«Шундыкар» пиштэ котькуд ар

Ангелина Снигирева
By Ангелина Снигирева Август 14, 2019 12:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Гужем шутэтскон вакытсэс нылпиос пӧртэм сямен ортчыто. Тросэз лагерьёсы шонто. Берло аръёсы удмуртъёсаз но вуылыны трос луонлыкъёс вань. Гужем куспын «Шудкар», «Егит тулкым», «Ӝужась кизилиос», «Тулкым», «Усточикар» сменаос ортчо. Но таослы йылпумъян выллем луэ тужгес но бадӟымез, вашкалаез — «Шундыкар».

Пичи Пурга ёросысь Вуж Мӧнья гуртысь У. Архиповалэн конкурсэ ыстэм суредэз

Дышемез борды вылез

«Шундыкар» ужзэ 17-тӥ гудырикошконэ мытэ. Иж котырысь «Ёлочка» лагерьын 10 нунал ӵоже нылпиос пӧртэм удысъёсын тодон-валанъёссэс будэтозы.

— Котькуд ар лагерямы быгатӥсь ӧнерчиосты ӧтьыны, нылпиослы тунсыко луись ӧръёсты бырйыны тыршиськомы, — вера «Шунды» огазеяськонлэн тӧроез Алина Чернова. — Озьы кылем арын кылдӥз «Туспуктон» отряд. Пиналъёс фотоаппаратэн ужаны дышетскизы, репортажной туспуктэмъёс лэсьтылӥзы, фотосессиос но радъяллязы. Туэ ужмес азьланьтомы, нылпиосты визьнодалоз туспуктӥсь Максим Егоров.

Улонэ туж вӧлмо туала технологиос. Асьмелэн азинлыко программистъёсмы вань бере, туэ малпамы, нылпиосты та ӧрен но тодматыны. «Информационной технологиос» отрядысь нылпиосты Григорий Григорьев дышетоз. Со телефонъёслы удмурт кылын пӧртэм пумо ватсэтъёс лэсьтылэ. Удмурт клавиатура, удмурт-ӟуч кыллюкам, удмурт кылэз дышетонъя «Кылдысин» ватсэт, нылпиослы «Чибори» раскраска, «Шунды» огазеяськонэн ӵош дасям «Удмурт алфавит» проект — ваньмыз солэн тыршеменыз кылдӥз.

— Смена ӵоже программирование сярысь ваньзэ вераса уг вутты, дыр, — шуэ Григорий, — но ми тыршомы бадӟым проект быдэстыны — мобильной телефонъёслы удмурт шудон кылдытомы.

«Суредаськон» отрядын но выль технологиосты уже кутыны малпало. Марина Степанова, краскаосын сяна, графической планшетэн суредаське на. Chukinder огинлэн ӝӧк выл шудонъёсызлы, «Дарт» газетлы суредъёс дасялля.

— Льӧль малпанэ — быдэс книгаез иллюстрировать карыны, малпасько, лагерьын удмурт нылпиосын мар ке тунсыкозэ пӧрмытомы! — оске Марина.

Выль дӥськут коллекция поттозы дизайнеръёс. Нылъёсты Эгра ёросысь дизайнер Надежда Касаткина вуриськыны, «верховая набойка» амалэн басма чеберъяны дышетоз.

Туэ выль ӧнерчи «Литература» отрядын. Гожъяськыны Анастасия Шумилова нодъялоз. Анастасиялэн 2 кылбур бичетэз потэмын: «Дыр-эктон» (2015) но «Ку» (2018). Туала драматургияя но режиссурая центрен (ЦСДР) радъям ШУД-э (Удмурт драматургияя школае) ветлӥз, пьеса гожъясьёс пӧлын «Шудом» вожвылъяськонэ пыриськиз. Отын Анастасиялэн эшеныз ӵош гожтэм «Год театра» пьесаез вормисе потӥз.

Анастасия кутскись гожъяськисьёсын пӧртэм жанръем чеберлыко текстъёс бордын ужалоз.

— Ӵошен валаломы, кызьы гожъяськисьлэсь валтӥсь тӥрлыксэ — кылэз — валано, солэсь чеберзэ адӟоно, быгатыса уже кутоно, — вера кылбурчи.

Азьло аръёсы Якшур-Бӧдья ёросысь кибашлы Василий Широбоков «Шундыкарысь» пиналъёсын крезьёс, кубызъёс лэсьтылӥз. Туэ но пиосты пуэн ужаны дышетоз.

— Али мон Максим Вылегжанинлэн лыжероллеръёсын бызьылонъя ӵошатсконъёсызлы пулэсь кубокъёс лэсьтӥ, — вера Василий. — Элькунмы спортэн зол эшъяське, пӧртэм пумо ӵошатсконъёс ортчыло, соин ик синпель кузьымъёс быдэстыны туж тунсыко. Лагерьын нылпиосын ӵапак кубокъёс лэсьтыломы, со сяна, эпоксидной сирен выромы.

