Калыклэн лулыз — со театр ӧвӧл

Ангелина Снигирева
By Ангелина Снигирева Август 21, 2019 10:22

Малы быдэс дуннеын этнотуризм вӧлме? Маин паймытыны быгатэ Удмурт шаер но татын улӥсь выжы калык? Кызьы калык культуралэсь чылкытлыксэ утёно? Та ужпумъёс эскериськизы гурт культуралы сӥзем «ГуртFest» фестиваль дыръя.

Лудорвайын гурт культураен тодматскон ортчиз
Фото: Е. Лекомцева

Кытчы пыриз 200 экскурсия?

Шаерамы гурт культуралы сӥзем фестиваль 4-тӥзэ радъяськиз ни. Отчы пыриськыло фольклор коллективъёс, калык культураен тунсыкъяськисьёс. Туэ но Дэри ёросысь «Лудорвай» музей-заповеднике трос калык люкаськиз. Удмуртиысь сяна, Москваысь, Казаньысь, Карелиысь, Эстониысь куноос вуизы. Кырӟан-веранъёс, вашкалаезлы но туалаезлы сӥзем мастер-классъёс, адӟытонъёс вал, «Удмурт Республикаын этнографияя туризм. Янгышъёс бордын ужан» котрес ӝӧк орчиз. Солэн ужаз пыриськизы культурая министр Владимир Соловьёв, калыкез улон-вылонын утён политикая но ужъя министр Татьяна Чуракова, тодосчиос, турфирмаосын, музейёсын ужасьёс, интыосысь кивалтӥсьёс но журналистъёс.
Удмурт кун университетысь Социальной коммуникациосъя институтлэн деканэз Лариса Баталова тодэ вайытӥз историез. Экскурсиос шаерамы ортчылӥллям ини 19-тӥ даурлэн пумаз ик. Нош 1924-тӥ аръёсы клубъёс борын экскурсиосъя комиссиос кылдылӥллям. Этнографияя экскурсиос ортчытъяны кутскем «Бӧляк» общество. К. Гердлэн ӵектэмезъя та общество кылдӥз 1922-тӥ арын Москваын. Огазеяськон сюлмаськиз удмурт культураез эскерон, азинтон сярысь.
Нош 1934-тӥ арын шаерамы кылдэм Россиысь пролетарской туризмъя но экскурсиосъя обществолэн Удмуртиысь кенешез (Совет ОПТЭ ). Республикалэн пӧртэм интыосаз экскурсиос радъяськылӥллям. Зэм, соос азьын кӧня ке мукетгес ужпум сылэм: предприятиослы, колхозъёслы юрттон, но висказ «туристъёс», тодон-валанзэс будэтыны быгатӥллям. Угось котькуд маршрутын одно ик культуралы сӥзем люкетэз вылэм.
1971-тӥ арысен Ижын ужаны кутскем путешествиосъя бюро. Со гинэ пӧртэм темая 200 пала экскурсия дэмла вылэм. Котрес ӝӧк сьӧры люкаськемъёс ӧпкелизы: жаль, со экскурсиос сярысь гожъямъёс кылиллямтэ. Бумагаосы кылиллям идеологиен герӟаськем ужпумъёс гинэ. Со вакытъёсы ик журналистъёс но калыкез Удмуртиен мыло-кыдо тодмато вылэм. Шуом, 1977-тӥ арын гинэ «Удмуртия» ГТРК Ижлы сӥзем 6 рос-прос передача дасям. Калык аслаз шаерез сярысь трос тунсыкозэ тодылӥз. Туризмен герӟаськем темаосъя гожъяськись журналистъёслэн творчествоя секцизы но вылэм.

Коллективъёс кырӟазы-веразы, шулдыръяськизы
Фото: Удмуртиысь культурая министерство

Ваньмыз куке но вал ни…

Озьы ке но совето вакытъёсы калык культуралы, сям-йылолъёслы, выжы калыклэн пуш дуннеезлы сӥзем экскурсиос ӧй вал, шуыны луоз. Этнографиен тунсыкъяськон будӥз берло аръёсы гинэ. Адямиослэн тодматэмзя потэ калыклэсь историзэ, культуразэ, осконъёссэ. Экспертъёслэн верамзыя, Удмуртия пыре Россиысь этнотуризмъя 15 тужгес тодмо улосъёс пӧлы.

— Асьмелэн ӧвӧл зарезьмы, гурезьёсмы, озьы ке но асьмелэн вань мае возьматыны, — пусйиз культурая министр Владимир Соловьёв.
Владимир Михайловичлэн верамезъя, али Кун Кенешын дасяло Удмуртиысь музейёсты азинтонъя законлэсь проектсэ. Отын вераськон мыноз нимаз адямиослэн музейёссы сярысь но. Угось огазеяськонъёс, учреждениос сяна, берло дыре туризмен вырыны кутскизы нимаз адямиос. Огласянь, со туж умой. Мукет ласянь, татын но кыӵе ке радлык луыны кулэ.
Владимир Михайлович пусйиз, берло дыре туризмез азинтон сярысь сюлмаськыны кутскизы республикалэн кивалтӥсьёсыз но. Пайдаез шӧдӥське ни. Азьвыл туризмлы республикаямы быдэс арлы 1 миллион манет пала висъяськылӥз. Марлы гинэ тырме вал со? Москваын удмурт Герберез радъяны гинэ 500-600 сюрс манет кошкылӥз. Нош али коньдон но тросгес висъяське, пӧртэм грантъёс басьтон бордын но уж шаплыгес мынэ.
Зэм, кивалтӥсь ӧпкелиз: куддыръя ваньзэ но возьматыны ум быгатӥське. Тани Москваын калык артист аслэсьтыз выступленизэ пичи залын ортчытэ, со доры 40 мурт лыктэ — умой. Нош милям 100 адями лыктэ но — ӧжыт, шуо. Калык доры вуыны амалъёс утчано, одно ик трос калык понна куректоно ӧвӧл, ӟеч уж ымысь ыме, пельысь пеле кошкоз, тӥ сярысь вералозы но, учкись, дорад лыктоз.
Та кылъёс борды итӥськиз «Турист» бюролэн кивалтӥсез Илья Кычанов:

