Оскон тупаса улыны уг люкеты

Ангелина Снигирева
By Ангелина Снигирева 29 августа, 2019 14:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаерамы ог 140 пала пӧртэм выжы калыкъёс ас культуразэс, сям-йылолъёссэс утьыса, осконзэс азинтыса, уло. Но со уг люкеты ог-огенызы эшъяськыны. Удмуртиысь журналистъёс тодматскизы Балезино ёросысь Кестымын улӥсь бигеръёслэн но Кез ёросысь Кулига гуртын старообрядецъёслэн улэм-вылэменызы. Таӵе пресс-тур радъязы Нациосын ужан политикая министерство но Эшъяськон юрт.

Выль мечеть
Фото: А. Снигирёва

Мечетьсэс дауръёсын утизы

Кестымын 800-лэсь ятыр улӥсез, 90 процентэз — бигеръёс. Ог 20 ар талэсь азьло гинэ ай быдэс гурт бигер вылэм. Гуртоос шуо: Кестым — Касимовъёслэн дорзы, угось отын уноез та фамилиез нуллэ. Али Кестымысь потэмъёс ог 10 сюрс пала лыдъясько ни, пе, соос ог-огзылы ӵыжы-выжы луо. Та палъёсын Касимовъёслэн фестивальзы но арлы быдэ ортчылэ.
Гуртысь туала калыкез люка, культуразэс, осконзэс возьыны юрттэ мечеть. Туннэ нуналлы отчы вуыло Балезино ёросысь ог 3 сюрс 500 пала оскисьёс. Кестымъёслэсь улэм-вылэмзэс валаны уз луы гуртлэсь историзэ тодытэк.

— Удмуртилэн уйпалысьтыз музъемъёсы огвакытэгес — 17-тӥ дауре — удмуртъёс, бигеръёс, бесерманъёс лыктӥзы, — вераз Кестым школаысь историяя дышетӥсь, мечетьысь имам Ильмир Касимов. — Кестымез кылдытӥзы туала Киров улосысь Карино гуртысь потэмъёс, соин но татысь бигеръёсты каринской шуо. Черкогурт сярысь нырысетӥ пусъемъёс 1678-тӥ арын пумиськыло ни. Нош мечетьлэн ужамез тодмо 1743-тӥ аръёсысен.

Вашкала мечетьын али ке но куд-ог вӧсяськон ужрадъёс ортчыло
Фото: А. Снигирёва

Со вакытэ быдэс Россиын православной оскон вӧлмемын вал, мечетьёс усьтыны кӧня ке муртлы гинэ лэзылӥллям. Кестымын со лушкем ужаз. Оскон юртэз кӧня ке пол ворсаны выриллям, но гуртоос лэзиллямтэ. Та сярысь кӧня ке мадёсъёс но вань. Одӥгез вера: Кестыме ожгарчиос вуиллям. Нылпиос, нылкышноос но воргоронъёс 3 котыртэме султӥллям, озьы мечетьсэс утиллям. Кыкетӥез: Кестым котырысь гуртъёсысь калыкез православие берыктыны кутскизы. Нош кестымъёс, нюлэскы ватӥськыса, утиськизы. Бӧрысь ини, Екатерина II кивалтон дыръя, мечетьёс усьтылыны лэзизы.
Кестымын али утиськемын 1905-тӥ арын ӝутэм мечеть. Сое пуктэм татысь узыр вузчи Гусман Касимов. Та пумысен калыкын веран вань: вузчи Меккае хадж лэсьтыны кошкемез дыръя гуртын зол тылпу потэм, ӝыны гуртэз сутэм. Г. Касимов та сярысь тодэм но кылзэ сётэм, аслам коркае утиськемын ке, гуртоослы мечеть пукто шуыса. Озьы Кестымын выль мечеть усьтэмын вал. 20-тӥ даурлэн кутсконаз отын Коранэз дышетӥллям, мульман осконъя тодон-валан люкаллям 300 пала нылпиос. 1930-тӥ аръёсы Удмуртиысь уноез мечетьёс (соос 30-лэсь ятыр вал) ворсамын вал, утиськизы 5-эз гинэ, 3-эз соос пӧлысь Уйпал ёросъёсын — Балезино ёросысь Кестым, Падера но Глазов ёросысь Парзи гуртъёсын. Бигеръёс котькыӵе вакытэ артэ улӥсь калыкъёсын — удмуртъёсын, бесерманъёсын, ӟучъёсын — тупаса улӥзы. Удмуртъёс, кылсярысь, бигеръёсты яратылӥзы, угось соос пӧлын трос вузчиос вал, удмуртъёслы пӧртэм вузъёс вуттылӥзы, пе.
2013-тӥ арын вашкала мечеть вӧзы вылез пуктэмын. Угось азьвылэз вужмиз, кытӥ-отӥ липетэз пасяськылӥз. Но али но юрт быдэс ворсамын ӧвӧл. Отын бадӟым ужрадъёс дыръя вӧсяськонъёс ортчыло, эксурсие нылпиос, туристъёс вуыло. Юртын мусульман осконэн герӟаськем адӟытон ужа: тодматскыны луэ вашкала Коранъёсын, бигер дӥськутэн, мечетен герӟаськем пӧртэм арбериосын но трос мукетэныз.

