20 процент музъемъёсты утялто

Ангелина Снигирева
By Ангелина Снигирева 5 августа, 2019 17:12

2008-тӥ арысен шаерамы пусъё фермерлэсь нуналзэ. Туэ сӥё-дано ужрад ортчиз Пичи Пурга ёросысь Уча (Ильинское) черкогуртын.

Ува ёросысь П. Рябовез данъяло
Фото: Гурт удысъя но сиён-юонъя министерстволэн пресс-службаез

Гуртэз возисьёс

Шаерамы 1 сюрс 103 фермер лыдъяське. Берло 3-4 арзэ та лыдпус уг вошъяськы. Куд-огез радысьтызы потэ, ужзэ аналтэ. Но со дыре ик мукетыз музъем борды басьтӥське. Гурт удысъя но сиён-юонъя министр Ольга Абрамова пусъемъя, туннэ фермеръёс вань гыроно-кизёно музъемъёсмы пӧлысь 20 процентсэ утялто. Кыскем йӧл пӧлысь 5 процентэз фермеръёслэн луэ. 10 миллиард манет тыр сиён-юон потто. 70 процентэз картошка но бакча сиён фермеръёслы луыса люкаське. Нош узы-борыен фермеръёс сяна вырисез ик ӧвӧл. Пыдлось гуртъёсты но ӵапак фермеръёс возё-ӝуто — колхозъёс отын кемалась быремын ни. Али тани Юкаменскын етӥн будэтӥсь фермеръёс огазеяськизы, кооператив кылдытӥзы. Юкаменскысь етӥн сэстонъя заводэ соос дэмен вуттӥзы катонизированной волокно лэсьтонъя тӥрлык. Али сое пукто. Таӵе завод Удмуртиын ӧй вал на. Ольга Абрамова пусъемъя, декабре катонизированной етӥн поттэмы луоз ни. Сое, дӥськут вуронын сяна, куто авиасалонъёсты, пластикез лэсьтонын. Та выль шокчон кузьмалоз быдэс удыслы.

— Туж тросэз фермеръёс асьсэ мылкыд каремзыя музъем борды басьтӥсько, — шуэ Ольга Абрамова. — Соос ванен куд-ог гуртъёс возисько на. Фермеръёс асьмелы туж кулэ. Соос пӧртэм удысъёс борды мыло-кыдо басьтӥсько. Али переработкаен вырисьёс йылӥзы. Сӥль поттон, йӧл кыскон бордын уноез ужало. Соослы азинскыны юрттон вылысь арлы быдэ грантъёс висъяськомы. Туэ но устооссэ проектъёсты быръёмы. Конкурсэ 81 куриськон вуиз ни. Кин ке али ужаны кутске, кин ке синмаськымон тырше ни, кин ке кооператив кылдытэ. Та нуналъёсы тужгес умойёссэ проектъёсты быръёмы. Оглом люкылэмын луоз 280 миллион манет. Та быдӟа юрттэт ӧй вал на.

Жаляса пусъёно, туннэ фермеръёслэн йӧнала специалистъёсты бордазы кутэмзы уг луы. Юристсы но, экономистсы но ӧвӧл. Соин шуг-секытъёсынызы ваче син кылё. Утэм грантсэс но кутонын шугъяськонъёссы кылдыло, куддыр шонер отчёт но лэсьтыны уг быгато. Нош грант утэм фермерез 5 ар ӵоже котыр ласянь эскерыса возё на. Уг пӧрмыты, грантэз уксёе выжтэ но лушкаське ке, сое берыктыны косо. Туннэ судын 11 сыӵе уж. Зал тыр люкаськем фермеръёслы министр шуиз:

— Шуг-секытъёсыныды асьтэ понна эн кыле. Кыӵе ке юанды кылдӥз ке, соку ик вазиське. Министерстволэн ӧсъёсыз тӥ понна котьку усьтэмын.

Министерство бордын кылдытэмын нимысьтыз центр. Отысь специалистъёс, визь-кенешен сяна, юртто документъёсты радъяны-нуыны, пудоез, бусыосты эскерыны.

Оскон йылэ тулыс

Удмуртиысь фермеръёслэн, личной подворной хозяйствоослэн но кооперативъёслэн огазеяськонэнызы кивалтӥсь Михаил Лебедев шумпотымон ивор вуттӥз: фермеръёс пала кариськыны ӧдъяз Россельхозбанк. Огазеяськонлэн ёзчиосызлы со 4,5 процентъем кредит висъяны дась. Нош росагролизинг пыр первоначальной взностэк, ӝыны арлы рассрочкаен табере луэ, 7 арлы чакласа, техника басьтыны. Та тросэзлы сюлмаськонъёслы пум поноз.

— Озьыен, ужаны трослы капчигес луоз, — шуэ Ува ёросысь Рябово гуртысь фермер Светлана Рябова. — Татчыозь асьме кужыммылы гинэ оскыса ужаллямы. Нокинэ тэльмыроно, нокинлэсь кураськоно медаз луы шуыса, кузпалы бакча сиён возёнъя хранилище но пуктӥз, техника но басьтӥз. Али 120 гектарез утялтӥськомы. Картошка сяна, ю-нянь кизиськомы, трос аръем турын будэтӥськомы. Ыж вордӥськомы. Кузпалы, колхозын ужаны шуыса, гурт удысъя институтэз йылпумъямез бере гуртэ берытскиз вал. Но колхоз быриз. Табере гуртэз возись ми кылимы. Туж жадён вакытаз ужзэ аналто ни шуыса лулӟылэ. Картошкалы дун угось воксё пичи — килограммез 2-3 манетэн кошке, нош удобрение дун арысь аре йылэ. Но тулыс вуэмлы быдэ жадёнэз быре, осконэз йылэ. Бусые потэмезлы быдэ пичи мурт кадь шумпотэ, кин калыкез сюдоз шуэ но нош ик ужаны кутске.

Кузпалзэ Пётр Рябовез ужрадын «Россиысь дано фермер» нимен пусйизы.

Елена Сараматова

Ангелина Снигирева
By Ангелина Снигирева 5 августа, 2019 17:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<