Уйпал полюсысен Китаёзь

Ангелина Снигирева
By Ангелина Снигирева 8 августа, 2019 16:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Владимир МАКСИМОВ — паймымон адями. Со спортсмен но, путешественник но, шаерчи но, туспуктылӥсь но. Владимир Тихонович 8 пол пыртэмын дуннеысь рекордъёсъя Гиннесслэн но Россиысь рекордъёсъя «Диво» книгаосы. Дуннеез котыръяны яратэмез понна сое тодмо путешественникен Фёдор Конюховен ӵошато. Нош ачиз сярысь со шуэ: мон улонэз яратӥсь адями. Кыӵе эшшо яратонъёсыз Владимир Тихоновичлэн?

В. Максимов

— Владимир Тихонович, кытысь сомында кужым пушкады улэ?

— Мыным котьмар тунсыко потэ, соин, дыр. Улонам трос яратонъёсы… Нырысетӥ яратонэ — география. Вордӥськемын мон Кез ёросысь Бани гуртын. Коркамы огшоры гинэ вал, пушкыз коръёслэсь, обойёстэк. Со понна борддоре ошемын вал дуннелэн картаез. Анае школаын географилы дышетӥз уго. Озьы мон, пичи маке, лыдӟиськыны, гожъяськыны но уг быгатӥськы вал ай, нош бадӟым городъёсты, шуръёсты, гурезьёсты тодӥсько, картаысь возьматӥсько вал ини. Та яратонэ ик дуннеез усьтыны юрттӥз.

Кыкетӥ яратонэ — спорт. Балезиноын улыкумы, 5 аресам, атае нырысьсэ монэ стадионэ вайиз: озьы футбол сярысь тодӥ. Со дырысен футболъя, волейболъя, баскетболъя, хоккейя «Спартак» командалэн висисез луисько. 3-тӥ классын улыны выжимы Кез ёросысь Чупчи станцие. Татысь пиналъёсты футболэн шудыны дышетӥ, шуыны луоз. Гуртысь пияшъёсын, ӟенелик бичаса, туп басьтӥмы. Татысен ик физкультураен эшъяськи: пыдын, куасэн, конькиен бызьылыны ӧдъяй. Атае мыным коньки басьтӥз. Ваньзы, конькиез гын сапег вылэ керттылыса, нискылазы, мон куас ботинка вылэ юнматъяй. Озьы школаын ваньмызлэсь ӝог нискылай. Чупчиысь но Кез ёросысь пиналъёс пӧлын конькиен, куасэн, пыдын бызьылыса вормылӥ, 9-тӥ классын куасэн бызьылонъя 1-тӥ разряд басьтӥ ни.

Ӵыжы-выжыосы пӧлысь Ижкаре мон нырысь ик лыктӥ. Дышетскыны пыри Удмурт пединститутысь географияя факультетэ. Соку отын спортъя кужмо команда вал, спортфакысь пияшъёсын оградын ӵошатскимы. Армие спортивной ротае кутӥзы, службае Дальний Востокын ортчиз. Ӵошатсконъёсын быдэс Сибирез ортчи. Ротамы туж адӟем карымон вал, отысь потӥзы 2 олимпийской чемпионъёс: штангист Виктор Куренцов но хоккеист Геннадий Цыганков. Шуыны луоз: спортлы луыса трос городъёсын тодматскыны кылдӥз.

Пичи вакыт

Армия бере кытын гинэ ӧй ужа: лэсьтӥськонъя 18-тӥ трестын куасэн бызьылонъя тренер вал, берло фотограф луыса тырши, тылпу кысӥсь но вал. Но котькытын эшъяськи таза улонэн, «Урожай», «Буревестник», «Труд», «Динамо» спорт огазеяськонъёсы ветлӥ. Быдэс Совето Союзэтӥ ортчимы, кунгож сьӧры но потамы.

— Тӥ 8 пол экспедициосы ветлӥды, ваньмыз со рекордъёсъя Гиннесслэн но Россиысь «Дива» книгаосы пыртэмын.

