Кылымтэ-адӟымтэ улсын кариськыны уг яра

Ангелина Снигирева
By Ангелина Снигирева Август 7, 2019 15:35

Россиысь ог 40 улосъёсысь 191 городъёсын ортче «Тест на ВИЧ. Экспедиция-2019» ужрад. Пӧлазы — Удмуртия но. Малы со кулэ?

10-15 минут куспын

ВИЧ-инфекциен нюръяськонлы сӥзем ужрадлы Россиысь Тазалыкез утёнъя министерство кутскон сётӥз кылем арын. Туэ со нош ик азинтӥське. Нимысьтыз тӥрлыкен автобусъёс ортчо кунысьтымы улосъёс пыр. Котькуд мылкыд карись адями отын ВИЧ-лы, нимзэ шараятэк но дун тырытэк, эскериськыны быгатэ. Анализ лэсьтӥське ог 10-15 минут ӵоже. Инфекционистъёсын ӵош визь-кенеш сётыны дась психолог но.
Акцие пыриськись автобусъёс Удмуртия пыр ортчизы кылем арня вискын. Кожылӥзы ваньмаз сямен городъёсы — Сарапулэ, Можгала, Глазове, Воткае. Берло нуналаз дугдӥзы Иже. Оглом 1 сюрлэсь ятыр адями вазиськиз специалистъёс дӥне. Пӧлазы — егитъёс, арлыдоос, огшоры ужасьёс, кивалтӥсьёс…
Эскериськиз Удмуртиысь атайёслэн кенешенызы кивалтӥсь, Иж город администрацилэн йырызлэн улон-вылонын юрттэт сётон политикая воштӥсез Дмитрий Чистяков но.

— Та чер кышкатъяны кутскиз кылем даурысь 80-тӥ аръёсы, но туннэ но со сюлмаськытэ, — вераз Дмитрий Александрович. — Бен, инфекциез муре пыӵамлэсь кортнаны амалъёс шедьтӥм ни, но быдэсак вормыны ум быгатӥське на. Соин ик нимысьтыз саклык висъяно солэсь утиськонлы. Будӥсь егитъёс тодыны кулэ, кызьы чер вӧлме, кызьы солэсь утиськоно, малы дырын-дырын ке но эскериськоно. ВИЧ вань бере, кышкытлык кылдытэ бере, со сярысь ӵемгес верано.
Дмитрий Чистяков бере кыстӥськизы мукетъёсыз но. Сергей, кылсярысь, Иже вахта амалэн ужаны Ставрополье улосысь лыктэм. Лэсьтӥськон удысын тырше. ВИЧ-лы эскериськыны ӧтись автобусъёсты, ульчаетӥ ортчыкуз, синйылтэм. Шутэтскон нуналэ, пе, тупаз.

— Малпай: малы эскериськонтэм, куке юромо нокытчы мынонэз ӧвӧл, соку ик анализдэ но верало, — шуэ воргорон. — Ижын 6 толэзь ужасько ни, больницаостӥ ветлыны дыры ӧвӧл. Дор палам диспансеризациез ортчыса, городады лыктӥ вал. Семьяе ӧвӧл, сотэк такема ӧй чидасал палэнын ужаны…

Удмуртиын ортчиз «Тест на ВИЧ. Экспедиция-2019»
Фото: Э. Кумачева

Гракын сяна…

Ужрадлы йылпумъян лэсьтӥзы Иж город администрациын. Люкаськизы соос, кинлэн ВИЧ/СПИД сярысь кылымтэ-адӟымтэ улсы кариськемез уг луы. Кивалтӥсьёсын, эмчиосын ӵош зал тыр тырмизы волонтёръёс.
Кун Кенешлэн Тӧроезлэн воштӥсез Надежда Михайлова тау кылъёссэ вераз акцие пыриськисьёслы туж кулэ, ӟеч уж лэсьтэмзы понна. Роспотребнадзорлэн Удмуртияя ёзэныз кивалтӥсь Наталья Матюшина но пусйиз таӵе акциослэсь кулэлыксэс. Угось ВИЧ-инфекция туннэ, Грак ёросын сяна, элькунысьтымы вань городъёсын но ёросъёсын пусъемын ни.
ВИЧ-инфекцилэн аляны кутскемез сярысь ООН ивортӥз 1988-тӥ арын. Удмуртиын нырысетӥез черлам мурт шараямын вал 1997-тӥ арын. Туннэ нуналлы элькунысьтымы СПИД-эн нюръяськонъя центрын учётын 8 сюрслэсь ятыр адями сылэ. Пӧлысьтызы 60 процентэз — воргоронъёс. Данакез, ог 77 процентэз, — 25-44 аресъемъёс. ВИЧ-инфекция кырмиськемын 17 пиналлы но. «Тест на ВИЧ. Экспедиция-2019» акция дыръя 1 сюрс 94 эскериськемъёс пӧлысь ог 15-езлы мургес анализъёс лэсьтоно луоз.
ВИЧ-инфекция вазенгес шараяськиз ини ке но, со сярысь дӥсьтыса вераськыны кутскиськом берло аръёссэс гинэ. Ужрадэ люкаськемъёс тодазы вайизы, кызьы ог 3 ар талэсь азьло шаерамы вуылӥз Казаньысь Светлана Изамбаева. Россиын со нырысьёсыз пӧлын шара вераз ВИЧ-ен черламез но кыӵе шуг-секытъёсын пумиськылэмез сярысь. 35 аресъем нылкышно туннэ 4 пиналъёслэн анайзы луэ (2-ез аслаз, 2-ез вордосэ басьтэмын). Ӟеч анай сяна, со синмаськымон кузпал но. Ужа СПИД-центрын психолог луыса, усьтӥз аслэсьтыз благотворительной фондзэ, ВИЧ паласькемъёслы юрттонэн выре.
Ӵапак С. Изамбаева шаерамы вуылэм но эмчиосын, волонтёръёсын пумиськылэм бере, шаерамы но югдур ӧжытак воштӥськиз — ВИЧ сярысь шара вераськыны дӥсьтӥськом ни.

