Бадӟым школаын — 16 пинал

Ангелина Снигирева
By Ангелина Снигирева 12 сентября, 2019 10:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Глазов ёросысь Пӧжы (Золотари) гуртысь школа куке-соку республикаямы одӥгез кужмоез вал. Отын 100-лэсь трос пинал дышетскиз. Школа али но туала луэменыз, нылпиос понна вань луонлыкъёс кылдытэменыз висъяське. Зэм, дышетске 16 пинал гинэ…

Школа сяська пӧлы вые
Туспуктӥз: Максим Егоров

Зарни вакытъёс ортчизы?

Ирина Николаевна Пашкина — та школаын 25 ар ӵоже ужа ни. Нырысь со историяя урокъёс нуиз, собере завуч вал. Нылыз Глазовысь чеберлыко школае пыриз но, Ирина Николаевна сьӧраз городэ кошкиз. Озьы ке но, яратоно школаез сое бордысьтыз ӧз лэзьы. Табере со директор, нуналлы быдэ городысь гуртэ ужаны ветлэ.

— Азьвыл татын сяськаясь совхоз вал, — тодаз вае Ирина Николаевна, — Сюресъёс но ӟечесь вал. Нылпиосмы визьмось, туж мыло-кыдоесь будӥзы, пӧртэм олимпиадаосы пыриськылӥзы. Сыӵе яра вал ужаны!
Но улон пумен воштӥськыны кутскиз. Совхоз куашказ, гуртын уж быриз, егитъёс кошкыны кутскизы, пиналъёслэн лыдзы кулэсмиз. Озьы 2003-тӥ арын Золотари школаез основной каризы, нош 2011-тӥ арысен начальной кельтӥзы. Шор но бадӟым классъёсын дышетскисьёс табере 8 иськеме Понино школае ветло.
Нош Пӧжы гуртэ 2006-тӥ арысен дышетскыны лыктӥзы Киров улосысь Сёва каргуртысь нылпиос — нырысь араз. 19 кузя вал соос. Школа юртэ ик лэсьтэм интернатын улӥзы.
Али интернатын Сёваысь 5 пинал улэ, бадӟымъёсыз дышетскыны Пониное ветло, пичиосыз Пӧжыын ик тодон-валанзэс муромыто. Нош шутэтскон нуналъёсы Сёваязы берто.
Малы Киров улосысь нылпиос Удмуртиын дышетсконо кариськизы. Сёва гуртлы матысь Лытка гуртын но школа вань ук? Отын, пе, сюрессы туж урод, тулыс ву гылтэ. Сёва нылпиос удмурт гуртэ дышетскыны ветлэмен, бӧрысь та гуртэз воксё но Удмуртие пыртӥзы, сыӵе решение кутэмын вал Кун Кенешын.
Оптимизация ортчытэм бере Пӧжы школалэн юртаз ик садикез интыязы. Озьы али вӧл-вӧл юртлэн нырысетӥ этажаз — нылпи сад, школа, интернат, спортзал, столовой. Директорен ӵош лыдъяса, 6 дышетӥсь ужа, огъя ужасьёссы — 17. Нылпиос 2-аз кабинетын дышетско. Котькудаз быдэн кык классэн. Школалэн кыкетӥ этажаз интыяськем «Истоки» музей. Солэн кивалтӥсез Антонида Бёрдова озьы ик нылпиос понна пӧртэм занятиос ортчытъя.

Спонсорзы — бакчазы

Ирина Николаевна милемлы школаетӥ экскурсия ортчытӥз. Туала оборудование, интерактивной доска, сайкыт кабинетъёс — ваньмыз чылкыт, чебер, тупатъямын-буямын. Ремонэз, пе, асьсэос ужасьёс ик лэсьто. Со гинэ ӧвӧл, Пӧжы школа номырлы но уксё кураса уг ветлы, ваньзэ ас кужыменыз лэсьтэ.

Школалэн директорез
Туспуктӥз: М. Егоров

— Школамылэн бадӟым бакчаез вань, бакча-сиён асьмеос будэтӥськомы, — шуэ директор. — Огласянь, нылпиослы нокыӵе нитратъёстэк чылкыт сиён поттӥськом. Угось 100 процентлы тодӥськом, кызьы бакча сиён будэтэмын, эшшо санэпидемстанцие нуллыса эскериськом на. Мукет ласянь, со сиёнлы дун но пичи пуктӥськом, воксё дунтэк сюдыны ми ум быгатӥське. Со уксёен собере школамылы, интернатлы, садиклы я пылесос, я мисьтаськон машина, я компьютер басьтӥськом. Кызьы мон кивалтӥсьёслэсь ремонтлы, дышетонъя кыӵе ке тӥрлыклы уксё куром? Школады неперспективной шуозы гинэ. Соин ик ваньзэ асьме кужымен лэсьтыны тыршиськом. Озьы милям спонсормы — бакчамы, асьме ужасьёсмы. Юн секыт ке но бакча возьыны, тыршиськом. Сое утялтыны вань ужасьёсмы пото, отпуске кошкемъёс но.
Озьы ке но директор уг ваты: та школаысь кошкыны дас пол но, оло, вырӟылӥз ни, куддыръя бумага ужъёс воксё акылес луо, эскеронъёсын ялан ёрто. Мар возе на?

