738 миллион тыр ыштон

Ангелина Снигирева
By Ангелина Снигирева Август 28, 2019 17:21

Куазь гуртоослы уборка борды рос-прос басьтӥськыны нокызьы виссэ уг сёты. Ог 86 сюрс гектар киземъёс быремен пусъемын ни.

Зоръёсын сэрен бусые пырыны техника уг быгаты
Фото: Е. Сараматова

Ялан зоремен, куд-ог бусыосын пыдесозь ву пуке. Туэ удалтэ Алнаш, Грак, Каракулино но Камбарка ёросъёслы гинэ. Татчы секытэсь пилемъёс уг кожалляло, шуыны луоз. Алнаш ёросысь кужмо предприятиос ӝынызэ сямен уборказэс йылпумъязы ни.

— Арня пумын комбайнъёсмес гараже пыртыны но толлы дасяны малпаськомы ни, — вера Алнаш ёросысь «Прогресс» хозяйствоысь валтӥсь агроном Лев Сараматов. — 2 сюрс 400 гектар пӧлысь ог 60 процентсэ юосты утялтӥмы ни. Кылем арын сярысь туэ урожай бадӟым: котькуд гектарысь шорлыдын 30 центнер потэ, 2018-тӥ арын 22 центнер люкаськиз вал. Куд-ог бусыосысь 45 центнер калтӥськомы. Удобрение котькуд гектаре 25 килограмм поттыны быгатӥмы, бусыосмес кыедэн пазямы. Соин но урожай люкаськиз. Йыдыез гинэ утялтыны шугъяськиськом: шепъёссы кузесь, тысез трос, йырзэ вормытэк утялтон сямен тӥяське, музэ усьылэ.
«Прогресс» хозяйство тол улэ кизён борды но басьтӥськиз — озимойёслы 300 гектар чакламын. Ваньзэ кизёзы выль урожайлэсь элита кидысэн. Пудо сиён татын 25-30 центнер котькуд йырлы дасямын ни. Эшшо 600 гектар кукуруза утялтоно на, озьыен, лыдпус йылоз.
Лымшоръёс шоры вожъяськыса учкыло 21 ёросъёс. Татысь 195 хозяйство тужгес шуге-леке вуэмын. Урод куазен сэрен соос ог 738 миллион манет тыр ыштонъёс адӟизы ни. Гурт удысъя но сиён-юонъя министр Ольга Абрамова пусъемъя, Москваен соглашение гожтэмын вал, шаерамы 680 сюрс тонна урожай люканы быгатомы шуыса. Туннэ валаськомы: сомында ю тысь утялтыны нокызьы но ум пӧрмытэ. Та вакытлы чакламын вал ог 343 сюрс гектарез утялтыны ни. Быдэстэмын ай 45 процентэз гинэ. Яр ёросын воксё но 10 процентэз гинэ бусыоссы утялтэмын. 26 процентэз быдэстэмын Якшур-Бӧдья ёросын, 33 процентэз – Юкаменск районын. Ог 193 сюрс тонна ю-нянь кутсамын ни. Котькуд гектарысь шорлыдын 25,4 центнер урожай люкаське, миым сярысь со 4,5 центнерлы уногес. Тужгес трос урожай люкаське Вавож ёросын — 36,2 центнер. Шарканын 28,9 центнер потэ. Дэри ёросын 27,2 центнер люкало.

— Тужгес трос юоссы быремын Балезино, Кез но Эгра ёросын, — шуэ Ольга Абрамова. — Балезиноын ог 19 сюрс кизем бусыоссы пӧлысь ог 10 сюрс гектарез ярантэм, Кез ёросын 10 сюрс гектар пӧлысь 7,5 сюрсэз номырлы ярантэм. Эгралан ог 11 сюрс гектар пӧлысь 6 сюрс 400-эз быремын.
Эгра ёросысь «Зура» агрокомплексэн кивалтӥсь Елена Чиркова пусъемъя, вань киземзы юнме ужам уж кадь луиз. Юоссы музъем вылэ выдэмын, ю тысь шепаз ик уданы но вож-вож будыны кутскемын. Сое пудо сиёнлы гинэ но утялтыны техника уз вормы ни.

— Урожаймы туж узыр луысал. Но 5 процентсэ гинэ ай ю бусыосмес утялтыны быгатӥмы. Кылемзэ амбаре пыртонлы осконъёс быро ни. Ваньмыз ӟеч кидысэн киземын вал. Бусыосты утялтыны ӧм быгатэ ке, тол азьын музъемез небӟытыны но ум пӧрмытэ. Гырытэк кельтӥд ке, вуоно арын урожай уд люка, — шуэ Елена Чиркова.
Ольга Абрамова пусъемъя, уборка туэ сентябрь пумозь но кыстӥськоз, дыр.
Гуртоос бырем бусыоссэс фотое, видеое пуктыса, Гурт удысъя но сиён-юонъя министерствое нуналлы быдэ вутто. 195 хозяйстволэсь документъёссэ арня кутсконын Ольга Абрамова Россиысь Гурт удысъя министерствое вуттӥз ни. Москваын ваньзэ соосты эшшо огпол учкозы-эскерозы, отӥяз Россиысь Правительство ыштонъёсъя гуртоослы компенсация тырон пумысен решение кутоз. Шаерамы кадь ик секыт югдур Башкирия, Татарстан, Нижний Новгород, Киров, Пенза, Мордовия улосъёсын. Ыштонъёсын валче юрттэт нырысь ик сётӥськоз соослы, кин бусыоссэ страховать кариз вал. Асьмелэн одӥг хозяйство но страховой компаниен огкыл ӧз гожты. Компенсация тыриськиз ке, гуртоослы со бадӟым юрттэт луоз. Угось табере вуоно арлы нокидыс басьтоно.
Гуртоос туэ трос рапс басьтонлы осконэн улӥзы. Рапс вӧй угось кунгож сьӧрын дунъяське, экспортэн вырыны мылкыд карисьёс трос вал. Но рапс вож сылэ на. Сое но утялтэмзы уг луы — 1 сюрс 396 гектарез быремын ни. 4 сюрс 95 гектар пӧлысь 1 сюрс 400 гектарлэсь трос быремын етӥн но. Тазэ но экспортлы чакласа будэтӥзы вал. Пудо сиён коть тырмыт дасяны быгатомы — кукуруза утялтэмез возьма на, шуо гуртоос.

Елена Сараматова

Ангелина Снигирева
By Ангелина Снигирева Август 28, 2019 17:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<