Пичиесь ке но, кужмоесь

Ангелина Снигирева
By Ангелина Снигирева Август 14, 2019 17:15

Та арня вискын шаерамы вуылӥз Россиез азинтонъя кун корпорацилэн (ВЭБ.РФ) бадӟым делегациез. Пӧртэм пумо эскерем ужпумъёс пӧлын одӥгез сӥземын вал моногородъёсты ӝутонлы.

Россиысь моногородъёсты азинтонъя кун программалы луыса Воткинскысь сюрес тупатӥськиз
Фото: udmurt.ru

Шаерысьтымы 3 моногородъёс (одӥг бадӟым предприятиен каръёс) — Глазов, Сарапул но Вотка, — шедизы Россиысь моногородъёсты азинтонъя кун программае. Солэн пайдаез адӟиське ни вань 3 городъёсын ик. Мар воштӥськиз Воткаын — учкыны вуылӥзы ВЭБ.РФ-лэн кивалтӥсезлэн воштӥсез, Моногородъёсты азинтонъя фондлэн кивалтӥсез Ирина Макиева но Удмуртилэн Тӧроез Александр Бречалов. Ӵапак та нуналэ нырысетӥ машина ортчиз выль асфальтэн шобыртэм Победа урам кузя. Солэн кузьдалаез — 1,2 иськем. Сое лэсьтыны кошкем коньдонлэн бадӟым люкетэз — 47,3 миллион манетэз — висъяськиз федерал бюджетысь, 3,7 миллион манетэз — Удмуртилэн но Воткалэн казнаосысьтызы. Выльдэм сюрес асдунзэ нырысетӥ нуналъёсысеныз ик берыктыны кутскоз.
Сюрес кутске «Вектор» бадӟым предприятие дорысен но потэ Вотка кар котыртӥ ортчись сюрес вылэ.

— Предприятимес 12 ар талэсь азьло кылдытӥм, — вераз «Векторлэн» кивалтӥсез Анатолий Гусев. — 450-лэсь ятыр ужасьёсмы, поттӥськом электротехнической оборудование. Вузмы кошке элькунлэн палэназ но. Но сюрес ӧвӧлысь машинаосмы Вотка город пыр ортчоно луо вал — городын улӥсьёслы но со люкетылӥз, асьмелы но ӧз кельшылы. Сюрес усьтӥськиз бере, ми, Воткаез котыръятэк, пырак федерал сюрес вылэ потыны быгатом ни. Со сяна, секыт бадӟым трансформаторъёс но бичаны кутском — сюрес ӧвӧлысь таӵе луонлыкмы ӧй вал.
Воткаысь кӧня ке предприятиосын ӵош «Вектор» моногородъёсты азинтонъя программае пыриськыны дась луэмзэ вераз. Та дырысен солэн азинсконэз син азьын: производствозэс 1,5 поллы будэтыны быгатӥзы, талы 98,3 миллион манет инвестициос кыскизы, ватсаса 62 выль ужан интыос кылдытӥзы.
Удмуртилэн Тӧроез А. Бре-
чалов тау кариз «Вектор» заводлэн кивалтӥсьёсызлы:

— ВЭБ.РФ, Моногорода.РФ программаосты но Удмурт Элькунэз нырысь ик огазеяло ужбергатӥсьёс, — шуиз со. — Предпринимательёс улосэз азинтонэ ӧз пыриське ке, сюрес лэсьтыны луоз, вылды, но кисьтэм уксё экономикаез юнматыны уз юртты. «Векторъя» адӟиськом, кызьы луыны кулэ.
Предприятиетӥ ортчемез бере Ирина Макиева но огъя дунъет сётӥз: коньдон юнме кисьтэмын ӧвӧл.

— Вуз поттон йылэ, ватсаса ужан интыос кылдытэмын, малпасько, эшшо но тросгес луозы, — шуиз со. — Та сюрес, Воткалы сяна, эшшо 4 моногородъёслы — Новокузнецклы, Верхняя Пышмалы, Новочебоксарсклы но Дмитровградлы — туж кулэ — «Векторлэсь» вуззэ соос но басьто.
«Вектор» предприятилэн одӥг сюлмаськонэз кылемын на: туала электрооборудование поттон удысын вылӥ тодон-валанэн инженеръёс уг тырмо, соос татын 100 пала ужало. Данакез лыктэмын палэнысь.

Специалистъёс берлань медаз кошке шуыса, улонэз капчиятоно, — ватсаз Ирина Макиева. — Городын калык медаз ёрмы улон интылы, анай-атайёс медаз курадӟе пиналъёссэс садэ, школае сётыны. Та ужпумез быдэстон вылысь ик кылдытэмын моногородъёсты азинтонъя программа.
Удмуртилэн Тӧроез А. Бречалов жаляса пусйиз, тросэз ужбергатӥсьёс уггес дӥсьто на та программае пыриськыны. Но нырысетӥ вормонъёс вань бере, луозы выльёсыз но. Угось ВЭБ.РФ корпорацилэн со быдӟа делегациез юнме ӧз вуы элькунамы — азьланьын но юрттыны мылкыдзэс веразы. 20-лэсь уно проектъёс дась ни. Кылсярысь, Вотка городъя ик верано ке, матысь дыре быдэсмыны быгатозы эшшо кӧня ке инвестпроектъёс, соос пӧлын — литейной производствоез радъян, спортъя 2 комплексъёсты усьтон но мукет.
Сарапул, Глазов городъёс но азьланьын озьы ик моногородъёсты азинтонъя фондысь юрттэт басьтозы. Кылсярысь, туэ июнь толэзе куинез ик моногородъёс итӥськизы фондлэн «Прошагай город» бадӟым акциез борды. Чакламын со пичи городъёсы тросгес туристъёсты кыскон вылысь.

Элина КУМАЧЁВА

Ангелина Снигирева
By Ангелина Снигирева Август 14, 2019 17:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<