Мон мукет, соин шудо

Ангелина Снигирева
By Ангелина Снигирева 26 августа, 2019 11:41
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Туризмъя но киужъёсъя элькун центрын 20 арлэсь ятыр ужа ни Вера ФАРДИЕВА. Со шаерамы гинэ ӧвӧл, быдэс Россиын одӥгез быгатӥсез куиськись луэ. 2017-тӥ арын Санкт-Петербургын ортчем «Русь мастеровая» вожвылъяськонысь 1-тӥ интыен бертӥз. Тыршемез пусъемын уно грамотаосын но тау каронъёсын, одӥгез соос пӧлысь — Удмурт Правительстволэн Данъян грамотаез. Солэсь куэм-вурем дӥсьёссэ туж яратыса нулло быдэс шаерысьтымы калык культураез дунъясьёс. Ассэ но ӵемысь пумиталод ас киосыныз пӧрмытэм дӥсеныз.

В. Фардиева

Тодмо луэме потылӥз!

— Зэмзэ верано ке, пичи дыръям малпасько вал: будӥ ке, одно тодмо суредась луо, — шуэ Вера Николаевна. — Малы одно ик тодмо? Малы ке шуоно лыдъясько, мар ке уж борды кутскиськод ке, сое умой-умой лэсьтоно, аслыд сяна, мукетъёсызлы но мед яралоз.

Но тодмо луыны малпанъёсы вал ке но, ачим школаын туж огшоры дышетски. Пукылӥ кытын ке но шор партаос сьӧрын, туж уг яратӥськы вал адямиослэн син азязы луыны. Горд йырсиелэсь возьдаськылӥ шуоно ке, озьы ӧвӧл, дыр, угось монэ ноку исаллямзы ӧвӧл. Удмурт виры золгес шудӥз, дыр, вордскиськем ни сыӵе сямын.

Суредаськыны, зэмзэ но, туж яратылӥ. Бадӟым классъёсын та предметъёсъя дышетӥз Надя апае, со мынэсьтым 7 ареслы бадӟымгес, йылпумъямын ни вал Чайковскийысь искусствоосъя колледжез (соку училищеез). Классамы мон редколлегие пырылӥ — урокъёс бере стенгазетаос лэсьтыны кыльылӥ. Уката но кельше вал шундыпуксёнэз акварелен суреданы. Жаляса верано, пичи дырысьтым одӥг суредэ но кылемын ӧвӧл — ваньзэ макулатурае сётӥськем, лэся.

Бадӟым семья

— Вордски мон Шаркан ёросысь Быгы гуртын. Семьямы бадӟым: бабушкамы, дедушкамы, папамы, мамамы но 6 пиналъёс: 4 пиос, 2 нылъёс. Мон ньылетӥез. Туж кибашлы вал дедушкамы — пуэн вырыны яратылӥз. Трос лэсьтылӥз наличникъёс. Нош скрипкаоссэ, Шаркан ёросэ сяна, палэнысь районъёсысь клубъёсы но басьтылӥзы. Мунчо азямы косяк дурын сылӥз куиськон станок — таиз сьӧрын пукыны яратылӥз бабушкамы. Егитгес дыръяз валес шобретъёс куылӥз, берлогес ини – выж лёгетъёс. Сӥньысъёсыз тугасько ке, катушкае сӥньыс бинёно ке, монэ но юрттыны косылэ вал. Но малы ке соку мон куиськонлэсь чеберзэ ӧй адӟылы на. Пӧзь, носки керттыны вырылӥ.

Папамы но мамамы ужазы колхозын — механизатор но доярка. Ӵошен гын сапег гындо вал. Ми, пиналъёс, туж шумпотыса нуллӥм со сапегъёсты — шунытэсь ук!

Ф. Фардиевалэн анай-атаез

Пичиысен ик братъёсы но олома но малпало-лэсьто вал: одӥг полаз снегоход бичазы, мукет дыръя — клеёнкалэсь дельтаплан, гуртысьтымы гурезьысь лобаны но выризы. Будыса ни пичиосыз братъёсы корка пуктыны кутскизы. Уртче кариськыса, ог 30-зэ ӝутӥзы, дыр! Милемлы но Иже юртъер пуктыса сётӥзы. Ӵыжы-выжыосмы сяна, муртъёс но юрттӥськыны курыло. Бадӟымез братмы техника котырегес кыстӥське.

