Кужымзы — мертантэм

Ангелина Снигирева
By Ангелина Снигирева Август 5, 2019 14:57
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ӟеч ужъёслэсь марафонлы пӧрмиз «Сила добра» благотворительной фондысь волонтёръёсын одӥг нуналэз ортчытон. Кӧня адямиез шудогес каризы фондысь мыло-кыдо нылкышноос!

Можгаысь Шепелевъёс
Фото: А. Снигирёва

Алёша

Волонтёръёсын пумиськи 30-тӥ июле, ӵапак соку Эшъяськонлэн нуналыз пусйиське вылэм. Соин но, дыр, быдэс нунал туж капчи мылкыдын, шумпотонэн тырмиз, кӧня ӟеч уж лэсьтӥськиз, кӧня адями пичи ке но шудогес луиз.
Но нырысь-валысь верасал «Сила добра» огазеяськон сярысь. Фонд сямен со ар ӵоже гинэ ужа ай, азьвыл волонтёръёслэн огазеяськонзы гинэ вал. Бурд улаз быдэс шаерысьтымы секыт югдуре сюремъёсты возе, быгатэмезъя эмъюмъёсын, сиён-юонэн, визь-кенешен юрттӥське, больницаосын кыллись нылпиос доры вуылэ. Кивалтӥсез — Алевтина Блинова, трос нылпиё анай, ассэ кивалтӥсь шуыны уг яраты, огшоры волонтёр нима. Адямиослы юрттӥськыны бадӟым мылкыдыз Людмила Богдановалэн но. Егит кышномурт Ижкарын парикмахерской возе. Но пичи ке но ваньмон дырыз сюре ке, мар ке пайдаёзэ лэсьтыны выре. Тани али но Можга ёросозь машинаеныз потыны ачиз ӵектӥськиз.
Туннэлы волонтёръёслэн 3 пумиськон чакламын. Нырысетӥез — Алексей Кузнецовен. 24 аресъем пияш Ижкарысь пересьёслэн юртазы улэ.

— Алёшаез ми Якшур-Бӧдья ёрос больницаысь шедьтӥмы. Отын со ӝыны ар пала кылле вылэм ини, нокинлы кулэ ӧвӧл. Угось нылпи юртын будэмын. Алёшалэн улонэз секыт. Со урод сямо адямиос пӧлы сюрем. Соосыз пияшез зол тышкаллям но сюрес дуре сэрпалтыса кельтӥллям. Врачъёс пияшез сопал дуннеысь поттӥзы, шуыны луоз. Но Алёша весяклы инвалид кылиз. Эмчиос шуо вал: малы тӥ соин выриськоды, со ноку уз но султы ни, оло, сиськыны но, вераськыны но уз быгаты. Но Алёша кужмо вылэм.
Волонтёръёс пияшлы инвалид луон сярысь документъёс бичазы, пересьёслэн юртазы шедьыны юрттӥзы. Угось Алёшалы огназ улыны секыт. Татчы сюремез бере пияш коляскаысь султылыны кутскиз, мар но со вераны быгатэ ни, ассэ ачиз утялтэ но. Берло дыре нуналлы быдэ зарядка лэсьтэ, пыдъёссэ выретэ.
Ма карыны быгатэмзэ со волонтёръёслы но возьматӥз — Алевтинаезлэн юрттэмезъя вамышъяз, турник вӧзын приседание лэсьтӥз. Волонтёръёс Алёшалы бакча емыш вайизы, чыры-пыры арбериос сётӥзы. Но кузьымлы сярысь, пияш огшоры вераськемлы, шуныт кыллы золгес шумпотӥз кадь.

