Пиратъёс юр-яр каризы

Ангелина Снигирева
By Ангелина Снигирева 6 августа, 2019 11:32

Егитъёслэн «Шунды» огазеяськонзы «Юр-яр» проектсэ улӟытӥз. Ужась егитъёслэн турслётазы 18-35 аресъемъёслэн командаоссы пыриськизы.

Эгра ёросысь кабачигуртъёс
Фото: М. Емельянова

Вотка ёросысь Болгуры гурт вӧзын 27-тӥ — 28-тӥ пӧсьтолэзе юр-яр вазиз. Татчы лыктэм командаос пӧртэм сямен ӵошатскизы. Валтӥсез — туристъёслэн полосазы. Сое дасяз «Шундылэн» Вотка ёросысь ёзэзлэн ужаз пыриськись Дмитрий Черыгов, ӵапак со ас палъёсаз турслётэз пумитаны мылкыд кариз.

Полосае котькуд командаысь 3 ныл но 3 пи пыриськизы. Этапъёс лудлэн пӧртэм сэрегъёсаз интыяськизы. Тяп-тяп котмемъёс шоры учкыса, малпалод: таос туж пӧсяллям ини. Собере валалод, кускозь вуэ пыраса, нюр вамен потэмын шуыса. Со гинэ мар! Писпуос вискын золъям гозыосъя ортчоно, писпу йылэ тубано, меӵ гурезьёстӥ бызьылоно… Кыӵе катед кылёз на? Но командаеныд тодматоно на. Сцена вылын ачид сярысь верано, тылскем дорын быдэстыны тупась кырӟан малпано.

Одӥгъёсыз кужымзэс мертало, мукетъёсыз улон инты дасяло: палатка пукто, тылскем кенжыто, жадем эшъёссэс ческыт сиёнэн сюдыны но жюриез паймытыны дасясько. Ӵошатсконъёсты эскеризы дунъясьёс: «Шунды» огазеяськонлэн тӧроез Алина Чернова, Эгра ёросысь ёзэзлэн кивалтӥсез Лариса Ускова но мукет «шундыос».

Эгра ёросысь кабачигуртъёс рос-прос дасяськиллям. Кожалод, таос шур кузя пират пыжен уяса вуизы. Асьсэдыз «Банда» нимало, валтӥсьсы — Джонни Палкук, пе. Ваньзы ик тельняшкаосын, кышетъёсын, йӧнтэм мылкыдын.

Котькуд вожвылъяськонзэс удмурт пиратъёс сямен ортчизы. Арганэн шудыса, бивакъёсазы куно ӧтчазы. Со куспын ик кӧшкематъяны но ӧз вунэтэ, табере, пе, дорысьтымы нокытчы уд кошке ини. Сюриды! Дунъясьёслы гадь вылазы «сьӧд меткаоссэс» лякизы.

Ӝӧк вылазы — зарниен шыкыс, котыраз — пыжем картошка, чорыг, 2 пумо чорыглэсь лым.

«Шунды» огазеяськон люказ ужась егитёъсты
Фото: М. Емельянова

Гитара шудэм улскын походной кырӟанзы серекъятӥз. Мукет командаос тодмо ӟуч кырӟанъёсты удмуртэ берыктылӥллям, нош таосыз асьсэос малпаллям. Ӵок, пе, гураз 2 аккорд гинэ кутӥське ке, со понна пушказ мылкыд, огазеясь кужым ватӥськемын.

Дунъясьёс споръяськытэк вормонэз кабачигуртъёслы сётӥзы, угось туристической полосазэс но таос ӝог, умой ортчизы.

Вотка ёросысь команда трослы бере ӧз кыльы. Со 2-тӥ луиз.

— Али ёросамы турслёт ортчиз вал, лӧптэм мылкыдэнымы татчы но лыктоно кариськимы, — вера Гавриловкаысь лулчеберетъя юртын ужась Анна Егорова. — Гужем калыкез бичаны капчи ик ӧвӧл, соин, отчы-татчы вазиськылыса, адямиосты люкай. Ёросмылэн сборноез пӧрмиз. Умой, токма лыктэм адямиос пӧлазы ӧз сюре шуыса: шумпото, шулдыръясько, котьма борды басьтӥсько.

Воткаос котыр ласянь быгатонлыкъёссэс возьматӥзы: эктӥзы но, кырӟазы но. Дунъясьёслы пыжем чорыгзэс оскалтыны дэмлакузы, крезен шудыса, лагенда веразы.

Нош 3-тӥ инты Дэри ёросысь Казмаска гуртысь егитъёс басьтӥзы.

— «Шундыослэн» гужемзы пӧртэм ужрадъёсын узыр луиз, — вера «Шунды» огазеяськонлэн тӧроез Алина Чернова, — умой, «Юр-яре» ужась егитъёсты но бичаны быгатӥмы шуыса. Вуоно аре тросгес команда возьмаломы.

Мария Емельянова

Ангелина Снигирева
By Ангелина Снигирева 6 августа, 2019 11:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<