Операез кылзӥсь ӧвӧл

Ангелина Снигирева
By Ангелина Снигирева Август 21, 2019 12:34

17-тӥ августэ Дэбес ёросын быдэс нунал чузъяськизы Г. Корепанов-Камскийлэн кырӟанъёсыз. Дано композиторлэсь 90 арессэ пусъёнлы сӥзьыса, татын радъязы фестиваль, ортчытӥзы конференция, усьтӥзы буре ваён пул.

Коллективъёс Г. Корепанов-Камскиез данъяса кырӟало
Фото: «Новый путь» газет

Нимзэ ӝутон

Геннадий Михайлович Корепанов-Камский удмурт культураез утёнын но азинтонын бадӟым инты басьтӥз. Туннэ ке но солэн творчествоез дуно луэ. Со гожтӥз нырысетӥ удмурт оперетта «Любушка», нырысетӥ балет «Италмас», опера-балет «Чипчирган» но трос мукетсэ. Ваньмыз произведениосыз, удмурт фольклор но историмы вылэ пыкиськыса, кылдытэмын.

— Мукет композиторен Герман Афанасьевич Корепановен соос удмурт крезьгурлэн классикъёсыз луо, — вера Удмуртиысь Композиторъёслэн огазеяськонэнызы кивалтӥсь Марина Ходырева. — Вань йӧскалык крезьгурмы кутске та дано адямиос бордысен. Геннадий Михайлович ачиз но туж «паськыт» адями вал: крезьгурчи но, кырӟась но, дышетӥсь но, кылбурчи но. Дэбесын сое дунъяло. Жаляса верано, берло 10 аръёссэ крезьгуръёсыз радио но, телевидение пыр но уг чузъясько. Отын ӧжыт чузъясько Совето Союз дыръя кылдэм гуръёс. Удмуртиын одӥг гинэ операя но балетъя театр, со но удмурт крезьгурчиослэсь произведениоссэс сцена вылын пуктыны уг басьтӥськы. Шаерамы лыкто пӧртэм улосъёсысь композиторъёс. Татарстанысь, Башкортостанысь, Марий Элысь крезьгурчиос вуо но паймо: тӥляд асьтэлэн операды вань ук, ми тодӥськом, малы театръёсты репертуаразы уг пырто? Асьме дорын ӧз пуктэ ке, кытын пуктозы на?
Та юан чузъяськиз Дэбесын конференция дыръя но. Библиотекалэн залаз люкаськем адямиос пӧлысь та пумысен одӥг мурт гинэ сюлэмшугзэ ӧз вера. Культурая министр Владимир Соловьёв пусъемъя, ужпум пуктэмын Геннадий Корепанов-Камскийлэсь архивзэ выльдыны. Матысь дыре Композиторъёслэн огазеяськонзы, Ижысь кун филармония, Национальной библиотека утчалозы, выльдозы но дасялозы вань произведениоссэ, нотаоссэ. Сцена вылын постановка лэсьтон понна угось туннэ быдэс произведениосыз ӧвӧл. Кырӟанъёсыз калык кырӟанъёс кадь луэмын ни. Соосты но интернет вотэсэ, сайтъёсы поттыны чакламын. Озьы егитъёс соосын тодматскыны быгатозы.
Нош Дэбес ёрос понна быдэс ар ортче ни Геннадий Корепанов-Камскийлэн нимыз улсын. Ёрос администрациысь культурая управлениен кивалтӥсь Александр Корепанов верамъя, Геннадий Михайловичлэсь нимзэ калыке берыктон, фестиваль радъян вылысь Президентлэн фондэзлэсь грантсэ но утыны быгатӥзы. Эсьма, табере Дэбес шорын ик сылэ Г. Корепанов-Камскийлэн пулэсь вӧлэм синпелетэз. Азьланяз сое туйлэсь кисьтыны мылкыдзы вань. Со сяна, крезьгуръя но искусствоосъя школаосын нылпиос тодматско композиторлэн творчествоеныз. Нылпиос быдэсто солэсь произведениоссэ, солэн улон-вылонэзлы сӥзьыса, кылдыто суредъёс.

Кылдоз выль клуб

Фестиваль улсын Корепан-Камскийлы сӥзем буре ваён пул усьтӥзы. Шуккизы сое Тыловайысь культурая юрт борды — азьвыл татын школа вал. Ӵапак та школаын 1937-тӥ-1943-тӥ аръёсы дышетскиз Геннадий Корепанов. Зэм, юрт туннэ мырдэм века — зор-кот улын сисьме. Но сое синпелетэз сямен утьыны чакламын. Нош Тыловае выль клуб пуктыны проект но смета дасямын ни. Владимир Соловьёв пусъемъя, объектэз ӝутон вуоно арын программае ӧз пыры ке, 2021-тӥ арын со кылдыны кулэ ини. Та понна ваньзэ лэсьтыны тыршозы. Тыловай калыклы кытчы люкаськон инты коть луоз.
Эшшо 2 буре ваён пул усьтыны медо Ижын. Ёрослэн йырыз Андрей Иванов верамъя, асьмеос али одӥг бадӟым ужез нуыны кулэ. Со калык кырӟанъёсты утьыны быгатӥз бере, со произведениосты но нимзэ вуоно поколениослы вуттоно.