— Вань та экспедициос герӟаськемын ӟар-ӟар кезьыт вуын уянэн, дунне вылын соос нырысьсэ ортчемын, туннэ но нокин выльысен со сюресъёсъя ӧз ортчы на. Ветлӥ «Путями великих миграций человечества» экспедицие. Отчы быдэс дуннеысь адямиос, тодосчиос, географъёс, спортсменъёс пыриськизы. Экспедиция Гималайысен кутскиз, ортчиз Китаетӥ, Алтаетӥ, Беринглэн проливетӥз, Чукоткаетӥ, Аляскаетӥ. Ужрад калыкъёсын, соослэн сям-йылолъёсынызы гер-ӟаськемын, культураез утён но азинтон вылысь радъямын вал. Милям группамы, отын пӧртэм кунъёсысь адямиос вал, 1991-тӥ арын ужаз Монголиын. Ми, Совето Союзысь лыктэмъёс, калыкмылэсь кезьытэз чиданы быгатэмзэ монголъёслы возьматыны кенешимы. Пумиськон толалтэ ортчиз. Люкмес корамы. Кин Тол бабай, кин Лымы ныл, кин Нептун дӥсяськыса, люкмесэ тэтчамы. Удмуртиысь ми 2 кузя вал: мон но Роман Кудряшов. Мон люкмесэ, гурезьысь нискылскыса, куасэн тэтчи. 25 метрез куасэным ик уяй, солэсь азьвыл тазьы нокин ӧз лэсьты вал на. Нош Роман — велосипедэн. Экспедицилэсь азьвыл гинэ лыдӟи вал Владимир Чуковлэн кивалтэмез улсын Уйпал полюсэтӥ йӧ вылтӥ Канадае ортчем группа сярысь. Командаысьтыз одӥгез адями куасэныз ик ву улэ кошкем. Мон возьматӥ, кезьыт вуысь куасэн но потыны луэ шуыса.

«Путями великих миграций человечества» экспедицилы дасяськон. Пӧлазы А. Анарбаев (паллянысен нырысетӥез) — Мехикоывн ортчем Олимпийской шудонъёсысь азвесь призёр.

Экспедициосын кытчы гинэ ӧм вуылэ. 26-тӥ июле Байкалын ву 6 градус гинэ шуныт вал. Осиновка дорысен Листвянкаозь — 46 иськемез — 17 час ӵоже выжимы. Котькуд адями, 48 мурт, аслэсьтыз этапсэ ӝыны час ӵоже уяса, ортчиз.

Одӥгез эскеронмы радъяськиз Уйпал Ледовитой океанын: тодоно вал, кӧня дыр ӵоже адями чиданы быгатэ кезьыт вуын. Мон 2 градуслэсь кезьыт вуэ 3 минут но 13 секундлы чукынскылӥ, Москваысь Андрей Хитров 10 минут 40 секунд возиськиз, нош Люда Бурякова — 5 секундлы кемагес. Эшшо кӧня ке муртлы мукет быгатонъёссэ возьматоно вал: 5 минут кезьыт вуын улоно, собере потоно но, 15 минут шунскыса, выльысь кезьыт вуэ пыроно. Эмчиос уг тодо вал, кызьы адямилэн мугорыз таӵе кезьытын ассэ возёз.

Ми Киргизиысь Иссык-Куль тыын но вал. Сое вамен — 78 иськем — уяса выжимы, ортчимы кузяназ но — 189 иськем. Иссык-Куль ноку уг кынмылы ке но, сӥзьыл отын ву 9 градус гинэ вал. Уямы Беринглэн проливетӥз. Август толэзе отын йӧос кошкемысь дугдо ини, ву 4-8 градус гинэ. Петропавловск-Камчатский город дорысен Ратмановлэн шормуӵозяз 72 иськем ортчимы. Со бере Аляска кутске ни, ӵапак та интыын нунал воштӥське. Отын туннэ нуналысь толоназ яке туннэысь вуонояз сюрыны луэ.

Уйпал полюсын экспедициын

1992-тӥ арын Ижын ортчытыны быгатӥм кезьыт вуын уянъя калыккуспо ӵошатскон. Ужрад октябрь толэзе вал. Ижкаре быдэс Совето Союзысь, Германиысь но Югославиысь спортсменъёс вуизы. Удмуртиысь командамы Москваысь спортсменъёслы гинэ келяз.