Заводысь — училищее

— 11-тӥ классэз йылпумъяме бере сузэреным Иже кошким. Со — Удмурт кун университетысь худграфе дышетскыны, мон — радиозаводэ ужаны. Туж шумпотӥ: мӧзмыт коть уз луы, ӵош улӥм.

Радиозаводын пӧртэм удысъёсты ӵектӥзы вал, мон намотчица луо, шуи. Яраз ужан интые — югыт, шуныт. Уже секыт ӧй вал — катушкаосы векчи езъёсты биньылоно. Ятырзэ уждэ тон понна автомат лэсьтэ ни, проводлэсь пумзэ гинэ паять кароно на. Озьы ог 4 ар ортчиз. Али малпасько ни: намотчицалэн ужез туж ик пӧртэм ӧвӧл куиськонлэсь. Но дышетсконо шуыса валасько ик вал. Тодӥ: культурая училищеын киужъёслы дышетыны кутскизы. Талэсь азьло декоративно-прикладной искусствоя специальность отын ӧй вал. Отчы пырон понна экзаменъёс сётоно — живопись, рисунок, композиция, история…

Историен экзаменэ ӧй вуы — кӧлэме кылиськем. Али паймисько, озьы но луэ вылэм шуыса. 2-тӥ араз нош ик училищее ик мынӥ но экзаменъёс пыр потӥ ни.

Возьдаськонме вунэтыны кутски

— Культурая училище улонме быдэсак воштӥз. Туж яраз отын дышетскыны — выль эшъёс, визьмо дышетӥсьёс. Котькуд четверглы быдэ ветлӥськом вал эктыны, кырӟаны, дышетскисьёслэсь концертсэс учкыны. Сыӵе кельшылӥз! Аслам кырӟаме но эктэме но уг луы, ярам, киосы мыно. Концертъёс дыръя вожъяськыса учкисько вал: кыӵе дӥсьтӥсесь, кепырасьтэмесь та нылъёс-пиос. Оло, соос шоры учкыса ик, ачим но возьдаськонме вунэтыны кутски.

Аслаз вуем дэремез

Училищеын дышетӥзы чебер вераськыны но, суредаськыны но. Дышетски керамикалы, пу вандылыны, татын нырысьсэ пукси куиськон станок сьӧры. «Тень Алангасара» кино учки но уката мургес шӧдыны кутски кадь удмуртлыкез, калык творчествоез. Туж яраз отысь юсьлэн костюмез. Соку ик малпай: диплом уже но юсьлэн дӥсез луоз. Куи сое толэзь ӵоже, собере вури на. Аслым но дӥсе туж кельшиз — туала шӧмъем карыны выри. Вурытозям олокӧня пол ас вылам но мерталляй! Бен, ульча кузя юнме сое уд нуллы — сценической. Кельтӥзы училищелэн архиваз.

Пӧртэм пужыос

— Училище бере Киужъёсъя центре ми огдыре 3 кузя лыктӥм — мон, Надежда Мансурова но Ксения Русинова. Отделэнымы кивалтӥз Альбина Вениаминовна Ядыгарова. Солы туж бадӟым тау! Училищеын милемын одӥгезлы дышетӥзы, нош улонын тросэз чылкак мукет сямен вылэм. Альбина Вениаминовна милемлы мачкиз, кызьы станокен ужано, кыӵе куиськон амалъёс вань, кыӵеесь пужыос луо.

Киужъёсъя центрын ужаны кутскыса ини, мон, кылсярысь, тодӥ: пужыын пуктӥськись кизили луэ воргоронлэн но нылкышнолэн. Нырысетӥез меӵак пужыятӥське ке, кыкетӥез — кеӵевыл карыса. Нош уйпал ёросъёсысь выль
кенъёслы айшетазы огдыре воргорон но, нылкышно но кизили пукто вылэм. Бызем-басьтэмез со возьматэ, пе.

Уйпал удмуртъёслэн пужыоссы небытэсьгес. Пужыято соосты горд, тӧдьы сӥньысъёслэсь — пужыоссы ӟучъёслы матынгес. Нош лымшор удмуртъёслэн тюрк калыкъёсын артэ улэмзы шӧдӥське. Пужыоссы яркытэсь, пӧртэм буёлоесь.

