Учконэз воштэ адӟытон

Ангелина Снигирева
By Ангелина Снигирева Август 14, 2019 15:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

9-тӥ-10-тӥ гудырикошконэ Ижын радъяськиз «Agro.Pro-2019» агрофестиваль. Кужмо но туала техникаен но туала технологиосын адӟытон ортчиз дышетон но шулдыръяськон выллем.

Адӟытонын пӧртэм туала техника возьматэмын вал
Фото: Гурт удысъя но сиён-юонъя министерстволэн пресс-службаез

Азьвыл аръёсы таӵе адӟытонъёс шаерысьтымы кудаз ке хозяйстволэн бусыяз ортчыло вал. Таяз радэ сое городын улӥсьёслы но матэгес каризы. Соин но адӟытонэ семьяосын-семьяосын лыктылӥзы. Нылпиос Татарстан, Башкортостан, Киров, Пермь палась вуттэм туала машинаос, тракторъёс вылысь ӧз ик васькаллялэ. Куноослы радъяськизы пӧртэм вожвылъяськонъёс. Нош хозяйствоосысь специалистъёс тодматскизы скал кыскон роботъёсын, бусы утялтон агрегатъёсын, будосъёсты утёнъя технологиосын.
Алнаш ёросысь «Молодая гвардия» хозяйствоен кивалтӥсь Михаил Крылов пусъемъя, таӵе адӟытонъёс, семинаръёс дунне шоры учконэз вошто: созэ но, тазэ но пыӵатэм потыны кутске. Уката ик хозяйство али ферма пуктэ бере, туала тӥрлык отчы вуттоно. Возьматон ӧй луысал ке, пӧртэм улосъёстӥ утчаськыса ветлоно луысал, нош татын огкылъёс татын гожтыны гинэ на кыле, шуэ М. Крылов.
Валче ужанъя огкыл юнмато улосъёс но. Кылсярысь, Кировысь трактор бичанъя заводэн табере ужаломы: татысь техникаез Ижысь гурт удысъя академие но училищеосы студентъёслы ваёзы.
Адӟытон выль луонлык усьтэ гуртоослы но. Татчы соос асьсэ киын будэтэм бакча сиён, чечы потто. Михаил Редькин чечызэ Сьӧлта ёросысь Кейлуд гуртысь Иже вуттэм. Таӵе адӟытонъёс дыръя басьтӥсь коть сюре, мукет дыръя вузаськыны секыт — магазинъёс шуныт палъёсысь дунтэм чечыен тырмемын, шуэ. Кияса ёросысь Первомайское гуртысь Дарья Овсянникова но шумпотэмын. Ваньмон дыръяз 6 арзэ ни со будэтэм чеснокеныз вуз каре. Гужем ӵоже 1,5 тонна чеснок будэтэ. Котыраз выронэз но трос ӧвӧл, уксё но поттыны луэ, шуэ. Кияса ёросын соослэн семьязы гинэ чеснокен выре. Табере асьсэлэн басьяськисьёссы кылдӥзы ни.

Ужрадэз шулдыртӥзы коллективъёс
Фото: Гурт удысъя но сиён-юонъя министерстволэн пресс-службаез

Калык паймыса ик веръяз куасьтэм бакча сиёнъёсты. Зэмен ик ческыт. Таин вырись предприятилэн огез кылдытӥсез Валерия Соковикова пусъемъя, куасьтэм бакча емыш — вегенссы — али кошке Казахстанэ. Огкыл юнматыны выро Китаен, Польшаен, Чехиен, Белоруссиен но мукетъёсыныз. Куасьтэм картошкалы, гордкушманлы, кешырлы, сяртчылы, сельдерейлы отын синмаськисьёс трос. Сырьёмы гинэ уг тырмы. Соин ик предприятие туж возьма фермеръёсты.
Та адӟытон одӥг нылпилэсь ке но сюлэмзэ гурт удыс пала берыктӥз ке, хозяйствоос асьсэлы оскымон завод бырйизы ке, со вормон луоз ни, шуэ Гурт удысъя но сиён-юонъя министр Ольга Абрамова.

Елена Сараматова

Ангелина Снигирева
By Ангелина Снигирева Август 14, 2019 15:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<