Кукуй гуртын агрофестиваль ортчоз

Related Articles

• Журналистъёслэн спартакиадаязы «Удмурт дунне» газет нырысетӥ интыын мынэ 0 07.Фев
• Куастэс эн ватэ на! 0 17.Мар
• «Удмурт дуннеысь» иворчиос визь сынан «Шудкомын» азвесь интые потӥзы 0 29.Апр

9-тӥ-10-тӥ августэ Вотка ёросысь Кукуй гурт котырысь 20 гектар музъем вылын ортчоз агрофестиваль.

Кык нунал ӵоже радъяськозы пӧртэм мастер-классъёс, пудо вордон, роботъёсты но туала технологиосты улонэ пыӵатон, музъемен вырон, рапс будэтон юанъёслы сӥзем котырес ӝӧк сьӧрын кенешонъёс, семинаръёс.
Фестиваль дыръя фермеръёслы ужзэс азинтыны люкылозы Гурт удысъя но сиён-юонъя министерстволэсь грантъёссэ. Со сяна, возьматозы туала техникалэсь бусыын мар карын быгатэмзэ. Нимысьтыз адӟытон радъяськоз шаерысьтымы ӟеч пудоен. «ЙӧлВакыт» возьматон дыръя тужгес трос йӧл сётӥсь, котыр ласянь чебер пудоосты быръёзы, чемпион ним сётозы. Соосты дунъялоз калыккуспо судья Жолт Кёрёши. Племенной ужлэсь кудпала азинскемзэ валаны юрттоз та адӟытон.
Куноослы но мӧзмыны уз сётэ. Нылпиослы возьматозы, кытысь потэ йӧл, возьматозы эмбрионъёсын лабораториез, ворттылытозы валэн, ортчытозы киужъёсъя мастер-классъёс. Веръяны кылдоз гуртоосын лэсьтэм сиён-юон. «Гастрошоу» ужрад дыръя шеф-поваръёс возьматозы таза сиськонлы сӥзем мастер-класс. Радъяськозы конкурсъёс. Возьмало кузьымъёс.

Елена Сараматова