Шуныт «Тулкым»

Ангелина Снигирева
By Ангелина Снигирева Август 30, 2019 16:34

Туэ 7-тӥ ползэ радъяськиз «Тулкым» лагерь. Татчы лыктыны быгато ёросъёсысь удмурт нылпиос. Лагерьын шутэтскыны, тодон-валан люканы луонлык сёто ёрмыса улӥсь, секыт югдуре шедем, трос нылпиё семьяосысь пиналъёслы.

«Тулкымын» нылпиос пӧртэм удысъяёсын тодматскизы
Фото: «Тулкым» лагерьлэн «ВКонтакте» бамез

Удмурт пиналъёс понна

Таяз гужем «Тулкыме» — со арлы быдэ радъяське «Ёлочка» лагерьын — 40 нылпиос вуылӥзы. Куриськисьёс эшшо но тросгес вал. Ёрос администрациосысь семья понна кыл кутӥсь специалистъёс дасесь тросгес пиналъёсты ыстыны, но ваньмызлы инты уг окмы. Уго «Тулкыме» вуылэмъёс татчы берытскыны курисько — секыт югдуре шедем удмурт пиналъёс понна та одӥг гинэ смена. Татын ӧвӧл нырзэс кисыръясь, улонлэсь ортчем нылпиос — тросэз пичиысен ик шуг учыре шедемын. Кинлэн ке анай-атаез юыны яратэ, кин ке бубытэк яке мумытэк быдэсме, куинетӥезлэн тазалыкез лябгес.

— Администрациосысь специалистъёс шедьто сыӵе нылпиез, кинлы зэмзэ но юрттэт кулэ. Тани Глазов ёросысь шуо: ми лагере ӟуч вераськись пиналэз ыстомы. Кызьы кадь быдэс ёросысь удмуртсэ уд шедьты? «Тулкымын» вань программа удмурт кылын дасямын, удмуртэсь вожатойёс но, дышетӥсьёс но, куноос но. Удмурт кылэз тодӥсьтэм пиналлы татын секыт но, мӧзмыт но потоз. Соин Глазовысь пиналэз ӧм кутэ, со понна мукет ёрослы 2 полэс удалтӥз, — вера «Тулкым» сменалэн кивалтӥсез Лариса Ускова.

Лариса Ускова та лагерен 5-тӥ ползэ кивалтӥз. Котыраз люказ оскымон дышетӥсьёсты. Тани «Театр» удысэн пиналъёсты тодматӥз режиссёр Дмитрий Корепанов — нылпиосын ужан вылысь со отпуске шуыса бертӥз Санкт-Петербургысь. Владимир Вахрушев, Кузебай Герд нимо гимназиысь дышетӥсь, пиналъёсты видео- но фотокамераосын ужаны, монтаж лэсьтыны нодъяз. Анна Самсонова туэ йылпумъяз Казаньысь культурая институтэз, со выйытӥз пиналъёсты эктон дуннее. Виталий Белков — медициная академиысь студент, нош нылпиосты дышетӥз крезьгур удысъя. Уго Виталий кырӟа, крезьгур гожъя, гитараен, барабанэн, фортепианоен, баянэн шудэ. Максим Агафонов — медициная академиысь студент, трос нылпиё семьяын будэмын. Солы туэ оскемын воксё выль удыс — пиналъёсты дышетыны нырысетӥ юрттэт сётыны, тодматскыны эмъясьлэн уженыз.

Зуркатон

«Тулкыме» лыктӥсь нылпиос, валамон, нокыӵе конкурсэз уг ортчо. Татын быгато бырйыны асьсэлы кельшись удыс. Зэм, ӝожомонъёстэк уг луы. Тани отрядын 10 мурт луыны кулэ, нош эктыны мылкыд карисьёс 14 кузя люкаськизы. Соослы жеребьёвка радъямын вал, кинлэн ке нырысь-валысь мылкыдыз но куашказ.

Лагерьын мӧзмыны дыр ӧвӧл — нуналлы быдэ репетициос, выль ужрадъёс. Видеолы дышетскисьёс котькуд ӵукна возьматӥзы толло нуналысь иворъёсын программа. Фото пуктылӥсьёс котькуд нунал бордгазет поттӥзы. Пиналъёс огъя ужын эшъясько, зэмос семья кадь луо. Эшшо соос понна радъяськизы тунсыко мастер-классъёс но пумиськонъёс.

— Куноез ӧтьыкум, мон азьло ик верасько: ужамды понна коньдон тырыны уг быгаты. Но огез но пумит ӧз луы, — вера Лариса Ускова.

Кылсярысь, киужлы дышетыны вуылӥзы Дарина Чиркова но Галина Матвеева. Аслаз ужез сярысь вераськиз, юанъёслы валэктонъёс сётӥз «Удмурт дуннеысь» корреспондент Елена Скворцова. Нылпиослэсь дебатъёссэс дунъяз Кун Кенешысь депутат Рашид Абашев. Экзаменын сямен, пиналъёслэн юанъёссылы валэктонъёс утчаз нациосын ужан политикая министр Лариса Буранова.

Пиналъёс фото но видео лэсьтон сярысь тодӥзы
Фото: «Тулкым» лагерьлэн «ВКонтакте» бамез

Со сяна, котькуд нунал радъяськизы на онлайн-кенешонъёс. Тани Юлия Поздеева улэ Ирландиысь Дублин городын. Со нылпиослы улэм-вылэмез сярысь вераз, онлайн-экскурсия радъяз Дублинысь университетын но мукет тунсыко интыосын. Мукетаз онлайн-пумиськонэ пыриськиз Венгриысь Жофи Сираки — со шатыр вераське удмурт кылын.

Лариса Ускова верамъя, нылпиослы «Тулкым» сайкан выллем луэ. Соос адӟо: ачид бордын ужад ке, ӟеч дышетскыны сюлмаськид ке, тон но быгатод усто профессия басьтыны, улондэ умой радъяны.

— Мон шумпотӥсько юрттӥсьёсмылы. Тани Кун Думаысь депутатлы Алексей Загребинлы, Кун Кенешысь депутатлы Рашид Абашевлы вазиським но — коньдонэн юрттэт вуиз. Озьы котькуд нылпилы футболка кузьманы пӧрмытӥм. Огез ужбергатӥсь гожъяськон-суредаськон арбериос сётӥз. Мукетъёсызлы вазиським, кӧня ке кило конфет курыса — коробкаосын вайизы. Эшшо огез спонсормы пинь миськон паста но майталъёс вуттӥз, — юрттӥсьёслы тау каре Лариса Ускова.

Ӧз быдэсмы Лариса Васильевналэн огез гинэ малпанэз: смена пумын вань нылпиослы школа арбериосын тырмытэм ранецъёс кузьмамез потэ вал, но солы спонсор ӧз шедьы.

Елена Скворцова

Ангелина Снигирева
By Ангелина Снигирева Август 30, 2019 16:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<