Алнашын выль школа усьтӥськиз

Ангелина Снигирева
By Ангелина Снигирева Сентябрь 2, 2019 15:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
1-тӥ классъёсэ вамыштӥзы 140 пала нылпиос
Фото: А. Снигирёва

Туннэ, 2-тӥ сентябре, Алнаш черкогуртын сӥё-дано усьтӥськиз выль школа. Та нуналэз алнашъёс кема витизы. Угось черкогуртысь азьвылэз школа 800 муртлы гинэ чакламын вал, нош дышетскиз отын 1 сюрс 300 пала пинал. Выль юртлы луыса нылпиос одӥг сменаен дышетскозы ни, кружокъёсы ветлыны быгатозы.
Нылпиосты дышетскон арен ӟечкылаз Удмуртилэн Тӧроез Александр Бречалов но Дышетонъя но наукая министр Светлана Болотникова.
Выль юртын тодон-валан люкалозы 500 пала 7-тӥ-11-тӥ классъёс. Вужез школа но нылпиослэсь уз мӧзмы, отын тодон-валан люкалозы покчиосыз пиналъёс.

— Выль школа вань туала куронъёслы тупа: классъёсыз бадӟымесь, югытэсь, шунытэсь, — ӟеч мылкыдзэ уг ваты директор Геннадий Махнёв. — Татын ваньмыз вань: 250 адямилы чаклам актовой зал, туала тӥрлыкен столовой, спортзал, медпункт, нылъёслы пӧраськыны, вуриськыны, пиослы воргорон ужен вырыны тӥрлык. Туж шумпотӥськом актовой заллы, табере ужрадъёсмес асьме дорын ортчыны быгатом, азьвыл лулчеберетъя юртэ люкаськылӥмы. Нылпиос но котьку син азьын луозы — школаын пуш ласянь но кырын видеокамераос пуктылэмын. Выль юртын тодон-валан люканы быгатозы инвалид нылпиос но. Соос понна нимысьтыз лифт лэсьтэмын, ӧсъёс паськытэсь, коляскаен ветлӥсьёслы уз люкетэ, котькытын пандусъёс тупатэмын. Оскиськом, нылпиос но, дышетӥсьёс но выль школае ӝутскем мылкыдын дышетскыны-ужаны лыктозы шуыса.
Валентина Баженова вань дышетӥсьлэсь ӟеч мылкыдзэс усьтӥз:

Выль школаын дышетскозы 7-тӥ-11-тӥ классъёс
Фото: А. Снигирёва

— Туж кема витим, льӧль малпанъёсамы бергатӥм, ку меда выль школаын ужаны кылдоз ни шуыса. Быдэс гужем дышетӥсьёсын сое нылпиосты пумитаны дасям, тазатӥм. Мынам тани 11-тӥ классысь пиналъёсы но кыӵе оскизы, дышетсконзэс выль школаын быдтозы шуыса. Классазы пыразы, ваньмызлы туж кельшиз: классъёсмы паськытэсь, югытэсь, коридоръёсын небыт пуконъёс, теннисэн шудыны ӝӧкъёс пуктылэмын. Выжыкыл – мар веранэз. Табере школае ужаны но, дышетскыны но ӟеч мылкыдын вамыштомы.

Ольга но Татьяна Киршинъёс
Фото: А. Снигирёва

Туннэ пачылась мылкыдзы анай-атайёслэн но. Алнаш ёросысь Сям-Какси гуртысь Ольга Киршина Татьяна нылзэ юромо черкогуртысь школае вайиз. Нылаш удмурт классын дышетскоз.
Школаез ортчизы-дунъязы ни нылпиос но.
10-тӥ классын дышетскись Денис Кудрявцев вераз:

— Туж кельшизы коридоръёсын пуктылэм небыт диванъёс. Табере 2-тӥ сменаен ум дышетске ни. Угось азьвыл 16 час бере ӝыт доре бертылоно луылӥз. Али вазьгес ваньмылом, тросгес дыр кылдоз шутэтскыны, кружокъёсы, секциосы ветлыны.

Ангелина Снигирёва

Ангелина Снигирева
By Ангелина Снигирева Сентябрь 2, 2019 15:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<