Ужаса шаермылэсь туссэ вошто

Ангелина Снигирева
By Ангелина Снигирева Август 15, 2019 15:54

11-тӥ августэ Россиын пусйизы Лэсьтӥськисьлэсь нуналзэ. Элькунысьтымы лэсьтӥськон удысысь устооссэ ужасьёсты но компаниосты данъязы Ижысь «Аксион» культурая дворецын.

С. Кирилловез данъян
Фото: udmurt.ru

Выль но выльдэм юртъёс

Лэсьтӥськисьёсты праздникенызы ӟечкыласа, Удмуртилэн Тӧроез Александр Бречалов пусйиз: лэсьтӥськонын югдур возьматэ экономикалэсь макем зол азинскемзэ. Кылем арен ӵошатыса, туэ шаерамы пуктӥськонлы но капитальной ремонтлы инвестициослэн быдӟалазы 2 но ӝынылы будӥз: 3 миллиард манетысен 8 миллиардозь.

А. Бречалов мадиз, кызьы элькунамы быдэстӥське «Бадӟым ремонт» проект. Рос-прос тупатъяны чакламын ог 700 учреждениосты, пӧлазы 485-ез — школаос но нылпи садъёс. Азьвыл 5 ар ӵоже быдэстэм ужен ӵошатыса, туэ 30 процентлы тросгес дышетскон юртъёсты тупатозы. Со сяна, выльдӥсько больницаос, гуртъёсысь культурая юртъёс, ФАП-ёс, спортэн вырон интыос. Ремонтэз быдэсто ог 3 сюрс ужасьёс.

Выль юртъёс но пуктӥсько. 2019-тӥ арын нацпроектъёс улсын республикалы оглом висъямын 17 миллиард манет, лэсьтӥське 4 школа, 27 ясли, Воткинскын йӧ дворец пукто, Шарканын — куасэн бызьылонъя центр, больницаослы ӵыж-выль оборудование басьтӥське. Михаил Калашниковлэн вордскемез дырысен 100 ар тырмонэз пусъемен валче Ижысь Леваневскийлэн урамаз али пуктӥськись школалы конструкторлэсь нимзэ сётозы.

Таяз арын социальной объектъёс пуктыны, азбаръёсты но шутэтскон интыосты тупатъяны, куашкан калэ вуэм коркаосысь адямиосты мукет юртъёсы выжтыны 1 миллиард 300 миллион манетлэсь ятыр висъямын федерал но элькун бюджетъёсысь.

«Улон инты но городэз радъян» нацпроектлэн куремезъя 2024-тӥ арлы ар ӵоже элькунамы 998 сюрс квадрат метр улон инты лэсьтӥськыны кулэ. Туэ медо 732 сюрс квадрат метр быдэстыны. 2019-тӥ арын нырысетӥ палар ӵоже 417 сюрс 500 квадрат метр улон инты дасямын ини — та лыдпусъя элькунмы Приволжск федерал округын азьмынӥсьёс пӧлын луэ.

Кылбурась лэсьтӥськись

Тӧро ӟечкылаз, дунъетъёс но грамотаос сётъяз адӟем карымон компаниослы, ужысь ветеранъёслы, лэсьтӥськон удысын кема но ӟеч тыршисьёслы. Адямиослэсь улонзэс умойгес каремзы понна строительёслы тау каризы Кун Кенешлэн Тӧроез, Удмуртиысь но Россиысь дано строитель Александр Прасолов, Правительстволэн Тӧроезлэн воштӥсез Анастасия Муталенко (дышетскемезъя со инженер-строитель) но лэсьтӥськонъя, ЖКХ-я но энергетикая министр Дмитрий Сурнин.

Тӧро нимысьтыз пусйиз «Острова» компанилэсь гендиректорзэ Дмитрий Даниловез. Кылем арын Иж городлэн администрациез сьӧрын выль шутэтскон инты усьтӥськиз, сое та компания радъяз. А. Бречалов верамъя, та адӟем карымон учыр: городысь активистъёс, предпринимательёс ӵошен, карлэсь но элькунлэсь юрттэт курытэк, выль шутэтскон инты усьтӥзы, сое калыклы кельшымон каризы.

Бадӟым компаниосын валче А. Бречалов тау кариз ёросъёсысь предприятиослы — соос ёрос йыръёслэн но элькунлэн оскымон юрттӥськисьёссы луо. Тӧро награда сётӥз Алнаш ёросысь «Монтажник» предприятилэн директорезлы Сергей Кирилловлы (лыдӟисьёс сое тодо бардэз сямен). 2018-тӥ арын та предприятие секыт югдуре сюрем ёрослы лэсьтӥськонэз йылозяз-пумозяз вуттыны юрттӥз, озьы вань объектъёсты дыраз йылпумъязы.

Озьы ик пусъемын лэсьтӥськон удысын кема аръёс ӵоже ужам семья. Владимир Матвеев Людмила кышноеныз ӵош Ижысь лэсьтӥськон предприятиын 95 ар ӵоже ужаллям, нылпиоссы соослэн лёгем сюрестӥзы мыниллям, огъя стажзы — 118 ар люкаське. Владимир Николаевич кылбур лыдӟиз. Сое со, лэсьтӥсьисьёсты данъяса, гожтэм 1984-тӥ арын — ӵапак соку предприятизы Операя но балетъя театрез пуктэм, нош предприятизылы 50 ар тырмем.

Анастасия Шумилова

Ангелина Снигирева
By Ангелина Снигирева Август 15, 2019 15:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<