Йӧллы сюрес!

Ангелина Снигирева
By Ангелина Снигирева 22 августа, 2019 09:40

26 улосысь 160 мурт 50 машинаен пыриське Россиысь «Йӧллы сюрес!» 8-тӥ автопробеге. Пӧлазы Белоруссиысь, Польшаысь, Украинаысь но Израильысь куноос. Ортчизы соос Удмуртиетӥ но.

Вотка ёросысь «Мир» хозяйствоын
Фото: Гурт удысъя но сиён-юонъя министерство

Киров улосэз котыртэмзы бере шаеренымы тодматскыны вуизы гурт предприятиосысь йӧл поттон удыс котырысь специалистъёс, экспертъёс, кивалтӥсьёс. Асьмелэн вань маин данъяськыны. Совето вакытэн ӵошатыса, Удмуртия гинэ быгатӥз йӧл поттонын шӧдскымон ӝутӥськыны. 1985-тӥ арын 253 сюрс скаллэсь 580 сюрс тонна йӧл кыскимы ке, 2018-тӥ арлэн йылпумъянъёсызъя 117 сюрс скаллэсь люкаськиз 781 сюрс тонна йӧл. Сыр лэсьтонъя Удмуртия Россиын али 7-тӥ интыын, йӧл поттонъя — 8-тӥ интыын. Шаерамы лэсьтӥське 10 сюрс тонна нӧкывӧй но 5 сюрс тонна кӧс (сухой) йӧл. Гурт удысын тырше 25 сюрс адями.
Автопробеге пыриськисьёс кенешон дыръя ужпум ӝутӥзы: мар кароно тросгес но ӟечгес йӧл кыскон, уногес барыш поттон, хозяйствоосты утён понна? Кылсярысь, Калуга улосын арлы быдэ 20 процентлы уногес йӧл кыско. Тае валэкто огшоры: берло 5 арзэ хозяйствоосысь специалистъёс понна радъясько пӧртэм семинаръёс, дышетонъя курсъёс, пыӵало выль технологиос.
Удмурт шаер туннэ трос но ӟеч йӧл кыскисьёслы субсидия висъян понна дурбасьтэ, куд-ог улосъёс талы пумит луэмзэс верало ке но, субсидия гинэ уз юртты, шуо.

Йӧл поттонын субсидиос огкадесь луыны кулэ ӧвӧл шуыса лыдъяськомы, — кенешонысен пусйиз Удмуртиысь гурт удысъя но сиён-юонъя министр Ольга Абрамова. — Пӧртэм предприятиос пудо вордон но йӧл кыскон понна пӧртэм сямен сюлмасько угось.
Ӵектонъёс пӧлысь огез: субсидия висъяно идентификация пыр поттэм скал понна гинэ, скалъёсъя огъя федерал база кылдытоно. Та но мукет дэмланъёсын Россиысь Гурт удысъя министерствое вазиськемын луоз.

Дэри ёросысь Якшур гуртысь «Путь иЛьича» хозяйствоын
Фото: Гурт удысъя но сиён-юонъя министерство

Автопробеге пыриськисьёс тодматскизы Дэри ёросысь тепличной комбинатэн. Вуылӥзы та ёросысь ик «Путь Ильича» хозяйствое. Куноос адӟизы туала технологиосын скал кысконъя Afimilk залэз, йӧлэз но солэсь сиён-юонэз веръязы. «Путь Ильичаен» кивалтӥсь Пётр Чувашевлэн малпанъёсыз трос на: туэ кунянъёслы гид усьтозы, вуоно арын, 312 йырлы чакласа, ферма пуктыны кутскозы.
Куноослы возьматӥзы Вотка ёросысь «Мир» хозяйствоез но. Татын зэмен ик вань мае адӟыны: пудоез сюдэ компьютер, чакласа возе рационэз; 600 йырлы пуктӥське пудоез кезьыт амалэн возёнъя туала ферма, бордаз ӝужа эшшо собыдӟаез ик, куспазы таос герӟаськозы йӧл кыскон «Параллель» залэн.
Автопробеге пырисьёс озьы ик тодматскизы Вотка ёросысь «Пихтовка» чорыг вордонъя предприятиен. Со Россиысь огез устоез хозяйство луэ. Со сяна, вуылӥзы «Ижмолоко» но «Сарапул-молоко» заводъёсы. Куноос гуртоосмылэн ужаны быгатэмзылы синмаськемын но абдрамын.
Мукет дыръя ку ай быгатысалзы вань та предприятиосын тодматскыны? Адӟем-кылэм сяна, асьсэ ужан амалъёссы сярысь ог-огзылы веразы, валче ужаны кенешизы. Ӵектонъёссэс люкалозы но Россиысь гурт удысъя министерствое ыстозы.

Елена Сараматова

Ангелина Снигирева
By Ангелина Снигирева 22 августа, 2019 09:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<