Пичиеныз пиеныз

Нош мыным сюлэмыя шор удмуртъёслэн пужыоссы. Вазен экспедициосы ӵемысь потаськом вал. Туж тодӥсько на Шаркан ёросысь Сосновкае вуылэммес. Отын милемлы сомында вашкала ӵушконъёс, шортдэремъёс возьматӥзы, сомында орнаментъёс шедьтӥм соку. Шарканъёслэн пужыоссы кораса лэсьтэмын — лымшор палъёслэн кадь ик. Но трос пумо сӥньысъёсты соос уг куто, пужы пукто одӥгеныз ик. Со сяна, тросаз удмурт пужыос кылдо ромбъёслэсь, кизилиослэсь — быдэсак геометрия. Нош шарканъёслэн дӥсьёсазы адӟисько будосъёсын герӟаськем пужыос но. Эксэй вакытъёсы ай Шарканын куиськон фабрика ужам, революция бере но соку ик пытсаськымтэ. Отын олокызьы но пужыятӥськиллям. Озьы фабрикаын куэм дӥсьёсты учкыса ик, калык аслыз но со пужыосты басьтыны кутскем, вылды.

Сосновкаысен ик мон туж зол синмаськи шортдэремлы. Тӧдьы, кильымо-кильымо. Аслым ачим сое вуроно кариськи, ӧжытак туала шӧм пыртыса — тыбыраз шаркан пужы куыса пуктӥ. Туж яратыса нуллӥсько. Нош дэреме дэбес дӥсьлы матын, пужыез — векчи клетка, тыбырыз озьы ик куэмын.

Вашкала дӥсе, чеберъяськон арбериосы ӧжытак туала шӧм пыртӥськод ке, туж чебер адӟисько. Кылсярысь, чыртывесьёсты табере пичиесь гинэ лэсьто на, коньдон борды бисер но ватсало. Озьы удмурт шӧмыз но кыле, нуналлы быдэ но дӥсяны луэ.

Дышетон

— Киужъёсъя центрамы вань мылкыд карисьёсты куиськыны дышетӥськом. Соос асьсэос юалляськыны пыро, курсъёс уд радъяське-а шуыса. Лыкто егитъёс но. Но тросгес — пенсие потэмъёс, ваньмон дырзы тросгес луэ ке, киужен выремзы потыны кутске. Огшоры выж лёгетъёс гинэ кулэ ӧвӧл соослы! Одӥгъёсызлы — айшет, мукетъёсызлы — ӵушкон но эшшо маке. Тросэз коллективъёсы кырӟаны-эктыны ветло. Кылсярысь, Дэри ёросысь Подшивалысь «Дэмен» коллективен туж эшъяським ни. Мастер-класс ортчытыны асьмеос но доразы потамы. Асьсэос но центрамы ӵемысь вуыло.

Дорамы курсъёсты кинъёс ортчо, пӧлысьтызы тросэзлэн выльысь но выльысь лыктэмзы потэ — яке кыӵе ке юанзы кылдэ, яке выль пужызэс возьматэмзы потэ, куддыр огшоры гинэ адӟиськыны но пыро. Озьы милемлы но ӟеч мылкыдзэс кельто.

Марлы дышетӥз Альбина Ядыгарова, солы табере асьмеос калыкез но, выль лыктӥсь специалистъёсты но дышетӥськом. Надежда Мансуроваен туннэ нуналозь ӵош ужаськом, бордамы кемалась ӧвӧл лыктӥз егит специалист Алина Вахрушева, УдГУ-ысь Искусствоосъя институтын дышетске на. Озьы отделамы али 3 кузя. Коллективмы туж умой. Центрамы гань-гань, ваньмы ог-огмылы юрттӥськыны дасесь. Мон, кылсярысь, кемалась ужасько ни ке но, выль эскиз малпасько, кыӵе ке пужы шедьтӥсько ке, одно мукетъёсызлэсь но мылкыдзэс юасько. Творчество дурыныз уртче! Ӟеч сюлэмын кенешиськод, усьтэм мылкыдын улӥськод ке, уж но каньылэн мынэ, лэсьтэм арберияд но лул пыре. Урод мылкыдын куиськиськод ке, пужы но кӧсыт луэ. Собере сӥньысъёс но одно тугасько. Ӵуказеяз соосты выльысь сэрттоно луоз.

