Дуно сыр но кумыс

Ангелина Снигирева
By Ангелина Снигирева Август 14, 2019 15:59

Резиденциын сӥлы каризы 13 фермеръёсты но кооперативъёслэсь 4 кивалтӥсьёссэс. Удмуртилэн Тӧроез Александр Бречалов соослы ужзэс азинтыны 1,5-сен 15 миллион манетозь грант люкылӥз.

Тӧро Сарапул ёросысь Н. Усманова но Эгра ёросысь А. Корепанов фермеръёсын
Фото: udmurt.ru

Туннэ шаерысьтымы 1 сюрс 203 фермеръёслы луыса утялтӥське 130 сюрс гектар музъем. Вань поттэм сиён-юон пӧлысь 5-6 процентэз — фермеръёслэн. Кылсярысь, вань будэтэм ю-нянь пӧлысь 15,8 процентсэ соос кутсало, мерттэм картошка пӧлысь будэто 16,5 процентсэ, бакча сиён — 9,3 процентсэ. Туэ ӝыны ар куспын фермеръёс поттӥзы ни 353,4 тонна сӥль, 760 сюрс курегпуз, кыскизы 19523,7 тонна йӧл. Соос 21 сюрслэсь ятыр пудо вордо. Нуналысь нуналэ фермеръёслэн кужымзы йылэ. Гыро-утялто тужгес пыдлось бусыосты, соос ванен ик возисько на куд-ог гуртъёс. Кӧня ке гуртъёс воксё но фермеръёслы луыса вылысь улӟо.
Гуртэз улӟытӥсьёс пӧлысь огез — Эгра ёросысь Мувырысь удмурт воргорон Александр Корепанов. Ас вакытаз гуртэз, неперспективной шуыса, быдтыны кутскизы. 1981-тӥ арын коркаосты тракторен донгазы, музъемен ӵошкатӥзы, гуртэз, быремын шуыса, картаосысь куштӥзы. Армиысь бертыса, Александр Геннадьевич гуртсэ ӧз тодма ни. Но со та югдурен тэрытӥськыны ӧз быгаты — буш бусыын пуктӥськыны кутскиз. Выль коркаяз со пыриз 1993-тӥ арын. Пудоен вырыны ӧдъяз, пилорама усьтӥз. Ужасьёсызлы коркаос ӝутыны кутскиз. Фермер ачиз сюрес лэсьтӥз, тыл но ву кыскиз. Россиысь Правительстволэн постановлениезъя 2009-тӥ арын Мувыр гуртэз выльысь реестре пыртӥзы. Мувырын али 13 корка лыдъяське ни.

— Эшшо но пуктӥськыны мылкыд карисьёс вань, но музъем ӧвӧл. Али та ужпумен вырисько, — шуэ Александр Геннадьевич.
Со хозяйствозэ но ялан азинтэ. Скал сяна, парсь, ыж, кунян вордэ. Пуктӥз ни тысь куасьтонъя но шертонъя комплекс. Нош али выль малпанэн улэ: переработка усьтыны выре. 140 йыр скалэзлэсь 200 тонна йӧл кыске. Та переработкалы тырмыт луоз, шуэ, цех пуктыны кутски ни. Котырысьтыз фермеръёс но бордаз кыстӥськыны малпало. Йӧлэз пакетъёсы тырем сяна, А. Корепановлэн сыр лэсьтэмез потэ. Резиденциын та проектсэ быдэстыны 10 миллион манет грант висъязы.