— Куддыръя ми туж азьтэм луиськом, бугыръяськеммы, лыдӟиськеммы уг поты. Соин ик маке огдышемзэ басьтӥськом но возьматӥськом, яке выль велосипед малпаны кутскиськом. Но, оло, номыр малпанэз но ӧвӧл. Оло, ваньмыз со куке соку вал ни, шедьтоно, лыдӟоно гинэ…

Этнотуризм сярысь кенешон
Фото: Удмуртиысь культурая министерство

Пушкес ческыт медло

— Али ми бадӟым саклык висъяськом пӧртэм ужрадъёс пыр туристъёсты кысконлы — шуиз Эгра ёросысь шаертодонъя музейлэн туризмъя но экскурсиосъя ёзэныз кивалтӥсь Наталья Платонова. — Тодмо луизы Сибирь трактлы, Лӧпшо Педуньлы, бырем гуртъёслы, пельняньлы сӥзем ужрадъёс.
Эграос быгато грантъёсын ужаны. Нимаз пичи экскурсиос сяна, али малпасько быдэс нуналлы чаклам тур кылдытыны. Йырзэс тӥяло: кыӵе со луоз? Туристъёсты Сундур, Сэп, Мувыр, Кабачигурт, Чимошур, Бачкей, Сутэро гуртъёс пыр поттоно ке, воксё уз жаде-а?
Тани Глазов ёросын 10 часъем тур кылдытӥзы. Калык мед лыктоз шуыса, тур пушказы «Парафраз» театрлэсь спектакльзэ пыртӥзы. Озьы театрлэсь спектакльзэ адӟон понна адямиос кӧня ке час эскурсиосты чиданы дась. Озьыен, мукет интыосын но, пыжкем пушкы ческыт пушкес понэм выллем, маке туж тунсыкозэ чаклано.
Валаса ужано интыысь калыкен, кибашлыосын. Тани Сарапул ёросысь туризмъя методист Татьяна Сентякова вера: доразы 6 ар ӵоже ортче ни «Дулесовский валенок» ужрад. Туристъёс вуыло. Но та ужрадысь тӥ уд быгатэ басьтыны интыын лэсьтэм гын сапегъёсты. Соосты татчы Кукмор кемысь ваё.
Сарапулъёслэн бадӟым ужрадзы — «Высокий берег» праздник — ортче 2011-тӥ арысен. Таиз меӵак герӟаськемын этнографиен.

Алнаш ёросысь Кузебайысь коллектив
Фото: Т. Ишматова

— Отын кутӥсько Сарапул ёросысь гуртъёстӥ ветлыса люкам экспонатъёс, кырӟан-веранъёс. Кылем арын та ужрадамы быдэс Россиысь 37 фольклор коллектив пыриськиз, 5 сюрслэсь трос куноос вуылӥзы, — шуэ Татьяна Сентякова.
Этнографияя туризм ӟеч азинке Кияса ёросысь Карамас-Пельга гуртын но. Татысь удмурт культурая центрлэн кивалтӥсез Елена Белослудцева пусъе:

— Туристъёслы мадиськом удмуртъёслэн 3 сюанзы сярысь. Куноос ӵемысь вуо зэмос ужрадъёсы — юромо лэсьтэм театр представлениосы уг. Угось Карамас-Пельгаын удмурт сям-йылолъёс зол возисько на, выжы куаламы но вань.
Шумпоттэ соиз но, карамас-пельгаос зол ужало туроператоръёсын. Соин но татчы араз 7 сюрс 500 пала турист вуылэ.
Этнотуризмлэн ӵуказе нуналыз понна туж сюлмаське Пичи Пурга ёросысь Депутатъёслэн Кенешсылэн тӧроез Василий Москвин:

— Этнотуризм аляповатость шуонозь, кырӟан-веранозь гинэ медаз усьы вал. Эсэпсэ валано. Мон лыдӟылӥ мукет та выллем конференциосысь материалъёсты. Отын экспертъёс пусъё, шуом, кыӵе луыны кулэ зэмос калык дӥсь. Нош асьмелэн куддыръя мазэ-созэ валатэк выро. Тани удмуртъёс кырӟан кырӟало. Турист юа: мар сярысь? Ма, незнай, озь-тазь… Мурдалазэ валан ӧвӧл.
Люкаськемъёс огкылэ вуизы: этнография туризмез азинтонъя «Лудорвай» центрлы та выллем кенешъёс араз 2 пол ортчытъяно. Сям-йылолъёсын тодматӥсь маршрутъёсты кылдытыку, одно ик лыдэ басьтоно эспертъёслэсь верамъёссэс, сюлмаськоно туризмен вырись специалистъёслэсь тодон-валанзэс будэтон сярысь.

Елена Миннигараева

Ангелина Снигирева
By Ангелина Снигирева Август 21, 2019 10:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<