Ӵош ужась эшеныз Н. Мансуроваен

Санкт-Петербургын ортчем «Русь мастеровая» конкурсын вормон капчиен ӧз сётскы — отчы быдэс Россиысь мастеръёс люкаськизы. Ваньзы сямен ик кускерттон куонэн гинэ выро — та удысын зол специалистъёс. Нош мон трос профилен ужась шуод-а, мар-а. Вормыны нырысь ик юрттӥз аспӧртэм пужыятӥськеме.

Балиш но табань

— Али ӵемысь малпасько: куиськись ӧй луысал ке, кыӵе удысэз бырйысал? Номыр йырам уг лыкты. Озьы хоббие — уже. Дорам но 2 куиськон станоке. Одӥгзэ вазен басьтӥ ни вал. Кыкетӥзэ кузьмаз дедушкамылэн племянницаез. Вазен со ачиз куиське вал, дугдӥз но мыным сётӥз. Жаляса верано, бабушкамылэн куиськон станокез ӝуаны шедиз.

Дорын аслым ке уг куиськы, заказъёсы одно луо. Берло дыре тросгес юбкаос, воргорон дэремъёс куро. Эскизъёс но ачим ик малпасько — творчество мыным туж кельше.

Куиськон станок сьӧрын тросгес пукыны шедьтӥсько ке, кузпалы ӵашетыны кутске ик. Но монэ со вала. Ачиз но быдэс юбка куыса кузьмаз ни мыным! Ма, ялан котыртӥм берга — кызьы но кызьы куиськиськод, пе. Пуксьы но оскалты, шуисько. Пуксиз — дышиз. Солы уката но кельшиз пужыос пуктылыны. Пужыятӥськыку ваньзэ лыдъяно-чотано, кырыж-мерыж медаз луы шуыса. Нош со математикаез гажа. Ужамын бухгалтер луыса. Али сантехнической ужъёслы проектъёс лэсьтон бордын тырше.

Кузпалы бигер выжыысь — Рамиль. Соин семьяямы котьку православной но, мусульман но праздникъёсты пусйиськом. Балиш но пыжиськом, табань но котӥськом. Пересьмон (перпеч) сиыны Шаркан палъёсыгес бертылӥськом — Выль аре но гужем вылтӥ одӥг пол.

Вурем дэремез

Бордамы улэ картэлэн мамаез. Со но туж юрттӥське ай корка котырын. 2 пиосмы будо, 16 но 9 арес соослы. Бадӟымез пуэн вырыны яратэ. Пичиезлэн но бере кылемез уг поты. Татчы центре лыктэ ке, одно ик ваське Евгений Бикузин доры — со бордын аслыз я карандаш вӧлоз, я пичияк шудон. Куиськыкум ну котыртӥм берга — ку, пе, мыным станок сьӧры пуксьыны луоз ни.

Ваньмон дыры пичияк кылдэ ке, шутэтскисько семьяеным. Пиналъёсмы туж ярато доминоез, шашкиез но мукет ӝӧк выл шудонъёсты — ньыльнамы шудӥськом. 2 велосипедмы вань. Картэ туж ик уг яраты соин ворттылыны. Соин я пиосмы асьсэ понна ворттыло, я мон кудӥнызы ке потӥсько. Пичиеныз пиеным пыдын бызьылыны но потаськом. Озьы, яратоно уже сяна, семьяе, таза улонэн эшъяськон лулпушме ганяк каро. Так мон каллен адями. Но куд-ог дыръя уродъяськисько ик — бордам кин ке лекъяське ке, солэн керӟегез мыным но паласькыны быгатэ. Таӵе учыръёсы буйгатскыны юртто на шоколад но бакча емышъёс.

Улонам номырзэ ӧй воштысал — аслым шудо потӥсько. Нырысь ик, мукетгес луисько шуыса. Нош аспӧртэм монэ каре удмурт луэме. Огшоры удмурт гинэ ӧвӧл мон, ас выжыосме тодӥсько, песянай-песятайёсылэсь культуразэс, сям-йылолъёссэс пушкам возисько. Со сяна, соосты утьыны, будӥсь пиналъёсмылы пыӵатыны быгатӥсько. Шумпотымон, берло дыре тросэз егитъёс но калык культураез, сям-йылолъёсты, дӥсез валаны кутскемын ни.

Элина Кумачёва

Туспуктэмъёс басьтэмын геройлэн архивысьтыз

Ангелина Снигирева
By Ангелина Снигирева 26 августа, 2019 11:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<