыръя флешмоб ортчытӥзы. Со сяна, воргоронъёс понна радъямын вал «Азвесь губи зор» но «Гибиё мадён» вожвылъяськонъёс.

Гуртоос губиен пӧрамъёсын утялтӥзы

Кырӟась коллективъёс пӧлын ваньзэс паймытӥзы Якшур-Бӧдья ёросысь «Воля» ансамбле ветлӥсьёс, крезьгуро инструментъёсын шудӥсьёс пӧлын аслыз синмаськытӥз Глаз ёросысь Раиль Байкузин, ӵошен кырӟасьёс пӧлын 1-тӥ инты басьтӥзы Ярысь «Дебют» коллектив. Тужгес тунсыко но серемес мадёс лыдӟиз Балезиноысь Николай Наговицын.
Сцена вылын кырӟам-верам сяна, та нуналэ воргоронъёс спортэн эшъяськемзэс возьматӥзы «Кужмо пиос» конкурсын. Таяз учыре котькинлэсь сэзь вал Ярысь Алексей Дементьев.
Ужрад йылпумъяськиз бадӟым шулдыръяськонэн. Фестивале пыриськисьёсты но вань куноосты дунтэк куноятӥзы губинчаен, яръёс озьы шуо губиен шудэз. Культура удысын ужасьёс гур котырын бергазы, табань, мильым, перепеч пыжизы.

Валентина Емельянова

Туспуктэмъёс: «Сельская правда» газет

Ангелина Снигирева
By Ангелина Снигирева 18 сентября, 2019 14:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<