Переработка ӧм усьтэ ке, гуртмы пумен выльысь бырыны быгатоз. Мувырлы бырыны сётэм уг поты ни. Уката ик али 10 ар тырмонмес быдэс ёросэн пусйимы, — шуэ Александр Геннадьевич.
Александр Бречалов Мувырысь улон-вылонэн матэгес тодматскыны, татчы вуылыны малпанзэ вераз. Тӥлесьтыд адӟем кароно, дӥсьтэмдылы паймоно, шуиз Тӧро.
Грант утӥсьёс пӧлын Сарапул ёросысь Наталья Усманова но. Солы 15 миллион манет висъязы. 6 нылпиослэн анайзы ас дораз сыр пӧзьтыны кутскиз. Дышетскыны юромо вуылӥз Италие но, Тверь улосэ но. Туннэ со 10 пумо сыр лэсьтэ. Азьланяз производствозэ нуналаз 50 килограммозь будэтэмез потэ. Пурысьтам сыръёс но лэсьтысал, шуэ. Тросгес скал но вордэмез потэ — мурт йӧлын ужатозь, аслэсьтыдзэ кыскод, шуэ. Аслэсьтыд скалдэ кызьы кулэ, озьы сюдод, нош муртлэнэныз куддыр сыр мукет шӧмо луо, пе. Юрттӥсьёслы уг паймы — нылпиосыз бордаз кыштыр ужало. Тужгес пичиезлы — 12 арес.
Нош Шаркан ёросысь Вадим Старцев, вал вордэм сяна, кумыс поттыны кутскиз. Сыӵе предприятие Россиын одӥг гинэ — Башкириын. Табере шаерамы но производство усьтӥське. Россиын 100 тонна кумыслы кулэясько, нош поттӥськом 10 поллы ичигес. Соин ик Вадим Старцев оске, ужез пӧрмоз шуыса. Кумыслэн дуныз куртчылӥське — 1 литрез 250 манет сылэ. Но басьтӥсез сюре, шуэ.

Резиденциын 13 фермерлы но 4 кооперативлы грантъёс люкылэмын
Фото: udmurt.ru

Таӵе ужбергатӥсьёс тросгес луысалзы ке, экономикамы эшшо но кужмогес луысал, шуэ Александр Бречалов. — Туж шумпотӥсько, тӥ кадь адямиосын пумиськи шуыса. Оскисько: проектъёсты улонэ пыӵалозы. Ми юрттомы. Нош «Корпорация Удмуртии» огазеяськон юрттоз асьме рыноке но, кунгож сьӧры но потыны.
Фермеръёслы шаерамы грантэн юртто ни 2012-тӥ арысен. Гурт удысъя но сиён-юонъя министр Ольга Абрамова верамъя, огъя быдӟалаез 620 миллион манетлэсь ортчиз ни. Грант утӥз ни 165 кутскись фермер но 47 семьяен ужась фермер. Туэ грантъёслы висъямын ог 253 миллион манет. 116 куриськон вуиз. Матысь дыре эшшо 43 фермерез шумпоттозы. Али соослэсь проектъёссэс эскеро, ӝоген конкурслы йылпумъянъёс лэсьтозы. Грант утыны секыт ӧвӧл — фермер луыны, я кооператив кылдытыны, ужан интыос кылдытыны но производствоез йылтыны мылкыд гинэ мед луоз.
Министерство туннэ котькудӥныз нимысьтыз ужа. Угось тросэз фермеръёс документъёсты кызьы лэсьтыны но уг валало. Собере, уксёен юрттэм сяна, газ кыскыны, сюрес лэсьтыны но мукет шугъяськонъёсты сэрттыны кулэ. Сотэк кызьы азинтӥськод? Соин ик котькудӥзлэсь шуг-секытъёссэ тодыны тыршо.

— Ми контролёр но счетовод луыны кулэ ӧвӧл, адями уксёзэ кытчы кӧня понӥз но малы шуыса. Ми юрттыны кулэ, — шуэ Правительстволэн Тӧроезлэн воштӥсез Александр Свинин. — Туннэ фермеръёслы дунтэк инты висъяло ярмаркаосын, базарын. Но куд-ог гуртоос сюризы ни бадӟымесь вуз каронъя центръёсы.

Елена Сараматова

Ангелина Снигирева
By Ангелина Снигирева Август 14, 2019 15:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<