100 аръем коркалэн вакытэз

Ангелина Снигирева
By Ангелина Снигирева Август 9, 2019 13:01

Ог 300 ар талэсь азьло Юкаменск палъёсысь Василий Попов туж синмаськем узыен-борыен тырмем лудъёслы, ӝужыт-ӝужыт будӥсь писпуослы, синву кадь чылкыт ошмесъёслы. Та интые улыны ваем семьязэ, сьӧраз ӧтем ӵыжы-выжыоссэ. Озьы кутскон сётэмын вал Якшур-Бӧдья ёросысь Пичи Итча гуртлы. Кызьы со улэ туннэ?

Та коркалы 100 арлэсь трос

Возиз колхоз

Ижысь Якшур-Бӧдьяе нуись паськыт сюрес дорысь Пичи Итчаозь мынонэз вань ик на, потоно Чур черкогурт пыр, палэнэ кылё эшшо кӧня ке пичи гуртъёс — ог 15-20 иськемез ортчоно. Сюресэз туж ик вольыт ӧвӧл. Нош зор-котэн шуод: сюрес туж урод.

— Сюресмес тупатыны курыса, одӥг пол гинэ ёрос администрацие но, депутатъёслы но ӧм вазиськылэ ни, — вера гуртлэн старостаез Любовь Шумилова. — Огзы но «ум лэсьтэ» уг шуо. Но коньдон уг шедьы, лэся.

Любовь Шумилова ог 35 ар ужамын гуртысь библиотекаын — татчы 1976-тӥ арын Якшур-Бӧдья ёросысь ик Соловьи гуртысь бызем. Шуэ: соку гуртын ог 500 адями улӥз, семьяос бадӟымесь вал. Пушкин нимо колхоззы ёросын одӥгез азьмынӥсез лыдъяськылӥз. Егит семьяослы со коркаос но пуктыса сётӥз. Колхоз ик гуртэ вайись сюресэз но утялтыса возиз.

— Но 1992-тӥ арын колхозмес банкрот каризы, сое кыӵе ке миллионерлы вузаса, «Гаядива» агрофирма кылдытӥзы вал, — ватса Любовь Владимировна. — Ӝоген со но куашказ…

Гуртын пуэн эстӥсько на
Фото: А Снигирёва

Табере, пе, гурт кызьы быгатэ, озьы улыны выре. Куке-соку 8 классъем школазэс нырысь покчи классъёслы кельтӥзы, нош 2004-тӥ арын со но быриз. Ог 10 пиналъёсты автобусэн нуо-ваё Чур школае. Отчы ик нылпи садэ ветло 2-3 пичиос. Колхоззы бырем бере ик клубзэс но нунал куспын сэрттыса нуизы. Кылем арозь возиськиз на вал библиотеказы, табере со но ӧвӧл. Гуртэ пыронын ик кылемын на пичигес гинэ магазинзы. Калыклы со люкаськылон инты кадь луиз ни — мӧйыос басьяськыны пото, ог-огенызы адӟисько-кенешо.

— Арнялы быдэ 35 колды тӧдьы но 30 колды сьӧд нянь вайиськом — тырме, — вераз вуз карись Надежда Чиркова. — Угось ужась калык Селычкаысь, Чурысь басьяськыса бертэ ни.

Колхоз уж быриз бере, егитъёс палэнэ кошкыны кутскизы — кин Чуре, кин Якшур-Бӧдьяла, кин Иже интыяськиз. Семьяёосыз нуналлы быдэ но бертыло ке, оген улӥсьёс арняен-арняен уг адӟиськыло.

Л. Шумилова гуртсылы герб но куншет кылдытӥз

Мушъёс гужгето

Сергей Широбоков гурт котыраз огназгес берга. Надежда кузпалыз Ижын озеленитель луыса ужа. Куддыр котькуд нунал бертыны уг но вуы. Но Сергей Петрович — оскымон кузё. Йыг-йыг пуктэм корка котыразы кыштыр берга. Огреч-перецъёсыз, эсьма, мае ик емыш сётыны кутско ни — гурен теплица пуктэм. Ыжъёссэс сюдэ. Техника котыраз берга — пичи трактор ачиз ик бичам, бордаз инъям на плуг но, окучник но, культиватор но.