Пул усьтон
Фото: «Новый путь» газет

— Туннэ таӵе быдӟым композиторъёс асьмелэн ӧвӧл, — шуэ Владимир Соловьёв. -. Мон ачим Геннадий Михайловичен тодмо вал. Котьку данъяськыса учкылӥ со шоры. Соин но 90 аръем юбилейзэ пусйыны кылдытӥмы нимысьтыз группа. Фестивален, конференция, котырес ӝӧк сьӧрын пумиськонэн гинэ ужрадъёс уз йылпумъяське. Октябрь толэзе Ижын но ортчытыны малпаськомы бадӟым конференция. Ижысь огезлы урамлы солэсь нимзэ сётоно шуыса решение но кутэмын ни.
Дэбесэ конференцие люкаськемъёс ӵектӥзы Геннадий Михайлович сярысь документальной кино пуктыны. Пӧламы вань на со сярысь вераны быгатӥсь адямиос. Соослэсь тодэ ваёнъёссэс но люкаса кельтыны умой луысал, шуизы. Со сяна, Дэбесэ пырон доры усьтыны дэмлазы Г. Корепанов-Камскийлы сӥзем Тыловайысь музейлэсь филиалзэ. Зор-кот дыръя угось Тыловае пырыны воксё уг луы. Тани мемориал пулзэ усьтонэ но тросэз сюрыны ӧз быгатэ. Озьы ик ӵектӥзы Дэбесэ творческой кафе усьтыны.

Матэгес тодматскон

Фестивале вуизы 15 ёросъёсысь пӧртэм коллективъёс. Котькудзэ нимысьтыз пумитазы, котькудӥзлы Дэбесэтӥ экскурсия радъязы. Отӥяз ни ваньзэсты огазеяз черкогурт шорысь «Чупчипал» шутэтсконъя комплекс. Куазен но удалтӥз. Возь вылысь сцена вылын мӧйыез но, егитэз но быдэстӥзы Г. Корепанов-Камскийлэсь кырӟанъёссэ, шудӥзы крезьгуръёссэ. Возь вылысь кошкыны ик ӧз ӵыдэ.

— Фестивале пыриськыны асьмеос мылкыд каримы, — шуэ Пичи Пурга ёросысь Куреггуртысь «Азвесь нюжа» ансамбле ветлӥсь Раиса Устинова. — Ми туж яратӥськом Геннадий Михайловичлэсь кырӟанъёссэ: шулдырто но, малпаськыто но, бӧрдыто но. Таӵе фестивальёс туж кулэ. Калык пӧлын, кырӟанъёссэ кылыку, быдэстыку, эшшо но мургес шӧдоно соослэсь пуштроссэс. Соиз но вань: ми ваньмы сямен ужаськомы колхозын, гуртлэсь палэнэ туж ик ум потаське. Фестивале вуыса, калыкез но адӟиськомы. Фестиваль сярысь ивормес Интернетысь социальной сетьёсы но пуктомы — озьы егитъёс но композитормы сярысь сярысь уногес тодозы. Асьме выжымес утьыны кулэ, сотэк быромы.
Фестивале вуылӥз Геннадий Михайловичлэн Дарья Назарова внучкаез. Со Ижын улэ. 2001-тӥ арын песятаез кулыку, школаез йылпумъя ни вал. Песятаез сярысь туннэ ке но шунытэн тодаз вае.

Г. Корепанов-Камскийлэн внучкаез Дарья Назарова
Фото: Е. Сараматова

— Геннадий Михайлович туж яратэ вал улонэз но шаерзэ, — вера Дарья Сергеевна. — Улонэз умойгес каремез потэ вал. Со мылкыдыз быдэс творчествояз но пыӵамын. Милемлы, внукъёсызлы, со ӵемысь вера вал пичи дырысьтыз учыръёссэ, тужгес но — Тыловай гуртсэ. Тыловайысь пыдын Иже дышетскыны кошкемзэ веракуз, ымъёсмес усьтыса ик, кылзылӥмы. Кыӵе дӥсьтон но мылкыд кулэ ук. Ужаны яратэ вал. Крезьгур кылдытон, кырӟан гожтон борды басьтӥськыкуз, котыраз мар луэ, кылэмысь-адӟемысь дугдэ вал кадь — сокем выйылӥз творчествое. Ми асьмеос но люкетыны ӧм дӥсьтылэ. Но ми, семьяез, со понна вал нырысетӥ кылзӥсьёс. Маке пӧрмытэ ке, котыраз люка но шуэ вал: кылзэ, мар луиз. Нылпиосызлы но внукъёсызлы солэн инструментъёсын шудыны быгатонлыкъёсыз ӧз пыӵалэ. Но алигес пие, садысь бертыкуз, шуак куриз: мама, басьты мыным аккордеон. Яша, малы? Утренникъёсын, пе, шудо. Соку ик тодам лыктӥз песятай. Кияз инструмент нырысьсэ кутыкуз, солы вал 7 арес, со кисьтонын но, сюанын но шудылӥз. Сыӵе вакыт вал, шуылӥз со милемлы, улонлы дышетыкуз. Милемлы гожтэт но гожтыса кельтэм. Рос-прос ужано, умой адями луоно, шаердэ яратоно но улон шоры капчи мылкыдын учконо, ӵыжы-выжыостэ дунъяно, дэмен улоно — соку та улонын ваньмыз пӧрмоз. Тазьы нодъям со внукъёссэ. Али ке но соя улыны выриськом.
Таӵе шуныт пумиськон, тодэ ваёнъёс, кырӟанъёс улсын ортчиз фестиваль. Азьланяз сое 3 арлы огпол но Геннадий Михайловичлэн юбилей аръёсаз ортчытъялозы.

Елена Сараматова

Ангелина Снигирева
By Ангелина Снигирева Август 21, 2019 12:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<