Пичи инженеръёс улонэз воштыны дасясько

Ангелина Снигирева
By Ангелина Снигирева Август 7, 2019 14:19

Кызьы адямиослэсь улонзэс ӟечгес кароно, выль технологиосты азинтыса? Та сярысь малпасько Ижысь «Кванториум» технопаркын ортчись «Кубит.PRO» лагерьын.

Фото: «Кубит.PRO. Молодежный центр инноваций» «ВКонтакте» вотэсбамысь.

Дышетскон ортче «Дышетон» нацпроект улсын. «Кванториум» технопарк «Цифровой экономика» национальной программалэн конкурсаз вормисьёс пӧлы пыриз — таин валче 100 пиналъёс понна 2 дышетскон смена ортчытыны луонлык кылдӥз.

Нырысетӥез смена ужзэ мытӥз 5-тӥ августэ. Та дыре 12 арескысен 17 арескозь нылпиос (лагерьын соосты инженеръёс нимало) пӧртэм удысъёсын: программирование, робототехника, дизайн, ужбергатон — тодон-валанзэс узырымыто. Соос пилоттэк лобась аппаратъёсты, компьютерлэсь кызьы адӟемзэ-малпаськемзэ, 3D моделированиез эскеро. Бӧрысь пиналъёс, группаослы люкиськыса, пӧртэм проектъёс бордын ужалозы, малпанъёссэс стартапъёслы пӧрмытыны тыршозы. Пичи инженеръёслэн кураторъёссы — Ижкарысь азьмынӥсь компаниосысь ужасьёс.

Лагере пыриськон понна пиналъёс конкурс пыр потӥзы: порфтолиоссэс ыстӥзы, валэктӥзы, малы соослэн лагере ветлэмзы потэ. Дышетскисьёс пӧлын — 78 номеро школаысь Карина Нелюбина.

— Мынам робототехникаен выреме потэ вал, — вераз нылаш. — Школаямы роботъёсты лэсьтонъя классмы вань, но отчы пиосты гинэ куто. Нош мон малпасько, та удысын нылъёс пиослэсь чик бере уг кылё.

15 аресъем Иван Фоминлэн улонзэ информационной технологиосын герӟамез потэ. Азьланяз Москваысь Экономикая вылӥ школае дышетскыны пырыны мылкыдыз вань.

— Мон вуи та лагере, малы ке шуоно татын теориен гинэ уг выро, — валэктӥз пияш. — Мынам тодэме потэ, кызьы информационной технологиосын герӟаськем компаниос ужало. Та удысын ужасьёс валэктозы, кыӵе шуг-секытъёс улонын пумисько, кызьы секыт югдурысь потоно. Мон малпасько, улонамы та удыс али самой устоез луэ.

Сменаез усьтыса, пиналъёслы лекция лыдӟиз УдГУ-ысь дышетӥсь, экономика наукаосъя доктор Анна Овчинникова. Со пиналъёслы валэктӥз, мар со «форсайт» малпаськон — со юрттэ валаны, кызьы улон азьланяз воштӥськоз. Со мадиз, кызьы тодон-валанэз — формулаосты, лыдпусъёсты — уже кутоно улонэз воштон понна. Со сяна, А. Овчинникова вераз, кыӵе ӧръёсын али ужало Россиысь тодосчиос кунмылэсь экономиказэ ӝутон вылысь.

Нош элькунысьтымы экономикаен — макем зол азинскеменыз, солэн ляб но зол палъёсыныз — пиналъёсты тодматӥз Светлана Дубовцева — Удмуртиысь Экономикая министерствоысь отделлэн кивалтӥсез. Экономикаысь югдурез тодытэк, выль малпанъёсты — котькыӵе устоесь соос мед луозы — улонын пыӵатыны уз луы.

Лагерьлэн 2-тӥ сменаез ортчоз 19-тӥ августысен 1-тӥ сентябрёзь. Сӥзьыл лагерьлэн ужезлы йылпумъянъёс лэсьтозы «Кейсъёслэн чемпионатсы» ужрадын. Тужгес быгатӥсь пиналъёсты «Инженериысь гуру» нимен пусъёзы.

Лагерьын дышетскись нылпиосты кылзыку, валаськод, макем соослэн малпаськонзы но мукет, вераськон манерзы но аспӧртэм. Кыӵе гинэ визьмо кылъёс уг верало: кейс, аджайл, аддитивной технология… Зэм, будӥсь инженеръёс кылэн валче улонэз но воштыны мед быгатысалзы вылэм.

Анастасия Шумилова

Ангелина Снигирева
By Ангелина Снигирева Август 7, 2019 14:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<