Эйбет эптэш

Ангелина Снигирева
By Ангелина Снигирева Август 14, 2019 12:22

Кыӵе кар чебер тымет доры интыяськемын? Кыӵе кар ватӥськемын ӝужыт пужымъёс пӧлы? Кыӵе кар люка котыраз трос эшъёссэ? Кытын шудо, серекъяло пиналъёс? Та юанъёслы валэктон одӥг гинэ — «Усточикар»!

Удмурт дӥськут кылдытон
Фото: М. Галеева

Умой дышетскод — лагере сюрод!

2003-тӥ арысен ни Башкортостанысь Татышлы ёросысь Вязовка гурт вӧзын усточи удмурт нылпиос понна выжыкыл дунне улӟе. Туэ «Усточикар» улосвылкуспо лагерь 17-тӥзэ ини ӧсъёссэ усьтӥз Башкортостанысь, Пермь улосвылысь но Удмурт шаерысь нылъёс но пиос понна.

Бадӟым ужез вормыны удмурт огазеяськонлы юрттӥзы Башкириысь удмуртъёслэн йӧскалык лулчеберетъя центрзы, Лулчеберетъя министерство но Егитъёсын ужан политикая но спортъя кенеш, Удмуртиысь Йӧскалык политикая министерство.

«Усточикар» 5-тӥ гудырикошконэ ужзэ мытӥз. Лагерез усьтонэ пыриськыса, нылпиосты ӟечкылазы Татышлы ёрос администрациысь спортъя но егитъёсын ужан политикая отделэн кивалтӥсь Э. Валиева, историяя но культурая центрысь валтӥсь специалист И. Самигулова но лагерен кивалтӥсь Ф. Нуриахметов.

«Усточикар» удмурт кадръёсты дасянъя аспӧртэм кебит луэ бере, отчы сюрыны арысь аре маке кузьда черод люкаське. Жаляса верано, ваньзэс кутыны луонлык ӧвӧл. Озьы ке но котькуд аре татчы 100 пала нылпиос путёвка уто.

— Милям конкурсмы быдэс дышетскон ар ӵоже кыстӥське, шуыны луоз. Пиналъёс тыршо асьсэды умоен возьматыны. Собере ини дышетӥсьёссы, школаысь администрация тужгес усто пиналъёссэс быръё, милемлы список сёто. Та пиналъёс пӧлын луыны быгато элькун олимпиадаосын, пӧртэм ужрадъёсын вормисьёс, азьветлӥсьёс, киуж лэсьтэменызы я мукет быгатонлыкъёсынызы паймытъясьёс, — шуэ Ирина Самигулова.

Удмуртиысь но быгатӥсьёсты синйылтытэк уг кельто. Ар ӵоже ӟеч тыршид, дышетскид ке, я «Шундыкар», я «Усточикар» лагере одно ик сюрод. Удмурт егитъёслэн «Шунды» огазеяськонзылэн кивалтӥсез Алина Чернова верамъя, Удмуртиысь нылпиослэн Башкирие мыныны мылкыдзы бадӟым. Соос лагерь сярысь эшъёссылэсь кыло, бускель шаерен тодматскемзы потыса лыкто.

— Туэ милям туен вырись нылашмы «Усточикаре» сюриз. «Шундыкарын» сыӵе отрядмы ӧвӧл бере, со «Усточикаре» ачиз куриськиз. Оглом туэ 15 пиналъёс Башкирие шонтӥзы: «Шундысиос» движение мыло-кыдо пыриськисьёс, «Ӟечбур!» газетлэн но «Кизили» журналлэн юнкоръёссы, — вера Алина Владимировна.

Мӧзмыны маза ӧвӧл

Лагере вуэм пиналъёслэн нуналъёссы ӵукнаысен бер ӝытозь часэн-часэн гожъямын. Соин ик мӧзмыса улыны маза ӧй вал нокинлы. Вуоно нуналаз ик усточиос отрядъёссылы ним бырйизы. «Ренбик», «Бурсин», «Эштерек», «Агузар» — тазьы нимазы соос асьсэды. Малы ӵапак тазьы? Лагерьлэн валтӥсь вожатоез Надежда Антонова верамъя, туэ смена сӥземын калыкъёслэн эшъяськыса улэмзылы. Азьло дунне возиське вал батыръёслэн эшъяськемзы вылын. Татысь ик потӥзы отрядъёслэн нимъёссы но.