«Шундыкаръя» адӟиськомы, макем удмуртъёс кырӟаны ярато. «Эстрада» отрядэ трос уӵы куараё нылпиос вуыло. Кырӟасьлэн Марина Галичаниналэн бурд улаз «Шундыкарын» егит кырӟасьёс Светлана Ручкина, Эльвира Панченко, Алина Антонова, Артемий Гаврилов будӥзы. Туэ Марина вуоно кизилиосты асьсэдыз сцена вылын чебер возьыны дышетоз, куараоссэс пуктоз, бадӟым шоу дасялоз.

Театралъёс быдэс спектакль пуктозы. Визьнодалоз соосты Удмурт театрысь артист Константин Никитин.

Лагерьын крезьгуро инструментъёсын шудӥсь нылпиослэн асьсэлэсь группазэс кылдытыны луонлыксы вань. Крезьгурчи, Silent Woo Goore, «Малы ми», bobolenin группаосысь гитарист Владимир Жуйков соосын нимысьтыз крезьгуро концерт дасялоз.

Покчиосызгес пиналъёс удмурт гуръёсын, лулчеберетэн, сям-йылолъёсын «Фольклор» отрядын тодматскозы.

— Та смена куспын пӧртэм тунсыко тодон-валан басьтыны луоз, — вера крезьчи Валерия Фёдорова. — Кылсярысь, малы кунгож сьӧрысь тодосчиос сокем тунсыкъясько удмурт фольклорен но маин аспӧртэмлыко луэ удмурт куара.

«Шундыкарлэсь» пӧзись улонзэ гожтыса кельтозы «Журналистика» отрядысь пиналъёс. «Мынам Удмуртие» телерадиокомпаниысь журналист Вероника Ваулина нылпиосын котькуд нунал иворъёсын видеоадӟытонъёс дасяны, газет поттаны малпа.

Вотэс пунозы

«Шундыкар» лагере шедьыны мылкыд карись нылпиос трос, но туэ отын шутэтскыны 120-ез гинэ быгатоз. Удмурт пиналъёс понна конкурс радъяське.

Татчы вожатой сямен пыриськыны но уно егитъёс дась луэмзэс верало. Соос но нимысьтыз вожвылъяськон пыр ортчо. Пӧлысьтызы 10-сэ гинэ быръё.

— Мон кылем арын но куриськонме келяй вал, но лагере ӧй сюры, — вера «Литература» отрядлэн вожатоез Анастасия Фомина. — Туэ туж сюлмаськи, удалтоз-а, уз-а. Монэ кутӥзы шуыса адӟи но, шумпотӥ, вӧлдэтозь тэтчаны дась вал! Мынам малпанэ быдэсмиз! Нырысьсэ вожатой луыны кышкыт. Дорад пӧртэм сямо пиналъёс сюрозы. Но малпасько, ваньмыз пӧрмоз шуыса, смена туж яркыт но пайдаё ортчоз!

«Шундыкар» нуналъёс тунсыко мед ортчозы шуыса, котькуд ар вожатойёс лагерез кыӵе ке темалы сӥзё. Азьло аръёсы смена удмурт воршудъёсын, арлэн пӧртэм вакытъёсыныз герӟаськылӥз. Кылем арын «Вужзэ гажаса, выльзэ малпаса» кылъёсты асьсэлы ужпум кадь пуктӥзы: котькуд нунал вашкала удмурт сямъёслы но туала улонлы сӥзем ужрадъёс ортчылӥзы.

Тазэ сменаез радъякузы, вожатойёслэн пӧртэм малпанъёссы кылдылӥзы. Потэ, пе, вал, со нылпиослы но тунсыко, валамон мед луоз, асьсэлы вожатойёслы но. Озьы Интернет вотэсэз тодазы вайизы.

Али отын пӧртэм калыккуспо проектъёс кылдо, дуннеысь вань кылъёсын верасько. Удмурт сямен но. Анай кылмы вотэсын калыкмес огазеяны быгатоз. Песянайёслэсь, песятайёслэсь вашкала сям-йылолъёссэс утьыса, вотэсын выль емышъёс кисьмалозы. Туэ «Шундыкар» лагерь ӵоже нуналысь нуналэ пиналъёс пӧртэм ёзъёслэсь (творчество, кужым, мылкыд, малпан но мукет) юн удмурт вотэс пунозы.

Нылпиослэсь тыршемзэс дунъяны но ӧвӧл вунэтоно. Котькуд нуналлы йылпумъянъёс лэсьтыса, отрядъёслы «лайкъёс» кузьмамын луозы, кинлы ке тросгес, кинлы ке ичигес — кин кызьы тыршоз, йӧнтэманы шедьтэмъёслы «дизлайкъёс» сётӥськозы. Нош малы, улыса-вылыса адӟом. Вань люкам «лайкъёс» пиналъёслы берпуметӥ нуналаз туж кулэ луозы.

Мария Емельянова

Ангелина Снигирева
By Ангелина Снигирева Август 14, 2019 12:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<