«Выжы-выжы-выжыкыл» фестивальын 9 выжыкыл возьматэмын

Ангелина Снигирева
By Ангелина Снигирева 28 августа, 2019 14:49

Ижысь Эшъяськон юртын «Выжы-выжы-выжыкыл» нылпи элькун фестивальлэн финалэз ортчиз. 5-тӥ арзэ покчиосты бадӟым сцена вылэ поттэ ни «Удмурт нылкышно кенеш» огазеяськон.

106 нылпи садысь покчиос
Фото: А. Снигирёва

Гужем ӵоже оглом 15 выжыкылъёс возьматэмын вал. Йылпумъян люкетаз потӥзы Ижысь но Пичи Пурга черкогуртысь 9 нылпи садъёс. Пичиос шаерамы улӥсь выжы калыкъёслэсь выжыкылъёссэс возьматӥзы. Элькун сцена вылысен армян, таджик, еврей, ӟуч выжыкылъёс удмурт сямен чузъяськизы. Вераны кулэ, фестивале пыриськем нылпи садъёсысь пичиос удмурт сямен уг верасько, соин кружокъёсын гинэ тодматско. «Удмурт нылкышно кенешлэн» кивалтӥсез Надежда Степанова верамъя, фестиваль кӧня ке ужпумъёсты быдэстэ. Пиналъёс валало удмурт кыл со песянайёслэн гинэ кылзы ӧвӧл, со бадӟым сцена вылысен но чебер чузъяське шуыса. Собере тэшкылиос мукет выжы калыкъёс сярысь тодо, соослэсь культуразэс гажаны дышетско.
Нылпи садъёс фестивальлы зол дасяськизы, яркыт дӥськут вуризы, чебер декорациос лэсьтӥзы. Кылсярысь, Ижысь 112-тӥ нылпи садысь нылъёс италмасъёслы пӧрмизы, чильк-вальк кисьтаськись яркыт дэремъёсын эктӥзы. Татысь пичиос «Теремок» выжыкылэз пуктӥзы. Удмурт кылын эшъяськонлэн кулэлыкез сярысь веразы.
3-тӥ арзэ фестивале пыриськыса быгатонлыксэс возьмато ини Пичи Пурга ёросысь «Италмас» нылпи садысь пичиос. Туэ пургаос Можга ёросысь Комак гуртысь И. Максимоваен гожтэм «Куинь эшъёс» удмурт выжыкылэз пуктӥзы. Пиналъёсты дасяз отысь визьнодась Эвелина Абрамова.

Пичи Пургалась «Италмас» нылпи сад «Куинь эшъёс» выжыкылэз возьматэ
Фото: А. Снигирёва

— Садамы ог 20 ар театральной кружок ужа, дышетӥсьмы Наталья Басова пиналъёсты вольыт вераськыны, дӥсьтӥсь луыны, калык азьын возьдаськытэк кырӟаны-вераны дышетэ, — вераз Э. Абрамова. — Озьы нылпи садысь потыса, та ӧрез пиналъёс школаын азинто, элькунысь но палэнысь ужрадъёсын асьсэдыз умой возьмато. Садамы ӟуч спектакльёсы пыриськон пумысен вожмаськон пуроме. Нош удмуртсэ пуктыны пичи артистъёсты шуггес шедьтыны вал. Угось али Пичи Пургалан но тросэз удмурт семьяосысь пиналъёс, нылпи садэ лыктыса, анай кылзэс вунэтыны кутскемын ни.
Э. Абрамова Ижысь нылпиос пумысен паймемзэ вераз, удмурт кылын вольыт, чебер вераськыны пӧрмыто, пе. Нош кыӵе паймытӥзы артистъёслэн яркыт дӥсьёссы.
Ижысь 106 номеро нылпи садысь пичиос «Азьтэм царевна» армян выжыкылэз улӟытӥзы.

112-тӥ нылпи сад «Теремок» выжыкылэз пуктэ
Фото: А. Снигирёва

— Фестивале пыриськем пиналъёслэн анай-атайёссы удмуртъёс ке но, соос семья куспазы анай кылынызы уг верасько ни, — вераз садикысь визьнодась Мария Одинцова. — Но ужрадлы дасяськон понна ваньзы удмурт кылзэс тодазы ваизы, соин нылпиосты дасяны секыт ӧй вал. Соос али кылъёсты туж капчиен дышето, асьсэлэсь гинэ ӧвӧл, ог-огзылэсь рольёссэс вераны тодо. Выжыкылэз дасякумы сомында выль кылъёс дышетӥм, урод сямъёслэсь куштӥськон сярысь вераським. Озьы та выллем фестивальёс улсын трос кечъёсты кутыны тыршиськом.
Ужрад дыръя удмурт кыл сцена вылысен гинэ ӧз чузъяськы, нылпиос пӧйшуръёслэсь но тылобурдоослэсь удмурт нимъёссэс тодазы ваизы, удмурт крезьгуръя эктӥзы, шудӥзы. Ваньмыз доразы ӟеч мылкыдын, выль тодон-валанэн но синпель-кузьымъёсын бертӥзы.

Ангелина Снигирёва

Ангелина Снигирева
By Ангелина Снигирева 28 августа, 2019 14:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<