Чорыг, муш, кеч…

Ангелина Снигирева
By Ангелина Снигирева Август 7, 2019 16:27
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кызьы ужазы гуртоос ӝыны ар ӵоже но кудпала вамыштоно азьланяз? Та но мукет юанъёслы валэктон утчазы Правительствоын. Татчы люкаськылӥз Гурт удысъя но сиён-юонъя министерство бордын ужась Общественной совет.


Фото: Гурт удысъя но сиён-юонъя министерство

3 сюрс 600 трактор кулэ

Гуртоос январь-июнь толэзьёсы чырткем ужаны быгатэмзэс возьматӥзы. Гурт удысъя но сиён-юонъя министр Ольга Абрамова пусъемъя, ӝыны ар куспын поттэмын 25,1 миллиард манет тыр продукция. Кылем арысь та вакытэн ӵошатыса, со 3,4 процентлы уногес. Гурт предприятиослэн выручказы 8,7 миллиард манет люкаськиз — со 22 процентлы тросгес. Кие кылись чылкыт барыш (производстволэн рентабельностез ) 11 процент луиз.
Гуртоос дорозь 1,5 миллиард манет субсидиос вуттэмын ни. Ольга Абрамова пусъемъя, котькуд кизем гектарез лыдъяно ке, со гектарлы быдэ 1,7 сюрс манет луэ. Со дыре ик чырмыт ужась ёросъёслы юрттэт эшшо но бадӟымгес вуэмын, куд-огъёсаз со 2,5 пол будӥз. Кылсярысь, Вавож ёросын со шоро-куспо лыдпусэн ӵошатыса, 224 процент люкаськиз, Шаркан ёросын — 207 процент, Красногорск ёросын — 198 процент. Вавожъёс йӧл поттонын берло аръёс ӵоже ялан азьпалан возисько. Ӝыны ар куспын ог 34 сюрс тонна йӧл сётӥзы ни. Таослэсь ӧжыт гинэ бере кылё шарканъёс — 32 сюрс тонналэсь уногес йӧл кыскизы.
Йӧл кысконъя Удмуртия туннэ Приволжск федерал округын 2-тӥ интыын. Азьпалан — Киров улос. Бускельёсмы туэ йӧл поттонзэс 6 процентлы йылтӥзы. Асьмелэн 4,6 процентлы будӥз. Но йӧл поттонэз гинэ йылтоно ӧвӧл, шуиз Ольга Викторовна. Трос ӧръёсты азинтыны луоно. Министр пусъемъя, сӥль поттон, чорыг будэтон, муш вордон, кеч возён удысъёслы бадӟым саклык висъяськоз 2020-тӥ арысен. Та ӧръёс Удмуртиысь хозяйствоосты азинтонъя программаын нимысьтыз инты басьтозы, соослы ватсаса ог 140 миллион манет субсидия висъяськоз. Кылсярысь, экспортэн вырыны сертификат басьтон понна 50 процентсэ кисьтэм уксёзэс мушкасьёслы берыктыны медо. 2020-тӥ арын чакламын 600 тонна чечы кыскыны. Ӟеч выжыысь пудо басьтэм понна коньдонэн юрттэт вуоз. 2022-тӥ арозь 825 скал басьтыны чакламын. Ӟеч выжыысь кеч басьтэмъёслы кисьтэм уксёзы пӧлысь котькуд йырлы 30 процентсэ берыктыны чакламын.
Со сяна, кылдоз технологиосты но техникаез выльдонлы сӥзем нимысьтыз кун программа. Со юрттоз технопаркмес выльдыны. Туэ куспын 1,1 миллиард манет тыр 444 техника гуртоос бастӥзы ни. Но та тырмыт ӧвӧл на. Техника вужмемын — тупатъяса толыкез уг луы. Ог 60 процентэз воксё но 10 арлэсь но пересь — бусые потэмзылы быдэ тӥясько. Сыӵе техникаен трос тысь но, пудо сиён но уд люка. Ольга
Абрамова пусъемъя, 3 сюрс 600 трактор, 350 ю-нянь калтон комбайн, 190 пудо сиён дасян комбайн туннэ ик кулэ.

