Шумпотон утчало

Ангелина Снигирева
By Ангелина Снигирева Август 14, 2019 13:47

Эгра ёросысь Бачкей гуртысь Емельяновъёс Россиысь «Арлэн семьяез-2019» вожвылъяськонын вормисе потӥзы. Нош гуртоос понна Надежда но Анатолий кемалась ни адӟем карымонэсь луо улон-вылонын.

Эгра ёросысь Бачкей гуртысь Емельяновъёс «Арлэн семьяез» конкурсын вормизы

Вожвылъяськонэз радъяз Россиысь Ужъя но калыкез утёнъя министерство. Отчы пӧртэм улосъёсысь 353 семьяослэсь куриськон вуиз. Котькудӥз аслаз вормонъёсыныз, улон-вылонэныз паймытыны выриз. Удмуртиысь конкурсэ пӧртэм номинациосъя пыриськиз 5 семья: Емельяновъёс сяна Грак ёросысь Николаевъёс но Печниковъёс, Дэри ёросысь Даниловъёс но Можга городысь Семеновъёс. Дунъясьёсты синмаськытӥзы Эгралась удмуртъёс. Табере Емельяновъёслэн но мукет вормисьёслэн семьяоссы сярысь министерство книга дася. Оглом отчы пыроз 85 семья. Книгаез вуттыны чаклало октябрь толэзёзь. Ӵапак соку Москваын вожвылъяськонлы сӥё-дано йылпумъян ужрад ортчытозы. Татын вань вормись семьяосты ог-огенызы тодматозы, экскурсиос радъялозы.

Семьяямы мон двигатель луисько, — вера Надежда Александровна. — Мукет сямен уг быгатӥськы. Уже но огыр-бугыр: Бачкей гуртысь культурая юртын режиссёр луисько. Театральной коллективъёсын кивалтӥсько, олокыӵе но постановкаос соосын пуктӥськомы. Таин уж уг быры: гурт калыкез шулдыртон понна пӧртэм мероприятиос дасяно. Шаерамы но Россиын ортчылӥсь фестивальёсы но ветлытэк уг луы. Эшшо ке туристъёсты пумитано-келяно, соосты историенымы тодматоно. Годекшур гуртэ но соосты нуллоно, пельняньлэн кылдэмез сярысь верано. Сибирь трактлы сӥзем экскурсия но радъяно. 2014-тӥ арысен Ижын ортчылӥсь «Туризм. Спорт. Отдых» адӟытон Эгра ёросысь делегациен ӵош пыриськисько. Клубын ӵош ужась эшъёсы туж умоесь — ог-огмылэсь мылкыдъёсмес валаськомы. Куддыр семьяосы юало ик: тон жадьыны но гань-гань шутэтскыны куке валалод-а? Дышымтэ, лэся, шутэтскыны. Тани али Крымез адӟоно кариськимы. Зарезь дурын, шунды шорын шутэтскыны сюлэм уг чида. Мыным ялан кытчы ке мыноно, маке лэсьтоно. Тужгес умой шутэтскон но мон понна — кытчы ке мынон. Ижысь но Пермьысь вань музейёстӥ котыръяськимы ни. Таӵе походъёс семьямес уката юнгес каро. Туж потэ вуылэме Казахстанэ но Байкалэ.
Надежда Александровна киосызлы но, йырызлы но маза уг сёты: суредаське, кылбура, эктэ, кырӟа. Котыр ласянь мыло-кыдо луэмез гурт калыкез паймытэ. Нылыз но анаезлэсь адӟем каре. Клубазы кыӵе гинэ ужрад уг ортчы, Владислава котькытчы пыриське, сцена вылысь уг васькалля. Вольыт лыдӟиськонъя Россиысь конкурсъёсын со кӧня ке пол дипломант луиз ни. Шаерамы литературалы сӥзем конкурсъёс сярысь веранэз ик ӧвӧл. Дышетске но «витьёслы» гинэ. Пичиез пиналзы — Денис — нылпи садэ ветлэ. Но со но семьяезлэсь бере уг кыльы — эктыны, кырӟаны яратэ. Атаез вӧзын машина бичан-тупатъямъяськон сяменыз но маке нукыртэ, шуэ Надежда Емельянова. Кузпалыз но оскымон. Со мылкыдзэс ӧй ӝутысал ке, номыр ӧй пӧрмысал.

Пӧртэм ужрадъёсы пыриськон ми понна хобби кадь луэмын, — шуэ Анатолий Николаевич. — Ялан кыӵе ке вожвылъяськонын, фестивальын вормем потэ. Шаерамы устоез семья миым луимы бере, Россиысь конкурсэ пыриськоно кариськимы. Вожвылъяськон вожвылъяськонэн, но шаермы понна но маке лэсьтэм потэ. Нош кутскиз ваньмыз 2017-тӥ арын. Соку Надя семьямес «Экорегион» проектэ кыскиз, табере соя быдэс семьяен сик мерттыны, ярдуръёсты утялтыны, жуг-жаг интыосты сузяны ветлӥськом. Мӧзмыны ог-огмылы ум сётӥське.
Мӧзмыны Анатолий Емельяновлэн дырыз но ӧвӧл. Со али корка пуктон борды басьтӥськиз. Киосыз котьмалы мыно бере, фундаментсэ но, кирпичсэ но ачиз тыре. Бордаз ӵыжы-выжыосыз юрттӥсько. Котькыӵе шумпотонъёсмы но, куректонъёсмы но вань родняосмылы одӥг — дэмен улӥськомы, пе. Емельяновъёс ӝожтӥськыны уг быгато.

— Куректыса трос-а басьтод та улонлэсь? — шуэ Надежда Александровна. — Выль нунал вордске ке, шумпотон утчаськомы. Ялан будыны кулэ. Гань-гань кариськид ке, азьлань мыныны мылкыдыд пуксёз. Адямилэн котьку луыны кулэ марлы ке стимулэз. Нылпиос понна трос лэсьтэм потэ. Асьме семьямы вылын возьматэммы потэ: улонэз котькуд адями умойгес, шулдыргес, чылкытгес карыны быгатэ.
Емельяновъёслэсь адӟем карисьёс гуртазы но, ёросазы но трос. Россиысь конкурсын вормемзэс тодэмзы бере но котькудӥз ӟечкыланы тыршиз. Гуртсы валче улэ — татын ог 220 мурт. Кыӵе ке визь-кенеш кулэ луэ но, бачкейёс Емельяновъёс доры мыно. Капчи мылкыдо, котьку вазиськись но рос-прос ужась луэменызы но Емельяновъёс калыкез асьсэ пала берыктыны быгато, шуо гуртоос.

Елена Сараматова

Ангелина Снигирева
By Ангелина Снигирева Август 14, 2019 13:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<