Анайёс уз ёрме

Ангелина Снигирева
By Ангелина Снигирева Сентябрь 5, 2019 17:25

Ужъя но калыкез улон-вылонын утёнъя министерствоын ортчиз котрес ӝӧк: кенешизы пинал вордӥсь семьяослы юрттэт сётон сярысь. Тужгес но бадӟым саклык висъяськиз трос нылпиё семьяослы.

Котырес ӝӧк сьӧрын кенешизы трос нылпиё анайёс сярысь
Фото: minsoc18.ru

Ужрад ортчиз «Огъя Россия» партилэн «Юн семья» проектэз улсын. Котрес ӝӧк сьӧры ӧтемын вал трос нылпи вордӥсь анайёс, соослэн юанъёссылы валэктон сётӥзы пӧртэм министерствоосысь специалистъёс.

— Луэ озьы но: трос нылпиё семьяос уг но тодо, кӧня пумо юрттэт сётӥське соослы кун ласянь, — ужрадэз усьтӥз «Огъя Россия» партилэн Удмурт ёзэзлэн исполкомезлэн кивалтӥсез Андрей Макаров. — Калык пӧлын валэктон уж нуоно. Угось кунамы паськыт пыӵа «Демография» нацпроект, со улсын эшшо но бадӟымгес саклык висъяське трос нылпиё семьяослы, — шуиз со.

Элькунысьтымы ужъя но калыкез улон-вылонын утёнъя министрлэн воштӥсез Ольга Лубнина пусйиз:

— Приволжск федерал округе пырись улосъёсты чаклано ке, вордскись нуныослэн лыдзы тужгес но шӧд­скы­мон кулэсмемын асьме шаерын. Кылем арлэн та вакытэныз ӵошатыса, туэ 1 сюрс 200 нылпилы ӧжытгес вордскемын. Нырысетӥ мугез: та вакытэ пинал ваё 1990-тӥ аръёсы вордскемъёс — таослэн лыдзы ӧжыт вал. Мукетыз сюлмаськытӥсь ужпум: совето вакытэ нылкышноос нырысетӥ пиналзэс шорлыдын 22 аресказы вордо ке вал, та вакытэ — 6 арлы бергес. Озьыен, семьялэн трос нылпи вайыны дырыз кулэсме, одӥг нылпиен гинэ буйгатске. Малпасько, «Демография» нацпроект улсын, озьы ик «Огъя Россия» партилэсь «Юн семья» проектсэ пыӵатэмен, югдур ӟеч пала воштӥськыны кулэ. Берло аръёсы угось нылпи вордӥсьёслы шӧдскымон юрттэт висъяське.

Кылсярысь, 2018-тӥ арын 1-тӥ январь бере вордскем 1-тӥ но 3-тӥ нылпиос понна пособие сё­тӥсь­кы­ны кутскиз. О. Лубнина пусъемъя, та юрттэт демографиез ӝутыны юрттоз. Угось уноез нылкышноос, уксёзы тырмымтэен, уг дырто 1-тӥ пиналзэс вайыны, та муген ик семьяос пумит луо 3-тӥ пинал вордыны. Но та пособиос сётӥсько, семьялэсь доходзэ лыдэ басьтыса: адямилы быдэ доходзы шаерамы улыны тупатэм минимумлэн 1,5 быдӟалаезлэсь ӧжытгес люкаське ке, соку юрттэт висъяське — толэзьлы быдэ 9 сюрс 300 манетлэсь ятыргес. Вуоно арын та пособие эшшо йылтэмын луоз — 9 сюрс 900 манетлэсь тросгес. Сётӥське со, нылпилы 1 но ӝыны арес тырмытозь.

Вуоно арысен та юрттэт сётӥськоз, пиналлы 3 арес тырмытозь. Пособиез басьтон понна семьялэн адямилы быдэ доходэз прожиточной минимумлэн 2 быдӟалаезлэсь ӧжытгес луыны кулэ.

Демографиез ӝутыны юрттоз туэысен пыӵаны кутскем выльдӥськон но: нылпи вайись студент семьяослы одӥг пол сётӥське 100 сюрс манет юрттэт. Туннэ нуналлы та пособиез басьтӥз ни 50-лэсь ятыр адями.

Котрес ӝӧк сьӧрын ӝутэмын вал уно ужпумъёс: трос пинал вордӥсь семьяослэсь улон условиоссэс ӟечомытон, дунтэк музъем висъян, транспортын дунтэк ворттылон, нылпиосты школаосын пичи дунын сюдон но трос мукет. Ужрадэ вуэм трос нылпиё анайёс тунсыкъяськизы: малы азьвыл аръёсы семьялэн доходэз лыдэ басьтӥськиз, ипотека понна тыриськонэз куштыса? Озьы уногес семьяос ёрмисен лыдъяськизы, кунлэсь юрттэт басьтыны быгатӥзы. Нош табере ипотекая тыриськонэз лыдэ уг басьто.

Ольга Лубнина валэктӥз:

— Удмурт шаерын сяна, нокытын но лыдэ ӧз басьтӥсь­кылы семьялэн ипотека понна тыриськонъёсыз. Котькытын но котьку лыдъяллязы семьялэсь кӧня огъя доход басьтэмзэ. Туэ июльысен та норма федерал куронъёсъя тупатэмын.

Кенешон ӝутскиз трос нылпиё семьяослэсь ипотекаоссэс пытсаны 450 сюрс манет сётон сярысь. Со пыӵаны кутскоз вуоно арын. Кызьы, кыӵе семьяослы сётӥськоз та юрттэт — тодмо луоз матысь дыре.

Елена Никитина

Ангелина Снигирева
By Ангелина Снигирева Сентябрь 5, 2019 17:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<