Тэтэ карись литература

Ангелина Снигирева
By Ангелина Снигирева Август 21, 2019 10:00

Сергей Матвеевлы — удмурт кылбурчилы но прозаиклы, «Удмуртия» издательствоысь редакторлы, Россиысь Писательёслэн союззылэн ёзчиезлы — туэ 7-тӥ гудырикошконэ 55 арес тырмиз. Сергей Васильевич удмурт литературалэсь воштӥськемзэ но чакласа возе.

— Сергей Васильевич, бордаз кыскыны быгатоз-а удмурт литература мукет калыкъёсты?

— Аслэсьтыдзэ веран понна, астэ чеберен возьматон понна мукет калыкъёслэсь культуразэс, искусствозэс нырысь ик ӟеч тодоно. Сое басьтыса, выжыосыд пыртӥ поттыса, творчествояд усьтыны быгатӥд ке, со быдэс дуннелы тунсыко потоз. Нобельлэсь литературной премиезлэсь лауреатъёссэ учконо ке, сое сётъяло асьсэлэсь культуразэс быдэс дуннелы валамон карем авторъёслы.

Мон котьку верасько, Габриэль Гарсия Маркеслэсь «Сто лет одиночества» книгазэ удмурт кылэ берыктӥ ке, со Латинской Америкаысь произведение уз ни луы, со удмурт луоз. Асьмеос калыкмылэн даурен люкам тодон-валанэз, опытэз пыр ваньмыз шоры учкиськом ук. Со туж пыдлон кылле но шуак пӧртэм учыръёсы потэ. Ӟучъёсын артэ улыса, соослэсь троссэ асэстӥськом, но удмуртъёс ик кылиськом. Удмуртъёс выллем калык ӧвӧл ини дунне вылын, соин ик асьмеос тунсыко луиськомы.

Мон ачим Запад шоры учкисько, малы ке шуоно дуннеез котыр ласянь тодоно. Нош басьтоно ке сямме, выросъёсме, кин луэмме — мон 100 процентъем удмурт луисько. Мон возьдаськись адями. Возьдаськемлэсь куштӥськыны турттӥськод но, номыр уг пӧрмы. Улонам мон комплексъёс пушкы выемын. Нош творчество — со сублимация, мон отын эрико. Озьы огдыре пушкам улэ творец но возьдаськись удмурт.

— Туала егит гожъяськисьёсты кызьы дунъяськоды?

— Семён Самсонов, Генрих Перевощиков, мукет бадӟым писательёс улонысь кошкизы но, сыӵе буш луиз кадь литература. Куке тетралогия гожъясь мурт кошке, тон со ыштонэз куэныд ик шӧдӥськод. Кышкыт вал: нош мар луоз азьланяз? Но ваньмыз тулкымъёсын луэ, шуо. Вал милям тулкыммы: мон, Пётр Захаров, Рафит Миннекузин — мынам ёзъёсы. Со бӧрсьы — нош ик буш. Но выльысен гожъяськисьёс кылдо. Мон валай, перспектива вань шуыса. «Кенеш» журналлэн литературной конкурсэз но тае возьматэ. Туж кельшиз, «кенешъёс» консерватизмысь йырзэс, луоысь страус кадь, поттӥзы но котырак учкизы шуыса. Соос егитъёсты авансом кадь бырйизы, соос асьсэлы мед оскозы, вуонояз золгес мед ужалозы шуыса.

Мон уг малпаськы, Мария Векшиналэн «Оӵ/ӧч кар» романэз классической роман шуыса. Мыным Виктор Шибанов литературоведлэн верамез кельшиз: автор кызьы нимаз ке произведенизэ, со, пе, озьы ик вань. Авторлэн сыӵе правоез вань. Маша умой кутскиз вал, но мон уг валаськы, мар понна со книга гожтэмын. Мон со сярысь малпаськыса улӥ. Но со умой ук, малпаськыны муг кылдӥз шуыса.

Дарали Лели туж чебер кылын гожъяське. Со шуиз вал «Зорнамер но Занна» романэз сярысь: сое, йылозяз-пумозяз вуттытэк, гожтыны луоно. Со но тунсыко. Солэн романаз развитиез но ӧвӧл кадь, но сое лыдӟем потэ. Озьы но гожъяськыны быгатыны кулэ, кылыныд бордад кыскыны.

Ваньзы юало, мар мон Богдан Анфиногенов сярысь малпасько. Туж со мыным кельше, туж тунсыко адями. Богдан удмурт культуралы пиар лэсьтэ, возьматэ сое, учкымон образъёс суреда. Солэн аслаз харизмаез вань. Но мукет ласянь, суро-пожо гожъяськемез монэ ӵабъя ик. Дарали Лели тани шуэ: туала егитъёс, пе, озьы верасько но гожъясько, соин, пе, со умой.

Туала егитъёс мыным туж кельшо, соос олокытчы но вутско. Дуннеысь маке выльзэ адӟыны но со ӧрын улыны быгато. Оломар но верало, но со пальккаськон кадь, со шукы ӝоген ортчоз, арлыдзы будэмен. Со дыре ик со тубатысь одӥгез лёгет луэ. Кытчы ке вуытозь, со сюресэз ортчоно, визь люкаса. Мон ачим эпатажез ортчи, «Шузи» роман сярысь ик верано ке.