Огмында улон вапум

СПИД-эн нюръяськонъя центрлэн валтӥсь врачез Олег Горбунов верамъя, ВИЧ-ен нюръяськонлы сӥзем ужрадъёс элькунысьтымы пӧртэм интыосын али арнялы быдэ сямен радъяськыло. Ӵемысь отын ик анализ но сётыны луэ. Соослы луыса но пумен тросгес но тросгес адямиос эскерисько ВИЧ-лы. Берло 5 аръя учконо ке, тазалыксэс чакласьёс 2 поллы тросгес луэмын. Туэ гинэ 199 сюрслэсь ятыр адями тест-анализ лэсьтӥз ни. Со дыре ик ВИЧ инфекция паласькемъёс ӧжытгес луо.

— Туннэ шаерамы котькуд 100 сюрс адямилы пӧлысь 576 мурт та четлыке шедемын, — шуиз Олег Борисович. — Россиысь огъя лыдпусэн ӵошатыса, со 25 процентлы ичигес. Но каньылак кариськыны уг яра. Котькуд адями нырысь ик ачиз сюлмаськыны кулэ тазалыкез сярысь.

Малы адями тодыны кулэ, кырмиськымтэ-а бордаз ВИЧ?

— Данакез юнме шорысь уг малпа ВИЧ-лы анализъёс сётыны, — шуэ Олег Горбунов. — Улоназы, иське, вал сыӵе вакытъёс, куке та чер паласькыны быгатысал (ВИЧ палаське 3 амалэн: нылкышноослэн но воргоронъёслэн матысь кусыпъёссы пыр, вир пыр, кылсярысь, наркотикъёсын кушласькыку но анай пушкысь нунылы). Анализ сётыса, ВИЧ инфекция уг шараяськы ке, туж умой. Нош адями азьланяз малпаськыны кутске ни, кытын, кинэн, кызьы со дырзэ ортчытъя, ассэ умой возьыны выре. Нош ВИЧ инфекция шараяське ик ке, специалистъёслэсь дэмланъёссэс быдэсъяно луоз. Таза адямиосын ӵошатыса, солэн улонэз висъяськоз эмъюм юонэн гинэ.
Вазен ВИЧ-ен черлам муртъёслы сӥзё вал кӧня ке ар гинэ на улыны. Нош туала медициналы луыса ВИЧ-ен черлам но таза муртъёслэн улон вапумзы огкадь кыстӥськыны быгатэ.
«Тест на ВИЧ. Экспедиция-2019» ужрадэз ортчытӥсьёс Удмуртиысь кошкизы Киров улосэ. Соос тодэ вайыто: ВИЧ-лы эскериськыны луэ котьку. Со понна вазиськоно улон интыя терапевтъёслы. Эшшо умойгес — меӵак СПИД-эн нюръяськонъя центре. Интыяськемын со Ижысь Труд урамын 17а номеро юртэ, телефон номерез (3412) 21-15-94. Со сяна, центрлэн филиалъёсыз усьтэмын Глазов, Вотка, Сарапул, Можга городъёсын но Ува, Эгра каргуртъёсын. Анализ сётыны луэ, нимез шараятэк но дун тырытэк.

Ку верано, ку ӧвӧл

ВИЧ-инфекция паласькем мурт аслаз сюлмаськонэз сярысь уж сётӥсьёслы но, бускельёсызлы но, ӵош ужась эшъёсызлы но вераны кулэ ӧвӧл. ВИЧ-ен сэрен сое ужысь мозмытыны уг быгато.
Со сяна, сое кыл кутон улэ кыскыны уг луы висёнэз сярысь эмъясьёслы верамтэез понна но. Угось эмъясь паласькись черъёслэсь утиськон амалъёсты ужаз котьку кутыны кулэ.

Озьы ке но, ВИЧ-инфекция паласькем муртэ уголовной кыл кутон улэ кыскыны луэ висёнзэ мукет муртлы юромо паламез понна, кылсярысь, лушкем кусыпъёс тупатыса.

Элина Кумачева

Ангелина Снигирева
By Ангелина Снигирева Август 7, 2019 15:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<