Сэзъяно яке куашкатоно драмтеатрез?

Ангелина Снигирева
By Ангелина Снигирева Август 29, 2019 09:51

Таяз арняе Ижысь Эшъяськон юртын вераськон ӝутскиз ӟуч драмтеатрлэн вуж юртэз пумысен. Кенешонэз радъяз Удмуртиысь Общественной палата. Одӥгъёсыз шуо: вуж юрт архитектурая но историяя синпелет луэ. Мукетъёсыз та интыын адӟо удмурт культурая центрез.

Драмтеатрлэн ӵуказе нуналыз пумысен кенешонъёс уг чалмо
Фото: Чудья Жени

Вылыз — кильтрес, пушкыз — шальтрес

Драмтеатрлэн вуж юртэз пуктэмын Быдӟым ож вакытэ — 1943-тӥ арын. Рос-прос капремонт отын лэсьтэмын 1984-тӥ-1985-тӥ аръёсы. Озьы ке но юрт вужмиз — 2011-тӥ арын Ӟуч драмая театр выль интые выжиз. Вуж юртэ кылиз удмурт коллектив — «Айкай» театр, татчы ик интыязы Национальной библиотекалэсь куд-ог отделъёссэ.
Шаерысьтымы культурая министр Владимир Соловьёв верамъя, Удмуртиысь тросэз культурая коллективъёс интылы ёрмо. Тани филармонилэн мурӝолаз ужа Духовой оркестр, Калык творчествоя юртысь ӝикыт сэрегын — Симфонической оркестр. Ӧвӧл интыоссы городысь самодеятельной коллективъёслэн. Уго азьло соос быгато вал «Металлург», «Аксион», «Ижмаш» культурая дворецъёсын ужаны, но югдур воштӥськиз.
Вуж юрт пумысен 2012-тӥ арын пӧртэм кенешонъёс ӝутскизы — со интые чаклазы я автовокзал пуктыны, я вуз карон центр лэсьтыны. Вераськонъёс озьы ик вераськонэн кылизы. 2016-тӥ арын инвесторъёс чотын выльдӥзы юртлэсь фасадзэ, вошъязы укнооссэ. Таин тупатъян ужъёс йылпумъяськизы, нош лэчыт ужпумъёс ӧз быре.

— «Удмуртгражданпроект» огазеяськонлэн ортчытэм экспертизаез возьматӥз: юрт 65 процентлы шальтрамын. Борддоръёс но этажъёс вискын перекрытиос сокем вужмемын, соосты аварийной шуыса но лыдъяны уг луы ни, — вераз Удмурт Правительствоысь Капитальной лэсьтӥськонъя управленилэн кивалтӥсезлэсь ужзэ быдэсъясь Михаил Забелин.
Нош Ижысь историкъёслэн но архитекторъёслэн мукет малпанзы. Историк но шаерчи Евгений Шумилов пусъе: вуж юртлэн история ласянь дуныз туж вылӥын. Война дыръя ӝутэмын культурая 2 объект — вуж цирк но театр. Драмтеатрлэн юртэз — со Ижлэн тусыз, азинтэ классицизм амалэз, Семён Дудин архитекторлэсь ужзэ азьланьтэ.

— Озьы ке но Удмуртиысь Синпелетъёсты кун ласянь утёнъя агентство ӧз пырты Драмтеатрлэсь вуж юртсэ чаклано объектъёсын списоке но. Соин валлин вазиськимы Прокуратурае, та юртэз суд пыр культурая памятникен мед лыдъялозы шуыса, — керӟегъяське Россиысь культурая но историяя синпелетъёсты утёнъя обществолэн Удмуртиысь ёзэзлэн тӧроез Нина Девятова.
Соин ик паймоно: малы та кенешонэ ӧтиллямтэ Удмуртиысь Синпелетъёсты кун ласянь утёнъя агентствоысь экспертъёсты. Котырес ӝӧк сьӧры пуксем сомында муртлы соос быгатысалзы, дыр, валэктон шедьтыны, документъёсты возьматыны.