Берпуметӥзэ кезьыт вуын уянэ пыриськи 1995-тӥ арын. Находкаысен Владивостокозь 183 иськемез 3 сутка куспын ортчимы. Ог 70 спортсменъёс сое эстафета амалэн уязы.

Кезьыт вуын ӵошатсконъёслы пум вуиз 2013-тӥ арын Владимир Гребёнкин улонысь кошкем бере. Шуо, воштонтэм адямиос ӧвӧл. Но та веран котькуд учырлы уг тупа. Тани Владимир Гребёнкинэз нокин уз вошты ни. Солэн дышетскисьёсыз туннэ обороная министрлэн С. Шойгулэн воштӥсьёсыз луыса ужало. Та воргорон понна ворсам ӧсъёс ӧй вал, со ужаз 11 научно-исследовательской университетъёсын, ми МЧС-лэн вертолётъёсыныз экспедициосы поталлямы. Эскеронъёсы пыриськон, наукалы пайда ваён мылкыдмы бадӟым вал. Ма, асьмелэсь кужыммес, быгатонлыкмес эскерон, азяд бадӟым ужпумъёс пуктон но соосты быдэстон понна но ӵошатсконъёсы пыриськылӥм.

— Кызьы тӥ морж луиды?

— Моржъёс кезьыт вуын кема ик уг уло, кыдёке уг уяло. Нош ми асьмедыз тӧдьы гондыръёс шуиськом. Та пӧйшуръёс кыдёке но кема уяло. Уйпал Ледовитой океанысь огназ уясь гондырез пумитаны луэ. Ми тол марафон уянэн выримы — ӟар-ӟар кезьыт вуын ӝыны час пала но ортчытӥськом вал. Дасяськымтэ мурт кезьыт вуын кӧня ке минут гинэ улыны чидалоз. Норвегиысь тодмо путешественник Фритьоф Нансен шуиз вал : «Кезьытлы дышыны уг луы, сое чиданы гинэ кулэ».

Кезьыт вуэн мон нырысьсэ тодматски 3 арескам. Гурезь йылысен куасэн нискылскыса, шуре пыри, сапегъёсме коттӥ. Нош зэмзэ верано ке, «Динамо» спортивной огазеяськон понна бызьылыкум, нырысьсэ пыриськи Тартуын ортчем триатлонъя вожвылъяськонэ. Со вакытэ, 1986-тӥ аръёсы, та амал соку гинэ калык пӧлы вӧлмыны ӧдъяз. Та ужрадысен тодматски туж тунсыко адямиен — Владимир Гребёнкинэн. Владимир Степанович Москваысь М. Фрунзе нимо военной академиысь дышетӥсь, полковник вал. Тренировка дыръя со ӵектӥз Балтийской зарезьын пыласькыны. Вуэ пыреммы бере ялан юалляз, уг кынмиськы-а шуыса. Кезьыт ӧвӧл, шуисько. Озьы 700 метрез уямы. Нош ву 17 градус гинэ вал. Бӧрысь Владимир Степанович валэктӥз: со улонзэ сӥзиз кынмем бере шунтӥськон методика кылдытонлы. Со юрттысал, пе, солдатъёслы кезьытэз чиданы. Угось котькыӵе ӟеч техника мед луоз, кезьыт ву 15 минут куспын солдатъёсты погыртэ. Озьы В. Гребёнкин Марафон уянъя ассоциация кылдытӥз. Отысь спасательёслэн службаенызы кивалтыны, котырамы адямиосты люканы мыным оскизы. Ми научной эскеронъёсты быдэстыны юрттӥм, ӟар-ӟар кезьыт вуын пӧртэм вожвылъяськонъёс ортчытъяса. Отчы пыриськылӥзы быдэс дуннеысь адямиос, Удмуртиысь но ог 10 мурт вал.

Кезьыт лымыын пыласькон

— Тӥляд дуннеез котыръямдылы вожъяськыны гинэ луэ: Совето Союзэз вератэк, ветлӥды Уйпал полюсэ, адӟиды Европаысь, Азиысь трос кунъёсты. Кытчы ветлытэк кылиды, кытчы мынысалды на?