Туйлэсь киуж лэсьтон
Фото: М. Галеева

Пиналъёс нунал куспын пӧртэм-пӧртэм ужрадъёсы пыриськыло. Соослэсь дырзэс тунсыко ортчытон сярысь сюлмасько задоресь но шаплыесь вожатойёс Дмитрий Чернов, Никита Соприн, Мариалина Нуриахметова, Екатерина Ермолаева но Надежда Антонова.

Озьы ик удмурт пиналъёс понна котькуд нунал 6 ӧръёсъя занятиос ортчо. Соос эстрада (дышетӥсьсы — В. Романова), фольклор (Ф. Нуриахметов), журналистика (М. Галеева), удмурт дӥськут кылдытон (Е. Петрова), театр (В. Ушаков) но кызьпу туен вырон (А. Шагиев) ӧръёсъя тодон-валанъёс люкало. Котькуд учыре шудонъёсты, йылолъёсты, калык кырӟанъёсты но эктонъёсты дышетонъёс радъясько.

Пиналъёс­ты крезьгурен шулдыртэ К. Баширов, нош спортъя ужрадъёсын шумпот­тэ В. Губаев.

Нылпиос театральной постановка возьмато
Фото: Отдел молодежной политики и спорта МР Татышлинский район РБ

«Усточикар» лагерьлэн дырыз вакчи — 10 нунал гинэ. Но со куспын пиналъёс трос выльзэ тодыса вутто. Со сяна, дышем сямъя соос нимысьтыз концерт дасяло. Кырӟаны-вераны быгатэменызы башкир музъем вылысь гуртъёсты паймытъяло.

Кезьыт, зоро куазь но ӧз кышкаты пиналъёсты! Шутэтскыса но, тодон-валан но люкаса вуизы! Ӵуказе ини лагерь ӧсъёссэ ворсалоз. Йылпумъяса котькуд отряд аслэсьтыз марлы дышемзэ возьматоз. Эстрадаез, фольклорез гажасьёс концерт пуктозы, театр отрядысь пиналъёс спектакль возьматозы, кызьпу туен вырисьёс адӟытон лэсьтозы, журналистъёс асьсэ гожъямъёсынызы, дизайнеръёс дӥськутэнызы тодматозы.

Паймымон учыръёс

Лагерьын тужгес трос Башкириысь усточиос. Палэнысь лыктэмъёслы нырысь валантэмгес йӧтэ пиналъёслэн вераськемзы. Соин ӵем дыръя татын серемес учыръёс пумиськыло.

Одӥг аре Татышлы ёросысь пиналъёс комнатаязы ву кисьтӥллям. Мар карыны паймыса, вожатойёс доры бызиллям:

— Милемлы кышет кулэ!

Валтӥсь вожатой кыӵе ке ужрадлы дасясько, дыр, шуыса, сумкаысьтыз аслэсьтыз яратоно кышетсэ, пе, поттӥз.

— Малы сыӵе чеберзэ сётӥськоды? Жаль ӧвӧл шат? — юаллям нылпиос.

— Тӥледлы номыр жаль ӧвӧл. Басьтэ, басьтэ, нылъёс!

Нылъёс валатскыса выж ӵушылыны мучоло кулэ шуиллям. Озьы кышет но утемын, нылъёслы ӟустари но шедьтэмын вал.

Палэнысь вуэм пиналъёс, лагерьын 10 нунал ӵоже улыса, асьсэос но камсьӧр диалектэн вераськыны кутско. Мон ачим но «Усточикаре» огпол гинэ ӧй вуылы. Нылпиосын журналистикая занятиос нуылӥ. Соку ик ӵектӥ пичияк кыллюкам дасяны, нылпиослы ог-огзэс валаны капчигес мед луоз шуыса: индэ — ини, ӟаратон — яратон, кӧрыш — бускель, кышет — ӟустари, мучоло, ӟалык — кышет, туган — ӵыжы-выжы, эптэш — эш, ӟурган — шобрет, ӟарам — ярам, эйбет — умой, кӧшкеманы — мӧзмыны, кызыгыны — синмаськыны.

Озьы «Усточикар» эйбет эптэш луэ нылпиос понна.

Наталья Михайлова

Ангелина Снигирева
By Ангелина Снигирева Август 14, 2019 12:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<