Никитинъёс

Кыкетӥез пумиськон вал Пичи Пурга ёросысь Арина Никитиналэн семьяеныз. Егит анай 3 пиналзэ будэтэ: бадӟымезлы 4 арес, покчиезлы — 1 но ӝыны. Егит анай нырысетӥ пиналэныз воксё ульчае кылиз вал. Огдырлы, пыд йылаз султытозяз, Славиксэ нылпи юртэ сётоно кариськиз. Но анайлы пиналзэ уг берыкто ни вал. Югдурез воштыны юрттӥзы волонтёръёс.
Гуртазы нылпи садзы ӧвӧл, Арина пичи нылпиоссэ утялтэ, соин нокытчы ужаны кариськыны уг быгаты. Семья социальной пособиос вылын гинэ улэ, но со 3 пиналэз дӥсяны-сюдыны уг окмы. Секыт дыръя Никитинъёс доры волонтёръёс лыкто, сиён-юонэн, дӥськутэн юртто. Али но кыӵе шумпотӥзы пиналъёс емышъёслы, ческыт сиёнлы.
Ӝоген семьялэн эшшо одӥг шумпотонэз луоз. Никитинъёс Киясово черкогуртэ улыны потозы — материнской капиталэн корка басьтӥзы. Нылкышно садик сярысь но сюлмаськиз ни.

Шепелевъёс

Можга городысь Оксана Шепелева огназ будэтэ… 8 пиналэз. Кышномуртлэн семьяез адӟем карымон. Быдӟымез пиез Можга ёросысь гурт удысъя колледжын дышетске, покчиезлы 6 арес.
Нырысетӥ кузпалыз улонысь кошкем бере кыкетӥ ползэ бызиз. Но таиз картэз, секыт ныпъетэз чидатэк, семьяысь кошкиз. Нылпиосыныз уг ик адскылы, номырин уг юрттӥськы, пе. Озьы ке но семья та пумысен уг ӝожтӥськы.

— Нырысетӥ кузпалылэн анаеныз туж умой кусыпъёсмы, со милемын ӵош улэ, котьма карыны юрттӥське, — тау кылъёссэ вера кышномурт анайзылы.
Оксаналэн нылпиосыз туж йӧноесь. Нылъёсыз эктыны, кырӟаны ветло, спортэн выро, городын ортчылӥсь пӧртэм вожвылъяськонъёсы пырисько. Кемалась ик ӧвӧл Семьялэн нуналаз ваньзы ӵошен школа азбаразы эктӥзы. Пиос но анайзылы оскымон юрттӥсьёс ни.

— Мишамылы 13 арес, солэн киыз котьмалы мынэ. Тани пукон ачиз вӧлӥз ни. Мама, эн сюлмаськы, мон коркамес но лэсьто-тупатъяло, шуэ со, — шумпотонзэ вера Оксана Шепелева.
Семьялэн коркаез кык этажъем луоз. Но кыкетӥ этажез лэсьтымтэ на.
Ачиз но Оксана туж йӧно: городысь самодеятельной ансамбле кырӟаны ветлэ. Тэк улыны мӧзмыт, пе.
Нимысьтыз вераны кулэ Карим пизы сярысь. Солы 6 арес. Карим уг султылы, со гидроэнцефалиен курадӟе, йыраз мултэс ву люкаське.

— Мыным шуизы вал: нылпиосыд сотэк но трос ни, куштӥськы таизлэсь, солэсь тыро-пыдо адями уз луы. Но кызьы аслад лулпырыеныд, нуныеныд люкиськод?! — вера нылкышно.
Та семьяен волонтёръёс 4-тӥ арзэ ужало ни: нылпиослы школае мыныны ручка-тетрадьёсын, висись нылпизылы нимысьтыз чаклам эмъюмъёсын, сиёнэн юрттӥсько. Кемалась ик ӧвӧл фондысь волонтёръёслы луыса семьяын кылдӥз 2 ярусэн валес, макем шумпотӥзы нылпиос. Сое одӥг семья кузьмаз, асьсэлэн нылпиоссы будэмын ни, пе.

