Горд писэй, горд крезьгур, ачим но — горд

Ангелина Снигирева
By Ангелина Снигирева Сентябрь 16, 2019 17:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ижын 16-тӥ ползэ ортчиз Горд фестиваль. Шоркарлэн Индустриальной ёросаз мытэм ужрад табере паськыт вӧлскиз ни: сое быдэс арня ӵоже пусъё городлэн мукет площадкаосаз но. Озьы ке но тужгес яркыт шулдыръяськон луэ Космонавтъёслэн парказы.

Ижын Горд фестиваль улсын калык коляскаосты чеберъяз

Яркыт мылкыд

Сентябре ортчоно ужрадлы дасяськонэз ми, Индустриальной ёросын улӥсьёс, адӟимы ни гужем ик. Космонавтъёслэн парказы ошылӥзы баннеръёс, дасязы выль площадкаос. Августэ ик мыло-кыдо адямиос «2019-тӥ арын тужгес горд адями» луон понна заявкаоссэс келязы.

Фестиваль ортчон нуналэ но вазь ӵукна ик татын уж пӧзе ни: сцена вылын репетиция радъяське, гуръёс эстӥсько, ульчаын ӝӧкъёс пуктыло. Кыӵе усто: шундыё куазен удалтӥз, нуназе котыр воксё гужем кадь нясь-нясь кариськиз.

Пиналъёсы но фестиваль сярысь тодо — нылпи садазы вераллям, соин парке мыныны одно ик горд дӥсь куризы, празднике, пе, яркыт дӥсяськоно. Космонавтъёслэн парказы пыремлэсь азьло паймоно татчы вуэм транспортлы. Парковкае тэрытэк, машинаос Вотка шоссе кузя ог 2 иськем кузьда чурен сыло. Адямиос но семьяен-семьяен лыкто.

Паркын котькуд квадрат метр «ужа»: мастер-классъё, тунсыко инсталляциос, паймымон сульдэръёс, адямилэсь бадӟым ветлӥсь мунёос но мукет. Мумы-бубыос нылпиосынызы ӵош киуж лэсьтыны интыясько, туспуксё, сцена котыре карисько.

Коляскаослэн парадзы

Фестивалез котьку но усьтэ коляскаослэн парадзы. Котькуд ёросысь нылпи садъёсысь командаос но, нимаз семьяос но отчы пыриськыны мылкыд каро. Кин ке дышем сямъя татчы лыктэм ни, кин ке — нырысьсэ. Огез колясказэ нап-ӵуж сяська кадь карем, мукетыз самолётлы укшатэм, куинетӥез динозавр пӧрмытӥллям.

Пӧртэм шулдыръяськонъёс ортчизы

Октябрь ёросысь 112 номеро садысь «Шунды» коллектив коляскаосын ӵошатсконэ нырысьсэ потӥз. Воспитательёс Лия Фёдорова но Вероника Корепанова верамъя, колясказэс дасязы 2 нунал ӵоже. Озьы питранъёс вылын гур пӧрмытӥзы, татын ик перепечен тэркыез но вань, сушкаосын сузьет но ошемын. Воспитательёс но, нылпиос но удмурт дэремъёсын дӥсяськемын.

— Мукетъёсызлэн но коляскаоссылы туж паймоно, кытысь сыӵе малпанъёс йыразы лыктӥллям меда? — вера Вероника Корепанова.

Коляскаез чебермам сяна, конкурсэ пыриськисьёслы дасяно на вал асэнызы тодматӥсь номер. 3эм, 3 минутъем визиткае тэрыны секыт — тросэз кемагес кырӟазы, эктӥзы. Огез но коллектив та ужрадысь кузьымтэк ӧз кошкы — котькудзэ дунъязы нылпи вузъёсын магазинлэн сертификатъёсыныз. Нош 112 номеро садысь «гурез» «Тужгес йӧспӧртэм коляска» номинациын 1-тӥ интыен пусйизы.

Горд луон понна нюръяськон

Трос семьяос люкаськизы «Горд пудо-живот» вожвылъяськонэ. Татчы 30-лэсь трос мурт пунызэ, писейзэ, комаксэ вуттӥз. Кин ке гордань пунызэ но чеберманы вырем, аслыз но горд дӥсь пӧрмытэм. Кин ке ньыль пыдо эшеныз тодматыса, кылбур вера. Тужгес мыло-кыдоосыз пунызэс пӧртэм трюкъёслы дышетӥллям. Пӧсь кичабонъёсын учкисьёс дунъязы Марина Байгуловалэсь утӥсьсэ. Пунылы 2 арес гинэ. Со кылем арын но кузёеныз ӵош фестивале пыриськиз. Туэ выль трюкъёслы но командаослы дышем.

Валтӥсь сцена вылын «Горд крезьгур» конкурслы йылпумъянъёс лэсьтӥзы. Татын ӵошатскизы городысь кырӟась но эктӥсь коллективъёс. «Горд вернисажын» дунъязы тужгес тунсыко туспуктэмъёсты.

«Горд пудо-живот» вожвылъяськон ортчиз

Уката возьмам вожвылъяськон — туэ ар понна тужгес горд адямиез быръён. Таӵе нимез нуллон вылысь вожвылъяськиз 6 мурт — сомында куриськон келямын вал конкурсэ. Туспуктэмзэ ыстэм сяна, адямилы ачиз сярысь пичияк верано вал, эшшо пусъёно: малы со ассэ тужгес гордэн лыдъя шуыса. Та нимез басьтӥсь муртлы сёто диплом, Горд орден, «Зарни Ӟичы» кубок но валтӥсь кузьым. 7-тӥез пыриськись мурт — Прохор Закурдаев — ужрадэ лыктӥз, йырсизэ горд буяса. Дунъясьёс та пияшлы синмаськизы но сое тужгес горд адямиен лыдъязы. Но таӵе решенилы пумит луизы мукет ӵошатскисьёс — табере таяз арня ӵоже жюри выльысь люкаськоз но 6 мурт пӧлысь тужгес пиштӥсьсэ быръёз, пусйиз «Русский дом» центрлэн директорезлэн воштӥсез Ольга Маркина. Озьыен, Горд луон понна но нюръяськон пуроме вылэм.

Елена Скворцова

Туспуктэмъёс: Иж город администрацилэн пресс-службаез

Ангелина Снигирева
By Ангелина Снигирева Сентябрь 16, 2019 17:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<