Фермеръёслэн юанъёсчсы трос люкаськемын
Фото: Гурт удысъя но сиён-юонъя министерство

Экспортлы ужано

Ӟырдыт вераськон пӧрмиз фермеръёслы юрттэт сётон, кооперациос кылдытон, экспортэн вырон сярысь. Уло возьматӥз: министерствоен радъям «Мон — фермер» дышетонъя семинаръёс котыразы гуртын ужаны мылкыд карисьёсты бугыртӥзы. 300-лэсь ятыр фермеръёслы со аспӧртэм школа луиз — таӵеез шаерамы ӧй вал на. Курсъёс ортчем бере 81 адями аслэсьтыз ужзэ усьтыны кариськиз. Ольга Викторовна пусъемъя, тужгес ӟеч проектъёсты улонэ пыӵатыны но ужась фермеръёслы азинскыны туэ 253 миллион манет грант висъяськоз.
Кунгож сьӧры но нырысетӥ вамышъёс лэсьтэмын. «Милком» огазеяськон Китае йӧллэсь лэсьтэм сиён-юонзэ келяны кутскиз. Туннэ экспортэн вырыны мылкыд карись предприятиос реестре пыртэмын. Бадӟымесь проектъёс вань. Кылсярысь, етӥнэн, чечыен, рапс вӧйын, куасьтэм бакча сиёнэн (вегенсы) вуз карон. Китайын ик туж синмасько курег пыдъёслы — кунгож сьӧрын со деликатес луэ. Соин ик та ӧрез но паськытатыны, огкылъёсын юнматыны малпанъёс вань. Валтӥсь ужпум — матысь дыре экспортэз 2,5 поллы будэтоно. Туэ ӝыны ар ӵоже кунсьӧрен вуз карыса поттэм уксё 1,320 миллион доллар люкаськиз. Кылсярысь, 2024-тӥ арозь 4,5 миллион доллар экспортэн поттыны чакламын. Отӥяз эшшо тросгес луоз, шуэ министр.

— Али асьмеос пичи вамышъёсын мынӥськом ай. Ӝоглыкез будэтоно. Туннэ асьмеос экспортлы тырмыт продукция поттыны умгес быгатӥське на. Югдурез тупатон понна али кенешиськомы экспортной кооператив кылдытыны. Кӧня ке предприятиос валче кариськыса ужазы ке, троссэ проектъёсты вормыны луоз, — шуиз Ольга Абрамова.
Но предприятиос понна кунгож сьӧры потон туж дуно усе. Сертификат лэсьтон-басьтон ик капчи ӧвӧл. Рыноке сюрес утчаны но секыт. Экспортлы ужась хозяйствоослы йӧл понна субсидия тросгес висъяськысал ке, соку трослы капчигес луысал, шуизы гуртоос. Но туннэ нимысьтыз кинэ ке висъяны шуг — йӧл угось заводъёсын одӥг «пуртые» люкаське. Соин ик экспортлы ужаны мар карыны кулэ шуыса вань ӵектонъёсты министерствоын люкалозы, соосъя юрттэтэз чаклалозы.
Кунгож сьӧрысь рыноке потон вылысь Правительстволэн Тӧроезлэн воштӥсез Александр Свинин гуртоослы ӵектӥз вазиськыны Удмуртысь Экспортэз азинтонъя центре. Со верамъя, центр 3-тӥ арзэ ни Россиысь Экономикая министерстволэн чакламезъя 10 устоосыз центръёс пӧлы пыре. Ми дась юрттыны, шуиз Александр Свинин.

Елена Сараматова

Ангелина Снигирева
By Ангелина Снигирева Август 7, 2019 16:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<