— Дышетӥсьёсы туала улонлэсь куронъёссэ туж ӟеч валало, ялан асьсэ бордын ужало, — пусъе Ирина Николаевна, — Тани школаын дышетскись ляб пиналъёс понна инклюзив амалэн тодон-валан сётонэз пыӵатоно шуизы. Кытысь мон сыӵе специалист шедьто? Но одӥгез дышетӥсе, Людмила Геннадьевна Баженова, диплом вае ни. Ас коньдонзэ тырыса, инклюзивной нылпиосын ужаны дышетскем. Милям сыӵе нылпиосмы вань бере, солэн тодон-валанъёсыз туж кулэ. Анай-атайёс но дораз пӧртэм юанъёсын вазисько.
Дефектолог луэмез сярысь диплом ваемез бере Людмила Геннадьевнаелэсь паймыса юасько: малы дышетскид? Ма, казьы малы, тодэме потэ ук, шуэ. Мынам, пе, классам сыӵе нылпиосы вань, кызьы соосын ужаны кулэ, валано ук.
Фаина Вячеславовна Чупина — таиз воспитатель но, психолог но, ватсаса тодон-валан сётонъя дышетӥсь но. Пиналъёсын со гынлэсь пӧртэм арбериос, картинаос лэсьтэ. Киужъёссы районын, республикаын конкурсъёсын вормо. Со ачиз ик вормисе потэм пиналъёсты городэ нуэ, отын эшшо экскурсиос ортчытыса бертэ на. Кызьы сыӵе дыръя школаысь кошкод? Кызьы сыӵе адямиосты кельтод? Выж миськисьмылы… — 60 арес ни, Кун Кенешлэн данъян грамотаеныз пусъемын. Кышкаса гинэ улӥсько, пенсие кошкоз шуыса. Кытысь мон сыӵе мыло-кыдо адями шедьтом на? Дышетӥсез шедьтон понна пединститутэ мынод, нош техничкаез… Мар но со уг быгаты, мар но уг лэсьты! Нокин но сое уг косы, нокин но уг эскеры, нокыӵе доплатаос со уг басьты. Школа котырысьтымы, школа пушкысь сяськаосты но ваньзэ со будэтэ, утялтэ. Январе ик ини монэ ёртэ, кыӵе сяськос будэтом, кызьы азбармес чебертом? Нош феврале удъёс будэтыны кутске ни.

Школаын трос сяськаос мерттэмын
Туспуктӥз: Максим Егоров

Сюлэм бӧрдэ кыкна ласянь

Пӧжы школалэн азбараз пырыса, паймоно: макем ваньмыз яратыса, сюлмась лэсьтэмын. Школа котырын — турлы-турлы сяськаос пушъё. Ваньмыз дизайнерлэн синмыныз учкыса мерттэмын кадь. Сяськаос пушъё школа пушкын но. Вань нимысьтыз оранжереязы — школаысь нылпи садэ нуись коридорзы быдэс сяська пушкы выемын. Столовоязы но сяськаос пушъё, нош югыт сэргын бадӟым вашкала самовар сылэ, чиль чиля… Пӧжы школаын вашкалаез но туалаез ог-огенызы полэсьтӥсько, артэ уло. Озьы ке но, шыпыт коридоръёс кузя ветлыку, сюлэм пирсэктэ: нылпиос воксё быризы ке, школа ворсаськоз ук…

— Туэ нырысьсэ 1-тӥ классэ одӥг пинал но ӧз вуы. Но вуоно аре лыктыны кулэ на, соку огъя дышетскисьёсы 22 кузя луозы, — шуэ Ирина Николаевна. — Зэм, собере нош кулэсмыса кошком ни… Гуртын 300 пала улӥсез, бадӟым люкетэз — пенсионеръёс. 18 семьяын гинэ садике, школае ветлӥсь нылпиос вань. Егит семьяос мед луозы шуыса, гурт хозяйствоез ӝутоно. Фермер хозяйство мед азинскоз.
Али мынам сюлэмы висе мӧйыос пумысен но, соос ас понназы уло, пальпотэмзы уг адӟиськы.
…Нош школаын нылпиослы туж ӟеч условиос кылдытэмын. Ёросын куддыръя паймо: кызьы озьы улонэз азьпалтыса ужаны быгатӥськоды?

— Проект борды но басьтӥськысалмы, мыло-кыдо специалистъёсмы котьмалы дась, — шуэ школаен кивалтӥсь. — Но кин понна со проектъёс луозы, кытысь пиналъёсты шедьтод? Сюлэм бӧрдэ. Но гуртлэн азинсконэзлы но оскиськом на: тани кӧня ке фермер хозяйствоос кылдӥзы ни…

Елена Миннигараева

Ангелина Снигирева
By Ангелина Снигирева 12 сентября, 2019 10:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<