— Нош мар кулэ кадь удмурт литературалы — вашкалаез чаклан яке утчаськон?

— Асьме доры ваньмыз бергес вуэ. Вуэ, куке вуытэк уг луы ини. Поэзиын но — даур ортчыса. Асьмеос мар ке выльзэ лэсьтыны турттӥськом, но ваньмыз вал ини.

Лев Гумилёвлэсь пассионарность сярысь теоризэ басьтоно ке, удмуртъёслэн тэтэ карон вакытсы ӧз на ортчы. Удмурт — оглом со пинал кадь на. Асьмелэн кыламы но туж трос междометиосмы, наречно-изобразительной кылъёс (дыбыр-шалтыр, огыр-бугыр, юр-яр но мукет).

Классика — со классика. Нобельлэсь премизэ басьтэм писательлэсь котьку одӥг ке но книгазэ лыдӟисько. Классической ӧрын гожъяськисьёслы ӵемгес сое сёто. Со дыре ик Г. Маркес магической реализм ӧрын гожъяськиз, Самюэль Беккет уйбыртон амалэз кутӥз — со модернизм. Со экспериментъёс дыр ортчемъя классикалы пӧрмо. Мон уг тодӥськы, кызьы удмурт литература азинскоз. Котьку вань анай-атайёс но нылпиос куспын конфликт. Кутскись авторъёс асьмелэсьсэ лэсьтӥськом шуо. Кӧня ке улыса, выль авторъёс соослы ини пумитъясько. Оло, куке но Мария Векшиналэсь произведениоссэ школаын дышетыны кутскозы, со классика шуыса…

— Али тросэз асьсэ коньдонэнызы книга потто, тупатъятэк-мартэк.

— Литература трос но пӧртэм луыны кулэ. Мон уродэн уг вера, дыр, шуи ке: тросэз гожъямъёс — кыед кадь, но со вылын мар ке вылез ӝутӥськоз. Со дыре ик воже но поталля, кыӵе ке книгаез лыдӟыкум, куддыр верам потэ: малы тон чуртнаськиськод татчы, со тынад ӧвӧл, тыныд кылбур борды йӧтскыны уг яра! Но, мукет ласянь, отысь маиз ке потоз ай, история ваньзэ ас интыяз пуктоз. Дуннеын гармония вань. Кытын ке ляб ке, мукет интыын кужмогес луоз. Кӧня жуг-жаг — но шуак отысь адями потоз но вань уродзэ ӵушоз.

— Мар меда луоз азьланяз литератураын?

— Кӧня калыкъёс, империос быремын, историез учконо ке. Удмуртъёс нош — сыӵе востэмесь, шыпытэсь кадь, мултэс кылзэс уз вералэ, верамзы потэ ке но. Собере йыръёзы асьсэзыз, вераны ӧз дӥсьтэ шуыса. Озьы ке но, калык улэ. Оло, востэм, куатаськись луэменыз ик со герӟаськемын. Соиныз ик тунсыко, соин ик, оло, уг быры. Литература но луоз, дыр. Адями вань ке, кылыз но луоз.

Нош со быдӟа потенциалмы но, луонлыкъёсмы но асьмелэн. Удмурт литератураын номыр йылозяз-пумозяз вуттэмын ӧвӧл на. Эше, ӝыныё беларус, ӝыныё ӟуч кылбурчи Валерий Игнатик, шуэ: тӥляд, удмуртъёслэн, ӟучъёсын ӵошатыса, тросгес луонлыкъёсты. Асьмелэн зэм но тросэз усьтымтэ на, соин котьма карыны быгатӥськом. Нош ӟучъёслы мар ке выльзэ, усьтымтэзэ лэсьтыны секытгес ини.

Али тани литературной конкурсъёс ортчыло, соин валче пӧртэм жанръёс но азинско. Кылсярысь, Елена Миннигараевалэсь «69 ар ортчыса, яке Кытчы кошко дэймонъёс?» фэнтезизэ печатламы издательствоын. Усьтымтэ жанръёс трос на, ми кутсконаз гинэ ай.

— Нош лыдӟись луоз-а? Али чакламея арлыдоос тросгес лыдӟисько. Тани семьяям удмурт кылын мемее самой трос лыдӟиське.

— Бен, оглом мӧйыгес калык лыдӟиське. Пересьёс кошкизы ке — егитъёс мар лыдӟозы меда, лыдӟиськозы-а вообще? Литературалэн лыдӟисьтэк улэмез уз лу. Гожтӥськод ке — оскиськод, лыдӟисед сюроз шуыса, 10 адями ке но. Ачиз понна гинэ нокин уг гожъяськы. Али гинэ оскыса шуи кадь, перспективамы вань шуыса. Озьы вылымтэ. Мед меценатъёс сюрысалзы, литератураен «висись» адямиос. Литературной агентъёс уг тырмо. Али быдэс дуннеын писательёслы агентъёс юртто книгаоссэс поттыны, соосты лыдӟисьёс доры вуттыны. Малы асьмелэн сыӵеез ӧвӧл? Удмурт писатель ассэ ачиз «вузаны» уг быгаты.

Анастасия Шумилова
Ангелина Снигирева
By Ангелина Снигирева Август 21, 2019 10:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<