Удмуртиын шахматъёсъя Россилэн чемпионатэзлэн Суперфиналъёсыз ортчо

Ангелина Снигирева
By Ангелина Снигирева Август 12, 2019 17:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртиын та нуналъёсы мыно шахматъёсъя Россилэн чемпионатэзлэн Суперфиналъёсыз. Шаерамы вуэмын кужмоосыз пӧлысь кужмоосыз 24 шахматистъёс. Соос асьме дорын Россилэн чемпионэз ним понна 23-тӥ августозь вожвылъяськозы.

Чемпионатэ пыриськись воргоронъёс
Фото: А. Поздеев

Шудонъёсты усьтон ортчиз 9-тӥ августэ П. Чайковскийлэн музеяз. Ӵошатсконэз ортчытонлы музей юнме шорысь бырйымтэ вал. Угось турнир азинтэ «Музейын шахмат» программаез но радъяське Россиысь Шахматъя федерациен но Елена но Геннадий Тимченкоослэн фондэнызы Удмуртиысь Правительстволэн юрттэмезъя.
Воткинске шудонъёсты усьтыны лыктӥзы Удмуртилэн Тӧроез Александр Бречалов, Елена но Геннадий Тимченкоослэн фондзылэн директорез Мария Морозова, Россиысь Шахматъя федерацилэсь быдэсъясь директорез Марк Глуховский.

Турнире пыриськись нылъес
Фото: А. Снигирева

— Воткинсклэн узыр историез, но татын ноку шахматъёсын герӟаськем табыдӟа ӵошатсконъёс. Котьку сямен бадӟым ужрадъёс калыклэсь тунсыксэс бугырто. Татын но озьы ик луоз шуыса, оскисько. Вожвылъяськонлы луыса шаерысьтымы эшшо но тросгес калык шахмат дуско сьӧры пуксёз, — вожвылъяськонэз усьтыса, — шуиз А. Бречалов.

— Шахмат но крезьгур ог-огенызы юн герӟаськемын. Ӧй вал, дыр, одӥг но тодмо крезьгурчи, гожъяськись, суредась кудӥз пичи ке но шахматэн ӧз шудылы, — вераз Шахматъя федерацилэн быдэсъясь директорез Марк Глуховский. — Нимо-дано крезьгурчиос Д. Шостакович, С. Прокофьев, Д. Ойстрах тодмо на шахматэн шудыны быгатэменызы но.
Музейын но крезьгур шахматэн огазе луизы кадь. Пианино сьӧрын шудӥзы шаерысьтымы быгатӥсь егитъёс, музейлэн азбараз шахмат шудонъёслэсь фигураосыз ӝужазы.
Шудонъёсын кужымзэс мертало 12 воргорон но 12 нылкышно, ваньзы сямен гроссмейстеръёс – со шахматын вылӥ вормонэн лыдъяське.

Александра Горячкина
Фото: А. Снигирева


Александра Горячкиналы 20 арес гинэ, но вормонъёсыныз шыкысэз туж узыр, со Россилэн 2 пол чемпионкаез ни.
Александра дуско сьӧры 7 арысен пуксиз, профессионалъёс пӧлын кужымзэ мертаны кутскиз ни 10 аресын. Атаез шахматъя тренер, анаез — шахматъя мастере кандидат. Соин но нылаш кема ӧз малпаськы, кыӵе удыс солы тунсыко.
Одӥгез кужмоез спортсмен Самарысь Евгений Тимашевский понна таиз 11-тӥ Суперфинал ни.

Евгений Тимашевский
Фото: А. Снигирева

— Мон татчы ӵошатсконъёсты усьтӥськонлэсь одӥг нуналлы азьлапал лыктӥ, городэн тодматскыса вуттӥ ни, — мылкыдзэ вераз егит мурт. — Татысь омырен куке но шоказ, бӧрысь кужмо произведениоссэ гожтӥз Пётр Чайковский нимо-дано композитор. Нош шахматэн шудон но творчество выллем. Оскисько, таӵе интыын тунсыко но яркыт турнир пӧрмыны кулэ.
Евгений вераз Удмуртие со нырысьсэ уг лыкты ни. Со сяна, кузпалызлэн эшез Ижысь, пе. Соин Удмуртиын шахматлэн азинскеменыз тодмо. Нялтас, спортсмен пусйиз на. Самараын но быдэс Россиын та спорт амал калык пӧлын зол вӧлмемын шуыса.

— Али нылпи турниръёсы сомында пиналъёс пырисько, кӧня мон кутскыку, пичиос бордысен 80 аресозь арлыдоос дорозь адями люкаське вал. Оло, та выллем турниръёслы луыса но калык шахматэ кыстӥськыны кутске, — пусйиз Е. Тимашевский.
Шудонъёс 9-тӥ-12-тӥ августэ Воткинскын радъясько, бӧрысь 13-тӥ-24-тӥ августэ соосты адӟыны луоз Ижысь Эшъяськон юртын. 18-тӥ августэ нимо-дано шахматистъёс пумиськозы та спорт амалэз гажась пиналъёсын но ветеранъёсын.
Турниръёслэсь ортчемзэс адӟыны быгатэ вань мылкыд карись.

Музей азбар воштиськиз
Фото: А. Поздеев

Ангелина Снигирёва

Ангелина Снигирева
By Ангелина Снигирева Август 12, 2019 17:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<