— Зэм, спортлы луыса быдэс дуннеез адӟи, трос ӟеч но тунсыко адямиосын пумиськылӥ. Тодматски Арктикаез но Антарктикаез эскерисен Артур Чилингаровен, Фёдор Конюхов путешественникен, солэн шоретӥ братэныз Павел Конюховен. Со монэ Оймяконозь велосипедэн мыныны ӧте вал, но ӧз пӧрмы. Туж потэ на вал Лымшор полюсэ — Антарктидае — ветлэме.

— «ФотоКто» сайтын 1 сюрс 300 пала туспуктэмъёсты поттэмын. Соосты вылӥ дунъяло профессионалъёс. Ужъёсыныды 32 пол адӟытонъёс радъяды. Кызьы улонады кылдӥз фотография?

— Зэмзэ вераса, калыклы возьыт ӧвӧл возьматыны 30 сюрслэсь ятыр туспуктэмъёсме. 7-тӥ классын дышетскыкум, школаямы усьтӥзы фотографияя кружок, со луиз эшшо одӥгез яратонэ. 2 арлы мынэсьтым бадӟымгес Юра Зыков, пионер лагере ветлыса, та выль удыслы дышетскем, физикая дышетӥсенымы Виталий Мосовен ӵош соос нылпиосты фотографиен тодматыны малпазы. Атае бухгалтер вал, пиналъёсы номырлы медаз ёрме шуыса, тыршылӥз. Озьы мынам нырысетӥ туспуктон аппаратэ кылдӥз — «Зоркий-С». Со огшоры «Смена», «Любитель» кадь гинэ ӧй вал — со вакытэ одӥгез устоез, дуноез вал. Мон ачим солы плёнка басьтылӥ, ӟенелик люкаса. Зэм, атаелэн кузьымез туннэ Иж тымет пыдсын кылле. 1969-тӥ арын морской многоборье вал. Спортсменъёс уязы, пыдын бызьылӥзы, ыбылӥськизы, парусникъёсын уязы. Озьы одӥг пол командамы мачтаын туспуксьыны малпаз. Но шӧдтэк шорысь тӧл зол пельтӥз, пыжмы чукинскиз, кинлэн маиз вал, тыметэ усьылӥз.

Али кытчы гинэ уг мынӥськы, фотоаппаратме котьку сьӧрам басьтӥсько. Ачим спортэз гажасько бере, тужгес кельше бызьылӥсь, тэтчась, уясь муртъёсты туспуктыны. Мынэсьтым юало, кызьы быгатӥськод адямилэсь ӵошатскон вакытаз мылкыдзэ шедьтыны? Ӟеч адямиос дышетӥзы, шуисько. Нырысьсэ фотографиосме 1976-тӥ арын «Удмуртская правда» газетэ вайи. Соку отын ответственной секретарь луыса Виталий Корепанов (Герман Корепанов композиторлэн братэз) ужа вал. Со индылӥз, кыӵе суредъёсты возьмало газет бамъёсын. Эшшо кусып возьылӥ «Комсомолец Удмуртии», Москваысь пӧртэм газетъёсын, «Лёгкая атлетика», «Горный бег», «Лыжный спорт» журналъёсын. Али ужъёсме ӵемысь курылэ «Кенеш» журнал. Луисько Россиысь Журналистъёслэн огазеяськонзылэн ёзчиез.

Кӧня ке ар ӵоже ни Ижысь 23 номеро библиотекаын вань мылкыд карисьёс понна фотография лэсьтонъя кружок нуисько. Берло дыре туспуктылыны яратӥсьёс трос луизы, ваньзылэн историе кылемзы потэ.

Кузпалыныз Ольга Вячеславовнаен

Фотографиосыным адӟытонъёс трос пол радъялляй. Берлоез, 32-тӥез, ортчиз «Удмурт дунне» газетын. «Вечерний Ижевск» адӟытонам люкамын вал городлэн ӝыт тылъёсын тусыз. Ужрадэ вуизы тодмоосы, эшъёсы. Али Владимир Михайлов журналистлэн, кылбурчилэн чуръёсыныз фотоальбом дасяськом. Ижысь зоопарклэн 10 ар тырмонэзлы сӥзьыса, фотоальбом лэсьтӥмы. Ужасько на Монголия сярысь бичет поттон бордын. Отын та кун сярысь тодэ ваёнъёсы, мылкыдъёсы гожтэмын, бордазы туспуктэмъёсы ватсамын. Али выльысь берытскысал отчы, мукет сямен фотое пуктысал азьвыл ортчем интыосты.