— Пушкин нимо колхозамы механизатор луыса ужай, — вераз воргорон. — Со куашкам бере Иже газовикъёс доры интыяськылӥ. Но собере кузпалыным огкылэ вуим: дорын но кинлы ке но бергано. Солэн ужез умой, кошкемез ӧз поты. Нош мон соглаш кариськи. Городын улӥсь пиосмы но котькуд шутэтскон нуналэ берто — шулдыр луэ…

Но гуртын улон мӧзмыт ик вылымтэ! Уката но гужемзэ. Песянай-песятайёссы доры вуо нунокъёссы. Дачникъёслэн коркаоссы тырмо калыкен. Улон пӧзьыны кутске. Любовь Шумилова гуртысь кӧня ке мыло-кыдоосын ӵош пӧртэм ужрадъёс ортчытъя. 9-тӥ Мае «Вунонтэм полкен» пото, Паска но, Выль но каро… Али но тодазы, кызьы 2012-тӥ арын быдэс гуртэн пусйизы Пичи Итчазылы 300 ар тырмонэз. Любовь Шумилова, эсьма, соку гуртсылэсь гербзэ но, куншетсэ но кылдытӥз — со-осты гурт администрациын юнматӥзы.

С. Широбоков

— Гуртамы тросэз муш вордо вал, али но таӵеос ӧжыт ӧвӧл, — пусйиз Любовь Владимировна. — Эшшо котькуд азбарлы-бакчалы быдэ ог 15-20 яблокпуос возьылӥзы, али но тулыслы быдэ гуртмы яблокпу сяськаос пӧлы вые — ваньзэ тае возьматыны выри гербамы. Табере дорамы куноос лыкто ке, соослы гербез одно возьматӥськом.

Нош гуртэ пырись-потӥсьёс ӵем луыло, пе. Арлы быдэ сямен ик экспедициен вуыло Удмурт кун университетысь студентъёс. Угось Пичи Итчаысен Ува ёросысь Эресьтэмозь (Эрестем), пырак потыса, ог 8 иськем гинэ луэ. Лыдъяське: Эресьтэм интыяськемын элькунмылэн шораз.

Быдэс история

Эшшо ке гуртын вань 100 арлэсь кема сылӥсь корка — 1917-тӥ арын ӝутэмын. 5 борддорен юрт туннэ но йыг-йыг адӟиське. Тодӥ: ӵапак татын туннэ но уло гуртлы кутскон сётӥсь Василий Поповлэн выжыосыз.

Виталий но Евгения Поповъёс Ижысь «Редуктор» заводын ужамын, али пенсиын ни. Та юртэ гужемлы гинэ бертыло ке но, сое туж утялтыса возё. Липетэз, пе, вияны кутскиз вал но, выльдӥзы. Косяк котыръёсты но тупатъяно луиз ни. Нош ачиз корка, ӟыгыр быдӟа юн коръёслэсь ӝутэмын бере, номыр уг луы.

ШИробоковъёслэн корказы шукрес
Фото: А. Снигирёва

— Коркаез пуктэм ай прадедэ Василий Васильевич, — шуэ Виталий Попов. — Мон сое, конешно, адӟыса ӧй вутты ни. Но быдэ вуи та коркан. Али но вузаны курисьёс вань — сётэммы уг поты. Со ведь быдэс история. Та коркан ик огпалаз прадедэ пичигес гинэ лавка возем — сакырен, керосинэн вуз карем. Кӧня ке семья улэм одӥг интыын. Собере соосты кулаке поттӥллям, ярам, Сибирь пала келяллямтэ. Бӧрысь та юртын школа но, сельсовет но вылэм…

Гуртоос шуо: татчы нырысетӥ лыктӥсьёс юнме бырйиллямтэ та интыосты. Музъемзы ёросын тужгес умоен лыдъяське. Инкуазь выжыкылын кадь, солэн чеберез гурт улонэз азинтыны кужым сётэ. Оско: Пичи Итчазы улоз ай!

Элина Кумачёва

Туспуктэмъёсыз авторлэн

Ангелина Снигирева
By Ангелина Снигирева Август 9, 2019 13:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<