Ваче кымыс вуттон

Ченгешонэз ӝутӥсьёс та ужпумен валче суралто республикаын улӥсьёсты. Шуо: Удмурт культурая центрез пуктыны чакласа, вуж драмтеатрез куашкатыны малпало. Та пумысен Общественной палаталэсь кивалтӥсьсэ Рашид Хуснутдиновез интыяз пуктӥз «Удмурт Кенеш» ассоциацилэн вице-президентэз Владимир Байметов:

— Поттоно-а, ӧвӧл-а ченгешонэз таӵе ӝӧк котыре — та юанэз нырысь ик Общественной палаталэн кенешаз эскероно вал, со понна палатаысь культура удысъя комиссия люкаськыны, экспертъёслэсь мылкыдзэс тодыны кулэ вал. Нош тӥ номыре рос-прос чаклатэк, юромо ваче вуонъёслы кутскон сётӥськоды.
Та выллем ик вазиськонэз вал нациосын ужан политикая министрлэн Лариса Бурановалэн но. Та арня вискыны куд-ог СМИ-осын одӥг историклэн верамез вылэ чӧлскыса гожтӥзы: «кызьы ӟуч лысьӧм вылэ маке удмуртсэ пуктод?» Уго драмтеатрлэсь вуж юртсэ историяя синпелетэн лыдъян — со одӥг ужпум. Нош Удмурт культурая центр ӝутон — мукет юан.
Валантэм: ма муген али гинэ сайказы синпелетъёс понна сюлмаськисьёс? Россиысь культурая но историяя синпелетъёсты утёнъя обществолэн Удмуртиысь ёзэз та ужпумез кемаласен ӝутыны быгатысал. Нош дыртыны ӧдъязы 2018-тӥ арын. Солэсь азьлогес, 2017-тӥ арын Удмуртие выль Тӧро Александр Бречалов вуэм бере, «Удмурт Кенешысь» азьветлӥсьёс вазиськизы, Удмурт культурая центр курыса. Соку ик инты но чаклазы — драмтеатрлэсь вуж юртсэ выльдыны умой луысал, пе.

— Кылем ар пумозь малпамын вал та юртэз сэзъяны. Но проектэз дасясьёс но, эскерисьёс но одӥг мылкыдэ вуизы — выльзэ пуктыны дунтэмгес. Вал мукетыз но ӵектон – вуж юртлэсь фасадзэ кельтоно, нош пушсэ выль сямен радъяно. Озьы ке но мынам аслам малпанэ та пумысен мукет. Мар ке национальнойзэ лэсьтоно ке, со туалаезлэсь 3 йырлы вылынгес, паймытӥсьгес, тунсыкогес луыны кулэ, — шуэ нациосын ужан политикая министр Лариса Буранова.
Удмурт центрлы проект но дась ини, шуыны луоз. Вуж юртлэн площадез 3 сюрс 500 квадрат метр вал ке, вылез та интыын ик 6 сюрс 800 метре вӧлскоз. Отчы «Айкай» театрлы репетициослы зал но мастерскойёс, мукет коллективъёслы висъетъёс, адӟытон радъяны бадӟым зал, крезьгур гожтонъя студия но мукетъёссэ интыяны чакламын вал. Лэсьтӥськисьёслэн чотамзыя выльзэ пуктыны 1 квадрат метр понна 70 сюрс манет кулэ ке, вужзэ сэзъяны — 1 квадрат метрлы ик 130 сюрс манет чаклано.
Мукетыз ужпум — коньдон шедьтыны. Россиысь Культурая министерство дась федерал бюджетысь уксё лэзьыны. Но отын чакламын вал ни ӵектэм проект. Кызьы дунъялозы Удмуртиысь министерстволэсь сопала яке тапала шонаськемзэ? Удмурт культурая центрлы выль инты утчано ке, уж ӝегалоз.
Кенешонэ вуэмъёслэн одӥг малпанзы гинэ тупа: республикалэн кылдэмез дырысен 100 ар тырмонлы Удмурт культурая центр ӟеч кузьым луысал. Нош кортэз дурыны кулэ пӧсь дыръяз. Сотэк эшшо 150 аръем юбилеёзь кузьым возьмано луом на.

Елена Скворцова

Ангелина Снигирева
By Ангелина Снигирева Август 29, 2019 09:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<