Мугор чеберске, тазалык юнма

Ангелина Снигирева
By Ангелина Снигирева 8 августа, 2019 16:04

24-тӥ августэ Ижкарысь Киров нимо паркын скандинав амалэн ветлонъя 4-тӥез калыккуспо фестиваль радъяськоз. Отчы вуыны чаклало, Россилэн пӧртэм улосъёсысьтыз сяна, Франциысь, Польшаысь, Белоруссиысь, Испаниысь спортсменъёс.

Уваысь пыдын ветлыны яратӥсьёс
Фото: Н. Мельникова

Ужрадэз Тазалыклэн арез улсын ортчытэ Удмуртиысь Скандинав амалэн ветлонъя федерация Правительстволэн юрттэмезъя. Бодыен ветлон калык пӧлын ог 4 ар талэсь азьло вӧлмыны ӧдъяз ке но, та вакытлы шаерамы ог 12 сюрс пала адями соин эшъяськиз ни. Та амалэн яратыса выро Ижкарын, Глазовын, Воткинскын, Сарапулын, Эгра, Сьӧлта, Кизнер но Алнаш ёросъёсын. Киязы боды кутыса, пото арлыдоос но, егитъёс но.

Фестивалез чидатэк вите ни Можгаысь Виктор Мельников. Алигес со Финляндиысь Савонлинна городын ортчем вожвылъяськонын ас ёзъёсыз пӧлын, 21 иськемез ортчыса, нырысетӥ инты басьтӥз.

М. Мельников

— Огвакыт ӵемысь висьылыны кутски, эмчиос ӵектӥзы мугорме кыдатыны, — вераз 77 аресъем воргорон. — Тодматски скандинав амалъя ветлонэн – мастер-классэ ветлӥ. Озьы бодыосын вамышъянэн мон ог 4 ар талэсь азьло эшъяськи, та амал соку гинэ шаерамы паськыт вӧлмыны кутскиз. Мыным туж кельшиз, солэсь табере уг ӵыдӥськы ни. Микрорайонысьтым арлыдоосын арняяз 3 пол стадионэ люкаськылӥськом, инструктормы кивалтэм улсын вамышъяськом, берло парем чай юиськом. Дырмы туж шулдыр ортче. Мон нимаз но нуналлы быдэ бодыен поръясько, ичизэ нуналаз 5 иськем ортчисько, бӧрысь мугорме посӥсько на. Син медам усь, но тазьы мугорме выретыса, берло 2 арзэ чик врачъёс доры ӧй на вазиськылы. Мылкыды туж умой, асме егитэн шӧдӥсько.

Можгаын пыдын ветлыны яратӥсьёс быдэс команда бичаськизы ни, шаерысьтымы таза улонлы сӥзем ужрадъёсты уг кельтыло. Виктор Мельников Ижкарын радъяськись фестивале но вуыны чакла, 10 иськемез ортчо, пе.

Нялтас вераса, Виктор Сергеевич ас мылкыдызъя пыриськылӥз ни Пермьын, Кировын, Минскын, Мурманскын ортчылэм вожвылъяськонъёсы. Котькытын ачиз кадь ик мыло-кыдо адямиосын эшъяське.

Кин шуиз: бодыен пересьёс гинэ ветло? Скандинав амалэн вамышъян котькинлы пайдаё: спортсменлы но, огшоры адямилы но, мӧйыэзлы но, пиналэзлы но.

Уваысь Надежда Машковцева кемалась ик ӧвӧл пенсие потӥз, егит дырысеныз спортэн эшъяське: Гурт шудонъёсын пыдын, куасэн бызьылӥз. Али ветеранъёс пӧлын вожвылъяське, кужмоосыз радын возиське.

— Кӧня ке ар талэсь азьло скандинав амалэн тодматски, туж кельшиз, — вераз Н. Машковцева. — Мугоры веськресгес луиз, кускы, пельпум котыръёсы юнмазы шуыса, шӧдӥсько. Бодыен ветлыса, вань мугор выре ук. Гужем, сӥзьыл ӵоже бодыен вамышъясько ке, толалтэлы куас вылэ капчиен султӥсько ни, ӵошатсконъёсын но результатъёсы умойгес луизы.

Надежда Машковцева Уваысь нылпи садын визьнодась вал, берло 15 ар соин кивалтӥз, тыршиз «Увадрев-Холдинг» предприятиын но. Нялтас вераса, кышномуртлэн нылъёсыз но спортэн эшъясько — Вероникаез шаерысьтымы вакчи дистанциосты бызьылонъя одӥгез кужмоез спортсмен, Алёнаез волейболэн шудэ.

3-тӥ арзэ таза улонэн эшъяське ни Ува санаторийысь валтӥсь экономист Людмила Иванкова.

— Туж гажасько куасэз. Скандинав амалэн ветлонлы но копак синмаськи. Санаторий котырамы тазалыко сюрес усьтэмын, отын чебер, потытэк уд чида. Нуналлы быдэ уж бере 8 часын эшеным поръяны мынӥськом. Азьвыл бодыен ветлӥсьёс арлыдоосгес вал ке, али пӧламы сомында егитъёс ни. Куд-огез юало, пайдазэ шӧдӥськод-а, тазалыкед юнмаз-а шуыса. Санаторие эмъяськыны вуэмъёс но ӵуказеяз ик бурмозы шуыса кожало, но озьы уг луы ук. Мон азьланез сярысь малпаськисько. Мыным 42 арес гинэ ай, аръёс ортчыса, пыдын ветлэмелэн пайдаез шӧдӥськоз, оскисько, — мылкыдзэ вераз Н. Иванкова.


Скандинав амалэн ветлонъя 4-тӥез калыккуспо фестиваль Киров нимо паркын 10 часын кутскоз. Отчы пыриськыны быгатозы вань мылкыд карисьёс. Кужымзэс мертаны быгатозы, 3, 5, 10 иськемез ортчыса, озьы ик луоз 42 иськеме марафон. Ужрад улсын ортчозы капчи атлетикая марафон, кырӟалозы, эктозы пӧртэм коллективъёс, фестивале лыктэмъёс тазалыксэс эскерыны быгатозы. Ужрадэ пыриськыны мылкыдды сярысь ивортоно udfesca.ru сайт пыр. Юалляськоно (3412) 659-965 телефонъя.

Ангелина Снигирёва

Ангелина Снигирева
By Ангелина Снигирева 8 августа, 2019 16:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<