Пельгаос уло 70 гуртын

Ангелина Снигирева
By Ангелина Снигирева Август 21, 2019 10:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ува ёросысь Бадӟым Жужгес гуртын пумиськизы шаерысьтымы пельга выжыос. Аспал кырӟанъёссэс быдэстэм сяна, соос гуртъёссылэн историенызы тодматӥзы, огкадьзэ но пӧртэмзэ шедьыны выризы.

«Гудыри сяська» Жужгесысь коллектив
Фото: А. Снигирёва

Ошмесъёс пӧрмо шурлы

Пельгаосты тазьы огинэ бичаны мылкыд кариз Ува ёросысь Чистостем гуртысь шаерчи, историк Евгений Эжбаев. Ачиз со Жужгесын вордӥськемын-будэмын.
Берло дыре гуртоос бӧлякен люкаськыны, сям-йылолъёссэс улӟытыны, нылпиослы дауръёсын люкам тодон-валанэз пыӵатыны ӧдъязы, ӧжыт ӧвӧл выжыоссэс утчанэн вырисьёс но.
Жужгесъёс кунооссэс аспӧртэм пумитазы: гуртэ пыронтӥысен нюкетӥзы ортчыны дэмлазы. Азьвыл озьы, пе, удмуртъёс кунооссэс пумиталлязы, юромо йыромытыса. Но жужгесъёслэн мукетгес ужпумзы вал — гуртсылэсь чеберзэ возьматон. Куноос гурт пушкытӥ, ульчаос вамен, мур нюк кузя ортчизы. Нюкын юзмыт ошмесъёс музъем пушкысь пото, визылась шуръёслы пӧрмо. Жужгесъёс данъясько ошмесэнызы. Кылем арын, грант утыса, котырзэ утялтӥзы, шутэтскон инты тупатӥзы. Куноос татчы кожатэк уг ӵыдо, юзмыт вузэ веръятэк уг кошко.

— Удмурт шаерын ог 70 воршудъёс, бадӟымез — пурга, соос ог 170 гуртъёсы пазьгиськемын, чабъяос 91 интыын уло, ӟумъяос — 86 гуртын. Пельгаос быдӟалызыя 5-тӥ интыын, соос 70 гуртэ выжыяськемын. Та выжылэн пусэз — пелёкучыран. Со визьмо, сэзь луэмез возьматэ. Пельгаос, М. Атаманов тодосчи пусъемъя, нырысь ик ошмесо шаере пыдзэс лёгизы. Соос сярысь гожтэмъёс вань 15-тӥ даурын. Та выжыос 16 ёросын пумиськыло, тросэтӥ уло Алнаш, Пичи Пурга, Грак, Можга, Ува, Вавож палъёсын, — вераз Е. Эжбаев.

Визьмо, чебер выжы

Жужгесэ бичаськизы Кияса ёросысь Уддядиысь (Карамас-Пельга), Алнаш ёросысь Утчанысь, Вавож ёросысь Тыловыл-Пельгаысь но Волипельгаысь, Пичи Пурга ёросысь Кечолысь кырӟась-верась коллективъёс. Ваньзы соос одӥг пельга выжысь потэмын. Куноос пумиськонэ буш киын ӧз лыктэ: асэнызы тодматӥзы, аспал кырӟанъёссэс быдэстӥзы, гуртсылэн историеныз тодматӥзы.

Уддядиос гуртэн тодматско
Фото: А. Снигирёва

— Ми палъёсын кырӟанъёс, сям-йылолъёс, ма, дӥськут но мукет. Тани милям дэремъёсмы нимаз кофталэсь но юбкалэсь пӧрмытэмын, мукет ёросъёсын сое гомбылак (ӵош) вуро. Бускель гуртъёсын улӥсьёслэсь но син вылтусэнымы висъяськиськом. Булай пиос котьку жужгес нылъёслы синмаськылӥзы, — вераз Жужгесысь гурт клублэн кивалтӥсез Алевтина Макарова.

— Пельга выжыос Ува ёросын 8 гуртын улӥллям, кылсярысь, Бадӟым Жужгес, Кечгурт, Косой но Михайлово гуртъёсын. Александр Пудов историк верамъя, Бадӟым Жужгес Ува ёросысь одӥгез вашкалаез, 16-тӥ дауре кылдэмын. Нырысетӥ улӥсьёсыз интыяськиллям Нылга но Вало шуръёслэн вожазы. Бӧрысь вырйылэ ӝутскиллям — Вужгуртэ. Али улон интызы куинетӥез ни. 1710-тӥ арын татын 23 азбар вылэм. 1930-тӥ арозь Жужгес документъёсын Жужгес-Пельга шуыса пусъемын вылэм, — гуртлэн историеныз тодматӥз муниципал кылдытэтлэн йырыз Зинаида Глушкова.
Жужгесысь «Гудыри сяська» коллектив гуртсылэсь кырӟанзэ быдэстӥз. Кылъёссэ Е. Эжбаев гожтӥз, крезьгурзэ — П. Кузнецов. Со сяна, гуртоос песянай-песятайёссылэсь вашкала дэремъёссэз, чеберъяськон арбериоссэс сцена вылысен возьматӥзы.
Вавож ёросысь Тыловыл-Пельгаос аспал кылбурчизылэсь И. Зоринлэсь но крезьгурчизылэсь Л. Байковлэсь кырӟанзэс быдэстӥзы. Гуртсылэн историеныз тодматӥз шаерчи Галина Зубкова.
Алнаш ёросысь Утчан гуртысь «Ӵук ӟардон» ансамбльысь нылкышноослэн гуртсылэн кылдэмез, азинскемез пумысен тросгес тодыны мылкыдзы ӝутӥськиз.

Жужесъёс кунооссылы ӝук пӧзьто
Фото: А. Снигирёва

Пумиськон туж шуныт ортчиз. Гуртоос тазьы огазе арлы быдэ бичаськыны кенешизы. Кайта доразы пумиськыны Уддядиос ӧтизы. Ми пельгаосын одӥг бадӟым семья шуыса шӧдӥмы, пе. Тусмыя, сяммыя, кырӟанъёсмыя пӧртэмесь ке но, одӥг выжыысь луэммы огазея, шуизы.

Ангелина Снигирёва

Ангелина Снигирева
By Ангелина Снигирева Август 21, 2019 10:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<