Кытын улэ Шӧртчи?

Ангелина Снигирева
By Ангелина Снигирева Август 14, 2019 17:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Макем тупаса улэ гуртысь калык, макем выжыоссэ гажа — сокем гурт шулдыргес, чебергес, улон-вылон но умойгес. Пичи Пурга ёросысь баграш-биграос одӥг семья кадь уло — ӵошен ужало но, шулдыръясько но.

Бигралан выжыослы сӥзем пумиськон ортчиз
Фото: «Баграш-Бигринское МО»

Ӝоген гуртын «Даур шыкыс» музей усьтӥськоз — сое биграос вемеен лэсьто. Алигес Николай Соколов кибашлылэсь музеез пуктон понна сюлмаськемзэ дунъязы — со Тимченко фондлэсь коньдон кузьым басьтӥз. Татын озьы ик «Шӧртчилэн гуртэз» проект улонэ пыӵа — та улсын ик пӧсьтолэзьлэн пумаз Воршуд возь вылын ортчиз «Бигра бӧляк ӧтчаське» шулдыръяськон.

Ужрадэ бускель гуртъёсысь, мукет ёросъёсысь, Удмуртилэн палэнысьтыз калык вуиз: Татарстанысь, Башкириысь, Киров улосвылысь, Москваысь но Новосибирскысь. Со сяна, биграослэн ужрадазы пыриськиз Ева Тулуз — удмуртъёслэсь сям-йылолъёссэс эскерись француз тодосчи. Соин ӵош вуизы Венгриысь, Эстониысь, Финляндиысь студентъёс.

Тӧр шорын вал баграш, ботё но шумбрей бӧлякъёс. Соос азбаръёсазы ӧтчаськизы, семьяосазы утиськись сям-йылолъёсын тодматӥзы. Шумбрейёс выль корка пыризы, баграшъёс выль кенлэсь сандыксэ учкизы, ботёос кӧкыын нуныез веттазы.

Гуртэ вуизы кунгож сьӧрысь но куноос
Фото: «Баграш-Бигринское МО»

— Бӧлякъёсты огазеяммы потӥз, — вера Елена Абдрахманова, Пичи Пурга ёрос библиотекаын ужась, «Гурт, кытын улэ Шӧртчи» проектлэн огез радъясез. — Оскиськом, азьланяз эшшо тросгес калыкез люканы быгатом. Ми возьматӥм, вашкала сям-йылолъёс али но возисько, соосты ортчытъяло шуыса. Ужрадмы этнопедагогикая уроклы тупаз — вашкала сямъёс тупаса улыны, выжыдэ яратыны дышето ук.

Ужрадэ тодмо кырӟась Алёна Тимерханова, «Айкай» театрысь солисткаос Диана Александрова, Лариса Петрова (Тимофеева) но Ольга Зайцева пыриськизы. Д. Александрова — бигра кен, нош Л. Петрова но О. Зайцева бускель Куреггуртын вордскемын.

Ваньзэсты серекъятӥз но шумпоттӥз «Такмак-баттл». Бигра бӧлякъёс, куреггуртъёс гурт улон-вылонзы сярысь, асьсэос сярысь кырӟаса лэзизы. Такмакъёсазы бӧлякъёссылэсь аспӧртэм сямъёссэс серекъяса возьматӥзы. Кылсярысь, шумбрейёс асьсэзыз тазьы серекъязы:

Болякъёс утиськем арбериосынызы адӟытон радъязы
Фото: «Баграш-Бигринское МО»

Шумбрей, шуо,

шумбрей, шуо,

Шумбрей ушъяськись, шуо.

Вань ке маин ушъяськыны —

Сьӧлык со ӧвӧл, шуо.

Василий Москвин, Пичи Пурга ёросысь Депутатъёслэн Кенешсылэн йырыз, ӵектӥз Баграш-Бигра гуртлы сӥзем 1 сюрс кылын словарь поттыны. Отчы вань биграослы тодмо интыос, адямиос, арбериос сярысь гожтыса кельтоно, пе, угось пересьёсын ӵош со тодон-валан — калыклэн узырлыкез — кошке. Ужрадын со аслэсьтыз кылъёссэ ӵектӥз. Кылсярысь, биграосты «Пуйка кенаклэсь кышкасьёс» нимаз. Кин со — Пуйка? Бигра вӧзысь Куреггуртын вордӥськем мамае но бӧрысь тодаз вайиз: песянайзы вож потыкуз соосты, нунокъёссэ, «пуйкаос» шуыса тышкаськылэм. Бигралан улӥсь йӧспӧртэм кышномуртэз озьы нимало вылэм. Улонэз капчи вылымтэ, нош нимыз — малы ке но — калыклэн тодэ ваёнъёсаз кылем.

Анастасия Шумилова

Ангелина Снигирева
By Ангелина Снигирева Август 14, 2019 17:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<