Каргуртлэн сюлмыз кысӥз

Ангелина Снигирева
By Ангелина Снигирева Август 9, 2019 11:14

Сюмси ёросысь Орловское каргурт 45 ар сяна уз улы, шуо вал. 1950-тӥ аръёсы татчы «Удмуртторф» огазеяськонлэсь предприятизэ кылдытыкузы, гыбед сомындалы гинэ тырмоз шуыса чаклаллязы. Предприятие пытсаськиз ни, нош гурт улэ на. Зэм, шуг-секытъёссы лачак.

Орловское каргуртын канализация люкъёс аналтэмын

Утись-вордӥсь быриз

1940-тӥ арын ужзэ мытӥз «Ижторф» (али — «Удмуртторф») огазеяськон. Нырысь-валысь со шаерысьтымы 6 предприятиез бурд улаз басьтӥз. Бӧрысьгес эшшо 5-сэ огазеяз на. Берлоосыз радын Сюмси котырысь нюр интыос сюризы. Орловское каргуртын улӥсьёс талы шумпотӥзы гинэ. 300-лэсь трос улӥсьёс угось гыбед поттон борды басьтӥськизы. Предприятие но гуртлы выль тус но выль шӧм пыӵатыны кутскиз. Ужась калык улон-вылонэз сярысь сюлмаськоно медаз луы шуыса, гуртэ школа, нылпи сад, клуб, санаторий пуктӥзы. Секыт азьын ужасьёслы льготаос сётэмын вал. Татысен гыбедэз уен-нуналэн ворттӥзы шаермылэн пӧртэм сэрегъёсаз, тужгес трос келяллязы Иже. Гыбедэн шунтӥськизы Удмуртилэн палэназ но. Эстӥськыны сяна, удобрение чот со мынӥз бусыосты, бакчаосты умоятыны. Озьы толэзьлы быдэ Орловское поттылӥз 30 сюрс тонналэсь уно гыбед. Араз — ог 400 сюрс тонна.

Но 1990-тӥ аръёслэн шоразы предприятие гуньдӥз. Иж газэн шунтӥськыны кутскиз. Орловское но 2010-тӥ арын газ пыртӥзы. Но шуныт вуэмен, татын улон-вылон воксё но шунытгес ӧз луы.

— Предприятие ворсаськем бере пашмыны кутскимы, — шуэ Орловское гурт поселениен кивалтӥсь Светлана Безденежных. — Каргуртэз утись-вордӥсь быриз кадь. Калык соку ик кин кытчы кошкыны кутскиз. Сюресэз возись быриз. Туннэ предприятилэн юртаз корт ӵыжатонъя завод ужа ик. Но калыклэн отчы кутскемез туж ик уг поты. Быдэс ёросысь адямиосты татчы уже утчало-ӧтё. Но малы ке ужасьёс кема уг чидало. Уждунэз пичигес шуо, лэся. Гуртысь пиосмуртъёс вахта амалэн отын но татын ужало — озьы ог 60-эз палэнэ ветло. Гуртын угось мукет уж ӧвӧл — сельхозпредприятие но ӧвӧл, фермер кариськись но уг сюры. Гидазы но ялан ичигес но ичигес пудо вордо ни. Парсь но курег возё на, нош скал — уг ни. Кышноослы уж вань ик: нылпи сад но, школа но, санатарий но ужало. Нылпиосмы но лачак. Дышетскыны 80 пинал ветлэ, нылпи садын ог 38 тэшкыли лыдъяське. Гуртамы туннэ ог 500 улӥсез. 2017-тӥ арын сярысь, со ог 200 муртлы ӧжытгес. Нош предприятие ужаку, 2 поллы но ятыргес вал. Ог 7 ар талэсь азьвыл шуак кулэсмимы: шор ёзо школаез 9 классъем кельтӥзы. 10-тӥ-11-тӥ классъёсы угось 4-8 нылпи сяна ӧз лыктылы — 9-тӥ классэз йылпумъяса, кин кытчы дышетскыны кошкылӥз. Нош школа бадӟым дыръя калык возиськылӥз ик.

Ёрос центрлэсь люкиськыло

Сюресъёссы начаресь: тулыс но сӥзьыл зор-кот дыръя быдэс толэзьлы сямен Орловское Сюмси черкогуртлэсь люкиське. Гужем зорыку машинаен но, автобусэн но пырыны-потыны уг луы. Таин сэрен рейсовой автобус огвакытэ татчы воксё ветлэмысь дугдылӥз. Али со понедельнике сяна уг вуылы. Райцентре мыноно ке, такси ӧтёно луэ. 1-1,5 сюрс манет тыр усе отчы-татчы ветлон. Та ласянь сюлэмзы тужгес висе арлыдоослэн — больницае сюрыны шугъясько. Светлана Безденежных верамъя, ватсаса рейс усьтыны секыт ӧвӧл — частникен огкыл шедьтыны луысал. Но сюрессы уродэн татчы автобуслэн кожемез уггес поты.

