Удмурт сюанэз адӟозы быдэс Россиын

Ангелина Снигирева
By Ангелина Снигирева Август 20, 2019 17:40

Москваысь «Мир» телеканалысь журналистъёс Алнаш но Балезино ёросъёсы вуылыса, удмурт но бесерман сюанъё сярысь фильмъёс лэсьтӥзы.

Алнаш сюанысь люкет
Фото: Ю. Михайлова

Нырысь ик куноос Алнаш ёросысь Кучыран гуртын 3 нунал ӵоже удмурт сюанлэсь ортчемзэ гожтӥзы-адӟизы.
Ваньмыз зэмос вал, вашкала сюан дыръя сямен ик: сюанчиос, бӧрысьчиос, тӧро, пурысьтам бекче. Кузпалъяськизы Алнаш ёросысь Юлия но Николай Михайловъёс. Нылмурт дышетске Удмурт кун университетын, Николай — полицейской.

Юлия но Николай Михайловъёс
Фото: Ю. Михайлова

— Июль пумын сюанмес шудӥмы вал, кыкетӥ нуналзэ удмурт сямъя ортчытэммы потэ вал, но ӧз пӧрмы, — шуиз Юлия. — Арня пала ортчиз, ёрос администрациысь жингыртӥзы. Москваысь журналистъёс, пе, лыкто, удмурт сюан сярысь фильм лэсьтэмзы потэ. Ми соглаш кариським, сюанын 2-тӥ нуналзэ юмшаны малпанмы вал шуыса. Туж сюлмаським вал, кызьы пӧрмытом, шудыны быгатом меда, угось ми актёръёс ӧвӧл. Ох, секыт ик вылэм со уж. 3 нунал вазь ӵукнаысен бер ӝытозь съёмочной площадкаысь ӧм поталлялэ, кӧня ке дубль лэсьтоно луылӥз. Удмурт сюанлэсь ортчемзэ тодӥсько вал ке но, трос выльзэ, тунсыкозэ аслым усьтӥ. Табере данъяськиськом, удмурт калыклэсь сям-йылолзэ историе кельтӥм, быдэс Россия тыр адӟытӥм шуыса. Нылпиосмы луизы ке, соос но анай-атайзэс телевизорысь адӟозы, данъяськозы шуыса шумпотӥськом. Нош сюанмес кык полэс шудэммы кусыпъёсмес юнгес карозы, оскиськом.
Москвысь куноос тодматскизы Балезино ёросыс Юнды гуртысь бесерман калыклэн сюан сям-йылолэныз но.

Кен кураны мыно
Фото: Н. Сидорова

— Мыным «Любовь без границ» программалэн кивалтӥсез Ольга Хохлова гожтӥз, бесерманъёсты снимать каремзы потэ шуыса, — вераз Юндыысь клубен кивалтӥсь Надежда Сидорова. — Ми соглаш кариським. Валамон, сюан — со туж бадӟым сюлмаськон. Уката ик быдэс Россия тыр калыкедлэсь аспӧртэмлыксэс возьматэмед потэ ке. Кутскимы быдэс гуртэн дасяськыны. Эмеспи луиз та вакытэ Санкт-Петербургын военно-медицинской академиын дышетскись бесерман пияш Владимир Калинин, со ӵапак отпуске бертэмын вал. Выль кен — Яр педучилещеысь студент Дарья Казанцева. 3 нуналэз изьытэк ортчытӥм, шуыны луоз. Ваньзэ съёмкаослы дасяно, калык люкано. Черкогуртамы ялон ошим, сюанэ пыриськыны ӧтьыса. Бадӟым тау бесерман калыклэн огазеяськонэныз кивалтӥсьлы Сергей Антугановлы, со эмеспилэсь атайзэ шудӥз, 3 нунал ӵоже Глазовысь дорамы ветлылӥз.

Егитъёс
Фото: Н. Сидорова

Бадӟым тау Генриетта Бияновалы, со съёмочной группаез юртаз лэзьыны соглаш луиз. Эшшо номыр ӧз пӧрмысал Галина Бияноватэк, солэн но коркаяз сюан шудӥмы.
Москваысь куноос туж паймизы ми палъёсысь крезьёслы (кырӟанъёслы), таӵе сюлмысь потӥсь гуръёсты нокытысь кылэммы ӧй на вал, шуизы. Вашкала гуртъёсты сюан дыръя кырӟаз «Азвесь крезьёс» ансамбль.
Удмурт но бесерман сюанъёсты возьматозы «Мир» телеканалысь «Любовь без границ» передачаын октябрь толэзе.

Ангелина Снигирёва

Ангелина Снигирева
By Ангелина Снигирева Август 20, 2019 17:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<