Данъяськонлэсь трос сюлмаськон

Ангелина Снигирева
By Ангелина Снигирева Август 29, 2019 10:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ува ёросысь Чекан черкогуртысь вашкала черкез культураысь утиськись синпелетъёс пӧлы пыртыны ӵектэмын. Но ёрослэн но поселенилэн кивалтӥсьёссы, черкын ужасьёс та пумысен шумпотыны уг дырто. Малы?

Чеканысь Николай Угодниклэн черклы 120 ареслэсь трос
Фото: А. Снигирёва

Черк луиз клуб

Николай Угодниклэн черкез одӥгез вашкалаез но аспӧртэмлыкоез луэ. Со 1898-тӥ арын ӝутэмын, архитекторез Иван Чарушин. Усточилэн одӥгез тодмоез ужез — Ижысь Дунчылкыт Михаиллэн (Свято-Михайловский) соборез.
Чеканысь черкын 1902-тӥ арысен службаос ортчыны кутскизы, отчы вӧсяськыны вуылӥз 16 гуртъёсысь калык, Якшур-Бӧдья ёросысь Кекоранысь, Итчаысь но ветлӥсьёс вал.
Пересьёс верало на, черклэсь фундаментсэ ӝутон понна гуртъёстӥ курегпуз бичаллязы, лэсьтӥськон суретэ тыризы шуыса. Соин черклэн инъетэз юн пӧрмиз, та дырозь номыр луэмын ӧвӧл.
Совето Союз дыръя черкъёсты ворсалляны ӧдъязы, Чеканысез но та адӟонлэсь палэнэ ӧз кыльы. Кема аръёс ӵоже колхоз отын ю-нянь, ужан тӥрлык возьылӥз. 1990-тӥ аръёсы гинэ юрт выль омырен шокчиз — татчы люкаськыны кутскизы гуртоос, но вӧсяськыны ӧз — кино учкыны. Озьы черк лулчеберетъя юрт сямен ужаны кутскиз. 2004-тӥ аръёсы калык куремъя ини татысь огпал сэрегзэ оскисьёслы сётӥзы, гуртоос татчы выльысь вӧсяськыны ветлыны кутскизы.

Бускельяськон

Али но юртын бускельясько клуб, библиотека, ог 25 квадрат метрзэ сётэмын черклы. Быдэс юртэз возён, утялтон понна кыл кутэ ёросысь культурая управление.

А. Данилов Чккан поселенилэн кивалтӥсез
Фото: А. Снигирёва

— Кемалась ик ӧвӧл Интернетысь ивор лыдӟи, черкмес культурая утёно объектъёс пӧлы пыртыны курисьёс вань шуыса, — мылкыдзэ вераз Чекан поселенилэн кивалтӥсез Александр Данилов. — Огласянь данъяськоно кадь, но ивор шумпотэмлэсь тросгес сюлмаськонэ уськытӥз. Угось та вакытэ черк возиське клублы луыса, юртлэсь пушсэ но вылзэ тупатъяны-выльдыны арлы быдэ коньдон ёрос бюджетысь висъяське. Нош со утёно объектъёс пӧлы пыртэмын луиз ке, кин сое утялтыса-чакласа возён на?
Черк синпелет луоз шуыса, уг шумпото ёрос администрациын но. Отысь культурая управлениен кивалтӥсь Марина Головизнина вераз:

Синпелетэз чаклан-возён усе ваньбурлэн кузёез (собственникез) вылэ, таяз учыре со ёрос администрация. Умой луысал, утёно объектъёслы нимысьтыз коньдон висъяськысал ке. Но куд-ог учыръёсы со сюлмаськонъёс гинэ вае. Тани ёросысьтымы Удугучинысь черк утёно объектъёс пӧлы пыртэмын вал отысь баӵко кичӧлтэмезъя. Табере со ачиз ик ёрмиз ни, угось одӥг кортӵог шуккон понна но кӧня бумагаос бичаны кулэ, нимысьтыз агентствое вазиськоно, отысь ужъёсты быдэстыны лэземзэс витёно.

Кулэ клуб но, черк но

Чеканъёс клублы но, черклы но огкадь кулэясько. Гуртын ог 500 пала адями улэ, клуб сяна мукет бичаськон, шулдыръяськон интыоссы ӧвӧл. Клубысь арбыт нылпиос уг бырыло. Соос понна вокалъя, театръя, киужъёсъя кружокъёс ужало, арлыдоос «Ивушка» ансамбле кырӟаны мыло-кыдо ветло, тэшкылиос но егитъёс понна арнялы быдэ пӧртэм ужрадъёс ортчыло. Праздникъёс дыръя гуртысь клуб быдэсак калыкен тымиське.

— Черкогурт шуиськом бере, татын одно ик черк луыны кулэ кадь потэ, — азинтэ веранз А. Данилов. — Бадӟым праздникъёсы, Паскае гуртын гырлыос шуккиськыны, калыкез бичаны кулэ.
Кивалтӥсен соглаш Чеканысь мыло-кыдо кышномурт Валентина Галкина но, со черкез чакласа возе.

В. Галкина, черкез чаклась
Фото: А. Снигирёва

— Гуртамы оскисьёс трос, но черке ялан ветлӥсьёс 10-15 пала гинэ люкасько, — шуэ кышномурт. — Арнялы быдэ бичаськиськом, тазалык курыса, кулэмъёсты буре вайыса, вӧсяськиськом, дорамы Мушковайысь баӵко вуылэ. Но тросэз гуртоос, кылсярысь, пиналзэс пылатыны 15 иськемысь Мушковае нуо. Чеканысяз лыктысалмы шуо, татын рос-прос черк ужасал ке. Клубен одӥг липет улын бускельяськон тросэзлы уг кельшы угось.
Зэм, далайгес юртэз быдэсак черклы сётыны курисьёс вал. Но клублы мукет инты сюрытэк, уж ас интыяз ик могӟиз. Бӧрысь черкын ужасьёс но валазы, юртэз возьыны уз ворме шуыса. Угось быдэс черкез шунтон понна араз 600 сюрс пала коньдон кошке. Али оскисьёслы висъетэз ёросысь культурая управление арендае сётэ, шуныт понна араз 70 сюрс манет тыриськонъёс вуо, но сое но черк шуген ворме.
Но гуртоос киоссэс уг лэзё, али поселенилэн кивалтӥсез сюлмаське гуртысь буш сылӥсь юртэз черклы карыны. Нош ализэ быдэсак клублы сётыны луысал, пе.
Кыӵе югдур вите Чеканысь черкез, шедёз-а со утёно синпелетъёс пӧлы — али вераны вазь на. Удмуртиысь Культурая синпелетъёсты утёнъя агентство нимысьтыз эскеронъёс ортчытыны кулэ на. Но агентстволэн кивалтӥсез Юрий Перевозчиков верамъя, черк утёно объектъёс пӧлы пыртэмын луиз ке, со азьвыл сямен ик ужалоз, но сое зол воштыны, выльдыны-тупатъяны лэземын уз луы, котькыӵе ужез лэсьтэмлэсь азьло агентствоен кенешоно луоз, пе.

Ангелина Снигирёва

Ангелина Снигирева
By Ангелина Снигирева Август 29, 2019 10:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<