— Тодӥсько, выжыдэс утчанэн но выриськоды…

— Арлыд люкаськемъя выжыосыд борды кыстӥськыны кутскиськод. Мыным но тунсыко потӥз выжы писпуме тодыны. Озьы атае ласянь 1693-тӥ арозь ӵыжы-выжыосме шедьтӥ, анае — Поскрёбышевъёс ласянь — 1713-тӥ арозь.

Люканы кутски Бани вордӥськем гуртмылэсь историзэ но. Нырысь-валысь лыдъяське вал, гурт крепостной праволэсь куштӥськем дыръягес — 1861-тӥ аръёсы — кылдӥз шуыса. Но архивъёсысь тодмо луиз: гуртмы сярысь пусъемъёс вань 1811-тӥ арын. Архивъёсын бугыръяськыса, Бани гурт эшшо но пересьгес шуыса тодӥ — 1807-тӥ арын кылдэмын.

Гуртмы пыр ас вакытаз декабристъёс но 2 эксэйёс ортчиллям — Александр I но Александр II. Баниын почтовой станция вылэм, отын сюресчиос валъёссэс воштылӥллям. Атаея песятае ямщик вылэм, солэн 3 тяжеловозэз но почта нуллӥсь валъёсыз вылӥллям. Кӧня ке ар талэсь азьло Бани гуртысь одӥг семья дорысь вал дагаез шедьтӥ, со вашкала даурысен утиськемын. Сое табере Кез ёросысь музейысь адӟыны луэ.

— Кез ёросысь Бани гуртын ик вордӥськиз Олег Поскрёбышев. Кылбурчи ӵыжы-выжыды уг луы-а?

О. Поскрёбышев кылбурчиен

— Ми соин матысь ӵыжы-выжыос луиськомы, со анаелэн братэз. Нялтас вераса, О. Поскрёбышевлэн кылбуръёсыныз «Нет края, чтоб стал мне милей и теплей» бичет дасяй. Сое поттыны мылкыды бугырскиз, О. Поскрёбышевлэсь кылбуръёссэ лыдӟыса. Угось чуръёссэ лыдӟиськод но ӵапак отын гожтэмлы тупась фотографие син азям пуксе.

— Улонды ялан сюрес вылын ортчиз, семьяды тӥледыз валаз-а?

— Семьяе — эшшо одӥгез яратонэ. Ольга Вячеславовна — 2-тӥ кузпалы, ми соин 40 ар ӵошен ни, сомында со монэ чида ни. Со туж лякыт нылкышно. Ӵошатсконэ мыноно шуыса, кошкемелэсь 1 нуналлы азьлапал гинэ ивортӥсько ке но вал, со ноку ӧз пыкылы. Мон понна шумпотылӥз. Кузпалы пӧртэм интыосын ужаз, берло аръёссэ нылпи садын тыршиз.

Нырысетӥ кузпалыным 2 ныл вордӥмы. Одӥгез Удмурт кун университетэз йылпумъяз, журналистлы дышетскиз, кыкетӥез исторической факультетын тодон-валан люказ. Ольга Вячеславовналэсь пизэ но аслэсьтым кадь будэтӥ. Со пӧраськись, монэным ӵош Монголие экспедицие но ветлӥз. Внуке, правнуке вань ини. Правнукелы 3 арес. Али со пичигес ай, но вуоно арын, малпасько, инкуазе сяськаосты, бубылиосты туспуктыны потом ини. Солы фотоаппарат дасяй ни. Коллекциям ог 18 туспуктылон аппарат люкаськемын.

Ангелина Снигирёва

Туспуктэмъёсыз геройлэн архивысьтыз

Ангелина Снигирева
By Ангелина Снигирева 8 августа, 2019 16:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<