Аракы сярысь шонерзэ верад ке, адями ачиз юэмысь дугдоз

Ангелина Снигирева
By Ангелина Снигирева 20 сентября, 2019 14:41

Ижысь Дун-чылкыт Михаиллэн собораз ортчиз курыт юонъёслы пумит кенешон. Малы адямиос юо, кыӵе законъёс кутоно на урод сямъёсын нюръяськон вылысь? Та но мукет юанъёслы валэктонъёс утчазы общественникъёс.

«Экопрофтех» огазеяськонысь егитъёс
Фото: басьтэмын «Экопрофтех» огазеяськонлэн «ВКонтакте» бамысьтыз

Лыдпусъёс куалектыто

Дун-чылкыт Михаиллэн собораз ужрад юнме шорысь ӧз ортчы. Азьвыл ӵапак черкъёс бордын курыт юонъёсын нюръяськонъя огазеяськонъёс ужазы. Туала вакытэ но черк трос сюлмаське калыкез ӟеч сюрес вылэ султытон сярысь. Кенешонэз радъязы Нылпиослэн правоосызъя оскем мурт Ольга Авдеева, «За трезвую Удмуртию» огазеяськон, элькунысьтымы анай-атайёслэн ассоциацизы, атайёслэн движенизы.

Россиысь Тазалыкез утёнъя министерство ивортэмъя, кунамы арлы быдэ 700 сюрс адями быре аракыен йырин. 68 процентэз ӵем юылӥсьёс улонысь кошко, мусазы цирроз кырмиськыса, 60 процентэз — панкреатитэн сэрен. Юисьёс, асьсэлэсь тазалыксэс быдтэм сяна, кышкытлык кылдыто артысь адямиослы: тросэз секыт йыружъёс лэсьтӥсько юэм йырын, нош кӧня кудӟем водительлэн питран улаз сюрыса быремъёс, кыӵе курадӟыса будо юись семьяосын нылпиос.

Кулэ воштӥськонъёс

— Аракыен нюръяськонэз рос-прос радъян понна нимысьтыз программа кутоно, со 3-4 арлы чакламын медло, — шуиз ужрадэз одӥгез радъясь, Удмурт кун университетысь дышетӥсь, общественник Сергей Королёв. — Туж умой луысал, Удмуртиысь Тӧролэн бурд улаз ужась аракылы пумит комитет кылдысал ке.

«Православные врачи» огазеяськонлэн кивалтӥсез Олег Морозов вераз:

— Тамак кыскисьёс пумысен закон кутэмын, али административной, культурной юртъёслы, транспорт дугдылон интыослы матын кыскыны уг яра. Аракыен нюръяськон понна но чурыт законъёс кулэ. Нош али школаос, ссузъёс, вылӥ дышетон заведениос вӧзын ик курыт юонъёсын вуз карон лавкаос ужало.

Сурез но курыт юонъёс пӧлы пыртыны кулэ, шуизы общественникъёс.

Тросаз лавкаосын курыт юонъёс сиён-юонэн валче одӥг ӝажы вылын интыямын.
Озьы нылпилэн пичиысен валанэз кылдэ, аракы — со урод маке ӧвӧл шуыса. Соин, пе, курыт юонъёсын нимаз лавкаосын гинэ вуз карыны умой луысал.

Сарапул больницаысь травматологияя ёзэн кивалтӥсь Александр Тасмаевлэн та пумысен мукет малпанэз:

— Огшоры сиён-юон пӧлысь аракыез ватӥм ке, со адямиез уката гочатоз гинэ. Россиысь тодмо врач-хирург Фёдор Углов вераз вал: «Адями ачиз юэмысь дугдоз, солы аракы сярысь шонерзэ верад ке». Соин калыклы курыт юонъёслэн кышкытлыксы сярысь шара верано.

Таза улон понна сюлмаськисьёс шуо: тросэз потэ семьяысь, юись анай-атайёс бордын сыӵегес ик нылпиос будо. Аракылы пумит, реклама котькытын луыны кулэ: телевизорын но, Интернетын но, город урамъёсын но.

«Доброе сердце» православной огазеяськон курыт юонъёсын но наркотикъёсын кушласькисьёслы юрттонэн выре.

— Учкыны кулэ, кызьы Якутиын юисьёс ӧжытгес луизы. Со куке-соку Россиысь одӥгез тужгес юись улос вал. Но отын аракыез чакланъя нимысьтыз комитет ужаны кутскиз. Озьы берло дыре якутъёс пӧлын юисьёс 2 поллы кулэсмизы, — вера огазеяськонлэн кивалтӥсез Александр Артемьев.

Кызьы портоно?

Вераськон ӝутэмын вал 21 арес тырмымтэослы аракы вузаны алон сярысь. Общественникъёс шуизы: 18 аресъем пияшез армие келяськом, кияз автомат сётӥськом, нош аракы басьтыны ум лэзе-а, мар-а? Егитъёс пӧлысь урод сямез мукет сямен портоно, пе.

Кызьы егитъёсты уродэзлэсь палэнтоно, тодэ Ижысь лэсьтӥськон технологиосъя техникумысь дышетӥсь Лия Тукаева:

— Техникумамы пӧртэм ёросъёсысь, гуртъёсысь егитъёс лыкто. Ӝыт, урокъёссы бырем бере, трос ваньмон дырзы кылдэ. Нош школаын сямен нокыӵе секциос, кружокъёс ӧвӧл. Соин но, мар карыны ёрмыса, егитъёс урод сямъёсын эшъясько. Кӧня ке ар талэсь азьло студентъёсын «Экопрофтех» огазеяськон кылдытӥм. Отчы ог 50 нылъёс но пиос пырисько, 25-ез соос пӧлысь — анай-атайтэк будэмъёс. Егитъёсын тэк пуконэз ум тодӥське: нюлэс мерттыны потаськом, чылкытатон ужрадъёсы пыриськылӥськом, трос ӟеч акциос радъялляськом.

Люкаськемъёс огкылэ вуизы: общественной огазеяськонъёс аракылы пумит уртче нюръяськыны кулэ: шаерамы 2020-тӥ-2025-тӥ аръёслы «Трезвая Удмуртия» программа дасяно, калыкез таза улонэн эшъяськытӥсь рекламаез вӧлмытоно.

Ангелина Снигирёва

Ангелина Снигирева
By Ангелина Снигирева 20 сентября, 2019 14:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<