Калыкын шулдыр но кӧттыр

Ангелина Снигирева
By Ангелина Снигирева Август 14, 2019 12:10

Котькуд ар гудырикошконлэн кутсконаз Можгалан Выль элькун шулдыръяськон ортче. Нырысь та ужрадэ Можгаын улӥсьёс гинэ пыриськылӥзы. Табере татчы пӧртэм ёросъёсысь куноос люкаськыло. Туэ 16-тӥзэ ортчиз ини. 4-тӥ арзэ выль емышъёсын адӟытон-вуз карон сямен радъяськиз.

Вылез котьку шулдырто кырӟась-верась коллективъёс
Фото: М. Мамонтова

Устооссэ данъян

3-тӥ гудырикошконэ Сюги шур дурысь возь вылэ 3 сюрслэсь ятыр адями люкаськиз. Валтӥсь сцена вылысен шуныт кылъёсын куноослы вазиськизы Можга карлэн йырыз Михаил Трофимов, ёрослэн йырыз Александр Васильев, Кун Кенешысь ялан ужась комиссиен кивалтӥсь, «Удмурт Кенеш» огазеяськонлэн тӧроез Татьяна Ишматова, йӧскалык политикая министр Лариса Буранова, гурт удысъя но сиён-юонъя министрлэн воштӥсез Наталья Шавшукова но мукетъёсыз. Ужрадэз усьтӥз «Удмурт Кенешлэн» Можгаысь ёзэтэныз кивалтӥсь Эдуард Петров.

— Туж шумпотӥсько, асьмелэн таӵе сяммы вань шуыса. Выль шулдыръяськон удмуртъёсты огазея но эшъяськытэ. Арысь аре ми, «кенешчиос», та ужрадэз тунсыкогес но паськытгес карыны тыршиськом. Огшоры шулдыръяськонысь со вуз карон-ярмаркалы пӧрмиз ини. Тау ваньмызлы, кин юрттэ праздникмес радъяны. Азьланяз но тазьы ик ӵош ужаны но, шутэтскыны но луонлык мед шедьтом. Вашкала удмурт сям-йылолъёсты утьыса, лулчеберетмес азинтыны мед быгатом, — пусйиз Эдуард Степанович.

25 арлэсь ятыр «Удмурт Кенеш» огазеяськон удмуртлыкез утён, азинтон но мукет выжы калыкъёсын ӟеч кусып юнматон понна ужа. Солэсь тужгес но устооссэ ёзчиоссэ Кузебай Герд но Ашальчи Оки нимо премиосын пусъе. 1997-тӥ арысен «Данъян» книга но кылдытэмын. Нош «Удмурт Кенеш» огазеяськонлэн Можгаысь ёзэтэзлэн аслаз «Данъян» пусэз вань. Сыӵе пусэн пӧртэм аръёсы ёросысь дано адямиос: Анатолий Комаров, Семён Павлов, Мария Никитина, Татьяна Иванова, Владимир Кузьмин, Пётр Кайшев но Люция Владимирова — сӥлы каремын. Нош туэ Можгаысь йӧскалык лулчеберетъя центрысь Наталия Перевощиковаез данъязы. Ӵапак солэн кичӧлтэмезлы луыса радъяське Выль шулдыръяськон но. Наталия Петровна огназ но та ужрадэз дасяны быгатысал, шуиз Эдуард Степанович, солы «Данъян» пусэз бырттыса.

— Котькуд адямилэн улоназ вань вунэтонтэм тодэ ваёнъёсыз. Мон понна со луиз Выль праздникез радъян но калыкез огазеян. Оген венез но уд ӝуты, шуо калыкын. Котьку вӧзад луыны кулэ ӟеч адямиосыд, оскымон эшъёсыд. Тау шуисько вань кузёослы, ужбергатӥсьёслы, эштос тӧроослы юрттэмзы понна, — сцена вылысен вераз Наталия Перевощикова.

Озьы ик пӧсь кичабонъёсын калык пумитаз ужбергатӥсез Светлана Семёноваез. Со 50 ар ӵоже вуз карон удысын ужа, «Удмурт Кенеш» огазеяськонлы юрттэ. Светлана Петровналы Можга карлэн тӧроез Михаил Трофимов администрацилэсь Данъян грамотазэ сётӥз.

Ческыт урамъёс

Ужрадэз сӥё-дано усьтэм бере калык выль кеньырлэсь пӧзьтэм ӝукез веръяны дыртӥз. Табань пыжисьёс дорысь но адями ӧз бырылы. Мылкыд карисьёс огдырлы кылдытэм Емыш, Йӧл, Сӥль, Чечы, Нянь но Чорыг урамъёсы пыразы, асьсэлы кулэ луись вузъёсты басьтӥзы. Тросэз вуз карисьёс татчы арысь аре лыкто, калыкез ческыт, асьсэ киын лэсьтэм-будэтэм сиён-юонэнызы паймыто. Соос радын Пичи Пурга черкогуртысь Герасимовъёслэн семьязы но. Леонид Иванович мушъёсын 15 ар выре ини.