Сюлмо адямиос уно

— Ми котькудӥзлы шуг-секытэ шедем муртлы юрттыны тыршиськом, — вера Алевтина Блинова. — Но озьы тупа, дорамы юрттэтлы ӵемгес вазисько умой семьяос, секыт югдуре сюро ке. Куд-ог дыръя озьы луэ: одӥг пичи ӟеч уж адямилэсь быдэс улонзэ тупатыны юрттэ. Тани Можгаысь одӥг кышномурт фондэ вазиськиз вал. Юись кузпалыз быдэс квартиразэс сутэм, бускеленыз жугиськыса, пытсэт сьӧры сюрем. Озьы семья номыртэк кылиз, шуыны луоз. Волонтёръёсмы дӥськутэн, чыры-пыры арбериосын одӥг пол гинэ юрттӥзы. Та бӧрсьы семья пыд йылаз султыны быгатӥз. Табере кышномурт тау карыса жингыртылэ.
Мукетыз учыр но волонтёръёслэсь сюлмо луэмзэс возьматэ. Огазеяськонысь адямиос Эгра ёросысь семьяен тодматскизы. Ирина Матвеева огназ 5 пиналэз будэтэ. Ачиз кышномурт скал кыскись луыса тырше. 4-эз нылпиез школаын дышетске, одӥгез нылпи садэ ветлэ.

— Одӥг пол доразы вуим, учкиськом: азбарзы ӵужемын, чыпы-курегъёссы сюдэмын, бакча емышсы удалтэмын. Кеч ке но тӥледлы кулэ, шуисько. Нылпиослы йӧл: луоз. Нылкышно лулӟиз, ма вал милям кечмы, пересьмыса кулӥз, мукетсэ басьтыны луонлыкмы ӧвӧл. Ачим уг тодӥськы на, быгатом-а ум-а, нош кышномуртэз буйгатӥ, юрттом шуыса. Кышномурт сюлмаськыны кутскиз, киосы фермаын ужаса висё, пе, кыскыны быгыто меда. Шумпотӥ, нылъёсыз шуизы: ми, мама, кыском. Ӟеч адямиос шедизы, пичиятэм дунын семьялы кечсэс сётыны дась, бордаз дунтэк кечпи кузьмалозы на. Та арня вискын сюроосты Кияса ёросысь Эгра палъёсы ваём.
Уж волонтёръёсты ачиз шедьтэ. Уноез адямиос асьсэос мар ке ӟечсэ лэсьтыны, уксё висъяны дась луэмзэс верало. Озьы ик луиз Иже бертон сюрес вылысен но. Алевтиналы одӥг ужбергатӥсь жингыртӥз. Роллы лэсьтонэн выриськом, пе, но таяз учыре кин ке заказэзлэсь куштӥськем. Дась лэсьтэм сиёнэз начар улӥсьёслы сётысалмы, асьмеос ик таксиен келяны дась, пе. Озьы Ижысь Мария Соколовалэн семьяез нырысьсэ веръяз, мар со сыӵе роллы. Кышномурт огназ 6 пинал будэтэ. Кузпалыныз коркалы кредит басьтӥллям но тырыны быгатӥллямтэ, озьы улон сэрегтэк кылиллям, нош картэз кошкем. Табере нылкышно анаеныз но пиналъёсыныз квартира снимать кароно луо.


Та ӧжытэз гинэ секыт югдуре сюрем семьяослэн учыръёссы, волонтёръёслэн улонысьтызы одӥг гинэ нунал. Но со нунал шумпотонэн тырмемын. Угось кӧня нылпиос ӵукна сютэм уз сайкалэ, кесяськем-пасяськем дӥськутэн, пыдкукен уз ветлэ. Секыт югдуре сюремъёс быгато вазиськыны «Сила добра» фондысь адямиослы 89090517446 телефон номеръя 9 часысен 17 часозь. Та номеръя ик волонтёръёслы юрттэт ӵектыны луэ.

Ангелина Снигирёва

Ангелина Снигирева
By Ангелина Снигирева Август 5, 2019 14:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<