Инвалидъёслы — уж, инкуазьлы — пайда

Ангелина Снигирева
By Ангелина Снигирева Август 12, 2019 16:44

Шаерамы инвалидъёслэн предприятиоссы чиньыен лыдъямон. Огез соос пӧлысь — Ижысь «Локомотив». Отын ог 200 мурт тырше, соос пӧлысь ӝыныез — 97 адями — инвалидъёс.

Экструдер
Фото: А. Поздеев

17 пумо вуз

Предприятие 2010-тӥ арын ужаны кутскиз, сое усьтон понна сюлмаськиз Удмуртиысь Инвалидъёслэн огазеяськонзы.

— Закон куре ке но 100-лэсь трос ужасьёсын предприятиосты инвалидъёслы инты висъяны, ӧжытэз талы дасесь, — вераз Инвалидъёслэн огазеяськонлэн кивалтӥсез Максим Воробьёв. — Угось сӧсыр муртлы тупась условиос юромо кылдытоно. Собере, инвалид калленгес ужа но ук. Соин ик таӵе предприятие усьтоно кариським. Ми юромо отчы таза адямиосты кутытэк тыршиськом, соослы уж шедьтыны капчигес шуыса. Таӵе предприятиосын адямиос, ужзэс воштытэк, кема аръёсын тыршо. Угось тодо, татын ваньмыз радъямын, соос понна сюлмаськыса. Но туннэ таӵе предприятиос кун ласянь юрттэттэк улыны уг быгато.
Соин но котырес ӝок сьӧры элькун кивалтӥсьёс но инвалидъёсын ужась предприятиосысь адямиос валче пуксизы. Вераськизы вормонъёс но сюлмаськонъёс сярысь. «Локомотивлэн» ужаменыз тодматскизы Правительстволэн Тӧроезлэн воштӥсез Александр Свинин но промышленностья но вуз каронъя министр Виктор Лашкарев.
Вераны кулэ, инвалидъёсын ужам сяна, предприятие туж кулэ ужез нуэ. Татын пластик бутылкаослэсь пайда потто. Пыргытэм пластиклэсь мар гинэ уг лэсьто: бахилыос, медицинской маскаос, корка котырын ужан перчаткиос, лэсьтӥськонлы ярась кенеръёс но трос мукетсэ. Вань та вузъёсты басьто шаерысьтымы лавкаос. Кылсярысь, медициналы ярась арбериос асьме больницаосы, аптекаосы ик вуо.

— Та вакытэ ми толэзяз ог 130 тонна пластик бутылкаосты переработкае кутӥськом, ог 17 пумо вузъёс поттӥськом, — вераз предприятилэн кивалтӥсез Сергей Лосин. — Товармес, шаерамы сяна, келяськомы Россилэн пӧртэм сэрегъёсаз, Казахстанэ. Алигес Латвиен но кусып тупатӥм. Пластик бутылкаосты асьмеос бичаськом. Кылсярысь, Ижын куд-ог интыосын жагез нимаз бичанъя контейнеръёс пуктылӥмы. Ӟеч кусыпмы «Зелёный паровоз» огазеяськонэн, «Разделяйка» акция дыръя люкам арбериосты басьтӥськомы. Азьланяз малпаськом жагез утялтонъя улос операторен валче ужаны.

Азинскыны юрттӥз… экструдер

«Локомотив» 2017-тӥ арын басьтыны быгатӥз пыргытэм пластиклэсь плёнка лэсьтонъя выль тӥрлык — экструдер. Но ужзэс йыг-йыг радъяны пӧрмытӥзы ог ӝыны ар талэсь азьло гинэ. Таӵе туала тӥрлык матысь улосъёсын ӧвӧл на. Экструдерез «Локомотив» лизинг амалъя басьтӥз ог 15 миллион манет тыр. Пунэмаськемезлэсь 4 миллионлэсь ятыр манетсэ берыктыны юрттӥз Удмуртиысь Правительство.

— 4-5 ар ӵоже Удмуртиысь Правительство милемыз син азяз возе, юрттэ пичи но бадӟым ужпумъёсмес, сюлмаськонъёсмес тупатыны, — вераз С. Лосин.

Ю. Рысин
Фото: А. Поздеев

Выль тӥрлыкен капчиен огкыл шедьтӥз Юрий Рысов. Ляб кылӥсь воргорон 3-тӥ арзэ предприятиын тырше ни.

— Азьвыл мон грузовой машинаосты нуллӥсько вал, но инвалид луэме бере бадӟым машина сьӧры пуксьыны правоме басьтӥзы, — вераз воргорон. — Мукет интыосысь уж шедьтыны секыт вал. Но инвалидъёсын ужась «Локомотив» предприятие сярысь тодӥ. Татчы шугъяськытэк кутӥзы.
Уже секыт ӧвӧл, шат огпӧртэмегес гинэ, шуэ Юрий. Но уждун но, ӵош ужась эшъёсыныз, предприятилэн кивалтӥсеныз кусыпъёс но — ваньмыз туж яра, пе.
Предприятилэсь ужамзэ вылӥ дунъяз Александр Свинин но.

«Локомотив» 2 бадӟым ужпумъёсты быдэстэ: инвалидъёслы уж сётэ но кылем-мылемъёслэсь пайда поттэ. Та выллем предприятиос элькун ласянь 2 пумо юрттэт басьтыны быгато: ЖКХ понна тыриськонъёссылы компенсация но азинскыны субсидиос. Кылсярысь, «Локомотивлы» экструдер басьтыны субсидия сётэмын вал. Вераськимы, предприятиослы таӵе юрттэт сётонэз азинтомы 2020-тӥ-2021-тӥ аръёсы но. Жаляса верано, «Локомотив» выллем предприятиос национальной проектъёс улэ уг сюро. Но элькун кивалтэтэн кенешим, «Экспорт» но «Ужазинлык но калыклы уж сётон» нацпроектъёс чотын соослы юрттэт мед лыктоз шуыса, Россиысь промышленностья но вуз каронъя министерстволы вазиськом.

Таӵе бахиллыослы капсулаос лэсьто «Локомотивын»
Фото: А. Снигирёва

Чиньыосты выретон бурмытэ

«Локомотив» инвалидъёслэсь улон-вылонзэс умоятонъя программаос борды итӥськемын. Озьы кылем арысен предприятиын Удмуртиысь Инвалидъёслэн огазеяськонэнызы но Правительствоен валче улонэ пыӵаны кутскиз сӧсыр муртъёслэсь тазалыксэс юнматонъя проект. Озьы предприятие инвалидъёслы векчи ужез оске. Кылсярысь, соос бахилыосты капсулаосы тыро. Озьы, чиньыосты выретыса, висись мурт ӝоггес бурме, пе. Та проектэ ог 150 адями пыриськиз ни.

Ангелина Снигирева

Ангелина Снигирева
By Ангелина Снигирева Август 12, 2019 16:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<