Кестым бигеръёслэн юртъер котырзы
Фото: А. Снигирёва

Гуртоос вӧсяськыны ветло выль мечете. Отын усьтэмын воскресной школа. Вань мылкыд карисьёс Коранэз лыдӟыны, араб кылэз, вӧсяськонъёсты дышетыны ветло.
Кестым школаын шаертодонъя музей ужа. Сӥземын со бигер культуралы. Со тодматэ Кестым котырысь гуртъёсын улӥсь бигеръёслэсь сям-йылолъёсынызы, корка пуш арбериосынызы.
Кестымын уно вузчиос улӥзы, соин адӟытонын узыр бигеръёслэн котырзы возьматэмын: турлы ку сапегъёс, яркыт дӥськутъёс, самоваръёс, шыкысъёс но трос мукетыз. Бигеръёс буш борддоръёсты ӧз яратылэ, соин котькытын выжлёгетъёс, ӵушконъёс, дӥськутъёс ошылэмын. Удмуртъёс кунооссэс бадӟым ӝӧк сьӧры пуктылӥзы ке, бигер коркан — пичи ӝӧк вылын самовар но чай юон тэркыос, чашаос тыремын. Куноос, пе, выж вылэ валем ӝӧккышет котыре пуксьылӥзы.

Туала улонлэсь бере уг кылё

Кез ёросысь Кулига черкогурт сярысь тодӥсьтэмъёсыз ӧвӧл, дыр: татысен кутске Кам шур. Эшшо отын старообрядецъёс но уло. Кулига поселениын та вакытэ ог 1 сюрс 200 пала улӥсез. Староверъёс, ӟучъёс, удмуртъёс — ваньзы сураськизы ини ке но, ас культуразэс уг вунэто. Кытысь-марысь удмурт музъеме старообрядецъёс вуизы, кинъёс соос, кыӵе осконэн уло?

А. Некрасов музей сярысь вера
Фото: В. Исупов

1650-тӥ аръёсы Никон патриархлэн кичӧлтэмезъя Ӟуч православной черкын воштӥськонъёс луизы. Черк книгаос, вӧсяськон амалъёс выльдэмын вал. Талы пумитъяськисьёс сюризы, соос православной черклэсь люкиськизы. Бӧрысь 20-тӥ дауре сыӵе адямиосты старообрядецъёс яке староверъёс ниманы кутскизы. Соос Нижний Новгород котырысь Кержак, Карелия улосысь Выг шуръёс котыре, Архангельск улосысь Белое зарезь дуре кошкылӥзы. Бӧрысь та интыосысь, 18-тӥ даурысен кутскыса 20-тӥ даурозь, асьсэ осконзэс утьыны тыршыса, шундыӝужан пала Уралэ, Сибире кӧчылӥзы, пеймыт нюлэсъёсы ватӥськылӥзы. Озьы 20-тӥ даурлэн кутсконаз Кулига котырын ог 4 сюрс старообрядецъёс лыдъяськизы.
Кулигаын старообрядецъёслэн культуразылы сӥзем музей усьтэмын. Солэн кивалтӥсез Алексей Некрасов татын вордӥськемын-будэмын, та культура сярысь трос вераны тодэ.

— Старообрядецъёс люкисько поповецъёслы но беспоповецъёслы, — шуэ А. Некрасов. — Кулига музъемъёс котыре пӧртэм интыосысь лыктэм беспоповецъёс интыяськизы. Та кыл ачиз ик вера ни, соослэн баӵкозы но, черксы но ӧй вал шуыса. Вуж осконэн улӥсьёс ог-огзы дорын вӧсяськылӥзы, али но озьы ик коркаосазы люкаськыса вӧсяськисьёс вань на.
Старообрядецъёс сярысь кыӵе гинэ шонертэм веранъёс вӧлмемын ӧвӧл: соос туала техникалэсь кышкало, муртэн йӧтскылэм тусьты-пуньызэс сэрпалто, адямиослэсь ватӥськыса уло но трос мукетъёсыз.

Старообрядецъёслэн юртъер котырзы
Фото: А. Снигирёва

— Туннэ старообрядецъёс туала улонлэсь бере уг кылё: озьы ик телевизор учко, Интернетэн эшъясько, машинаосын ворттыло, — шуэ А. Некрасов.
Кулигаын старообрядецъёс даурлэсь кема православнойёсын ӵош уло ни. 1838-тӥ арын татын черк усьтэмын вал. Та пумысен калык пӧлын нокыӵе керетонъёс ӧз пуромылэ, гуртоос тупаса улӥзы, котькудӥз аслэсьтыз осконзэ азинтӥз.

— Старообрядецъёслэн гуртъёссы Кулигалэсь выллапалын интыяськемын, лымшораз — удмуртъёс уло ни. Соин артысь гуртъёсысь адямиос ог-огенызы семьяос кылдытъязы, нылпиос вордылӥзы, табере шуг вераны, кин кыӵе осконэн улэ. Старообрядецъёс черке но ветлыло, асьсэ коже но вӧсясько, — вераз Кезысь протоиерей Сергей Миронов.
Соин но, калыклэсь мылкыдзэ лыдэ басьтыса, Кулигаын выль черк ӝутӥське, со котькудӥзлы оскиськисьлы: православной-а со, старообярдец-а, ӧссэ усьтоз.

Ангелина Снигирёва

Ангелина Снигирева
By Ангелина Снигирева 29 августа, 2019 14:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<