Сюмсие сюрон понна 2 сюрес чакламын. Котыр сюрес ог 36 иськем люкаське. Ӵапак со сӥзьыл но тулыс нӧд пӧлы вые. Но гуртоослэн меӵак сюрессы вань на: 24 иськем. Со юнгес, гыбед поттонъя предприятилэсь кылем маке. Зэм, выжез начар, эскеронъёс возьмато: машинаос но автобусъёс улын куашканы быгатоз. Соин ик отӥ рейсовой автобуслы сюрес уг усьто.

— Предприятие куашкам бере сюресэз асьме кужымен возьыны тыршимы, — шуэ Светлана Германовна. — 2010-тӥ арын, котырысьтымы гыбед ӝуаны кутскем бере, гуртэз тылпулэсь ӵапак со сюрес ванен гинэ утьыны быгатӥмы — татӥ гинэ нюр интыосы техникаен сюрод. Алигес быгатӥмы со сюресэз «Удмуртавтодор» предприятилы сётыны. Июль кутсконын вазиськимы Транспортъя но сюрес хозяйствоя министерствое, выжез юнматыны курыса. Кылысалзы ке, быдэс гурт каньыл шокчысал. Соку, оло, гуртысьтымы пегӟись кулэсмысал.

Утялто асьсэос

Быдэс гуртын секыт югдур канализационной люкъёсын. Мукет гуртъёсын но городъёсын сямен, соослэн «ымъёссы» котырес корт табаосын пытсамын ӧвӧл. Вашкала проектъя дуръёссы кирпичен ӝутэмын. 4 сэрего луэмысьтызы, ӵоксэтлы ёрмыса, вылзэ пулъёсын ворсазы. Зор-кот улын пу сисьме, кирпич куашка. Нош со пась «ымъёс» сюрес вылын но, коркаос азьысь палисадникъёсын но интыяськемын. Быдэс гуртлы ог 70 люк люкаськоз.

Огаз сыӵе пасе тюаз Вадим Губинлэн ӵыжы-выжыез. Калгись пуныез уллян сяменыз кышномурт пыд улаз костаськись пулъёс вылтӥ ортчоно кариськем. Люк шуыса, тодаз но лыктымтэ. Сисьмем пулъёсын валче пушказ усем. Кышномурт ачиз потыны быгатымтэ ни. Гумыос вылэ усеменыз, пал пыдысьтыз лыосыз пыргизы. Пыд вылаз лёгиськемез али луэ ни, но огез пыдыз ог 4 сантиметрлы вакчигес кылиз. Ужез ялан пыд вылаз — парикмахер, сылыны секыт, мукет уж утчано луоз. Нош солы 43 арес гинэ.

— Нош нылпимы усьысал ке, — шуэ Вадим Губин. — Малпаны ик кышкыт. Быдэс гуртын сыӵе гуос лачак. Тужгес кышкытэз — кивалтӥсьёслы соос кулэ ӧвӧл. Нокин но соосты рос-прос ворсан, котыртон сярысь уг сюлмаськы. Гуртоос асьсэ кужыменызы палисадникысьтызы гуосты кин маин быгатэ, котырто ик, нош мукетъёсыз сярысь нокин уг малпаськы. Родняеным судъёстӥ ветлыкумы, «Жилкомснаб» управляющей компаниысь специалистъёс серем гинэ каризы: олокытӥ но медаз ветлэ, пе. Но пуэн ворсам гуосты куддыр колодча шуыса валаны но уг луы. Нылпиос юаса но уз улэ — тубозы но усёзы.

Светлана Безденежных верамъя, люкъёсты пуэн гинэ ӵоксаса толыкез ӧвӧл ни. Угось дуръёсысьтызы кирпичъёс куашкало ни. Соин ик соосты бетонлэсь кульчоосын юнматыны чакламын. Нырысь ик басьтӥськозы трос квартираем коркаос котырысь люкъёс борды. 2021-тӥ арозь ужъёсты йылпумъяны чакламын.

Елена Сараматова

Ангелина Снигирева
By Ангелина Снигирева Август 9, 2019 11:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<