Куноосты ӟечкылало удмурт азьветлӥсьёс
Фото: М. Мамонтова

— Азьло умортоосмы 100 пала люкасько вал, — вера мӧйы воргорон. — Берло лыдзэс кулэстӥм ке но, чечымы асьмелы сиыны но, вузаны но тырме. Туэ куд-ог интыосын мушъёс бырыны шедиллям. Милям 2007-тӥ арын сыӵе секыт югдур вал. Нош туэ мушъёсмес Инмар утиз.

Кузпалыз Любовь Алексеевна 40 арлэсь ятыр пудо эмъясь луыса ужам. Пенсие потэмез бере ваньмон дырыз тросгес луэм но, киужен вырыны кутскем. Адӟытонэ усточи йыр керттэтъёс, чыртывесьёс, суйпоскесъёс, пыдвылъёс но пыдлёгетъёс ваем.

Пичи Пурга ёросысь Уча черкогуртысь йӧл поттонъя предприятие но котькуд ар та ярмаркае пыриське. Вуз карисьёслэн верамзыя, калык туэ сырзэс вожмаськыса октэм.

Нош Чорыг урамысь маке быдӟа улэп сомъёсты адӟыны луиз. Соосты Вотка карысь ужбергатӥсь Анатолий Стерхов ваем. Со та ужрадэ нырысетӥзэ вуиз.

— 2 ар талэсь азьло пичи ферма усьтыны малпай. Алигес гинэ чорыгмес вузаны кутским. Табышмы туннэ нуналлы ӧжыт ай. Озьы ке но ужме азьланьтыны малпасько, — шуэ Анатолий Владимирович.

Можга ёросысь Кватчи гуртысь «Заря» хозяйство куноосты сӥльтыремен но пӧртэм пыжиськемъёсын куноятӥз. Соос но котькуд ар мылысь-кыдысь та ужрадэ пырисько.

Пичиослы но, бадӟымъёслы но

Но удмуртъёс та ужрадэз кылдэ ньылымон ческыт ӝук, пыжем сиёнъёс но пайдаё турын чай понна гинэ ӧвӧл, солэн шулдыр луэмез, капчи мылкыд кузьманы быгатэмез понна но ярато. Покчиез но, бадӟымез но пӧртэм вожвылъяськонъёсы пыриськизы. Валтӥсь сцена дорын кузпалъёс пӧлын «Азвесь сюрло» вожвылъяськон ортчиз. Соос карнанэн ву нуллӥзы, нылпиоссэс, выж лёгетэ пуктыса, ворттылтӥзы, тупен шудӥзы, бычкыен пу вандылӥзы но мукет ӵошатсконъёсы пыриськизы. Учкисьёслы тужгес но тумошо потӥз кузпалъёслэн гуждор вылтӥ куасэн ветлэмзы. Кудӥз-огез кӧтсэ кутыса ик серекъяз.

«Быдэ вуон» сэрегын но шулдыр вал. Та интерактивной площадкаез удмурт егитъёслэн «Шунды» огазеяськонзылэн Можгаысь ёзчиосыз радъязы. Надежда Сапожниковалэн кивалтэмез улсын соос мылкыд карисьёсты быдэ вуон вакытэн герӟаськем вашкала сямъёсын тодматӥзы. Кылсярысь, черсӥськыны, етӥн сэстыны, пу вандыны, нуны биняны, удмурт тыпыртон эктыны дышетӥзы.

Нош покчиос асьсэлэсь быгатонлыкъёссэс «Кӧжы-погъёс» вожвылъяськонын эскеризы. Можга ёросысь Поршур гуртысь Максимовъёс быдэс семьяен та ужрадэ пыриськизы но вормисьёс радэ потӥзы. Можга карысь сузэр-вынъёс Аня но Андрей Шумиловъёс, чебер жингрес куараенызы кырӟаса, асьсэлы синмаськытӥзы но озьы ик вормисе потӥзы.

Спортэн эшъяськисьёслы нимысьтыз площадка сӥземын вал. Воргоронъёс «Выль кужым» ӵошатсконэ пыриськизы. Кужмоез луиз Можга ёросысь Ныша гуртысь Константин Романов.

Котькуд ар «Паймымон емышъёс» но «Бакча сульдэр» адӟытонъёсысь аспӧртэмлыко ужъёсты синйылтыны луэ. Усточиос туэ но паймытыны быгатӥзы.

Валтӥсь сцена вылысен быдэс нунал ӵоже удмурт кырӟанъёс чузъяськизы. Учкисьёслы пӧртэм творческой коллективъёс «Калыкын — шулдыр, дорын — кӧттыр» концерт возьматӥзы. Нош собере «Эктоника» ваньзэсты эктыны-позыръяськыны ӧтиз. Тӥни озьы, ар ӵожелы тырмымон капчи мылкыд, сайкыт тодэ ваёнъёс кельтыса, шулдыр но аспӧртэмлыко ортчиз Выль элькун шулдыръяськон.

Мария Мамонтова

Ангелина Снигирева
By Ангелина Снигирева Август 14, 2019 12:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<