Балет вуттӥз Африкае

Ангелина Снигирева
By Ангелина Снигирева 2 августа, 2019 11:33

Дэри ёросысь Якшур гуртын вордскем Юлия Казакова ӟуч балетлы дышетэ Мароккоысь пиналъёсты но студентъёсты. Африкалэн уйпалаз интыяськем кунын бадӟым дан луэ Россиысь балерина дорын дышетскыны.

Ю. Казакова Мароккоысь пиналъёсты балетлы дышетэ

12 ар дышетскиз

Эктыны Юля пичи дырысеныз яратӥз. Атаезлэн Николай Казаковлэн выжыез Алнаш ёросысь Ляли гуртысь. Татын одӥг шулдыръяськон но удмурт тапыртонъёстэк уг ортчы. Соин, дыр, нылашлы пыӵам алнаш вир — пыдъёсыз эктыны куриськылӥзы. Школаын но Юля эктонъя кружоке ветлӥз. Но нылызлэсь таӵе поръясь мылкыдзэ анаез Татьяна Николаевна ӧз вала.

— Туннэ эктод, нош ӵуказе мылкыдыд пуксёз. Азьланяз улыны, ужаны кулэ, — вералляз мумиз.
Анаезлы пумит вераны дышымтэ Юля дышетскыны пыриз Ижысь техникая кун университетэ. Специальностез но ӟеч — сотовой связья инженер луоз, туала улонын со ик кулэ, шумпотӥз анаез.
Юля 3 курс ӵоже дышетскиз, мылкыддэк ветлӥз университетэ, мӧзмыса пукылӥз лекциосын. Озьы ке но анайзэ ӝоже уськытонтэм вылысь, «ньыльлы» но «витьлы» сётъяз экзаменъёссэ. Эктон мылкыдзэ буйгатыса, нылаш Ижысь огаз школае балетъя кружоке ветлӥз, собере Операя но балетъя театрын эктӥз. Огполаз ИжГТУ-ысь студентъёсты водаканалэ практикае келязы.

— Предприятие пырим но, отын бадӟым бассейнъёсын пож ву бультыртэ. Собере сое фильтръёс пыр потто но, нош ик адямиослы вутто. Кыӵе мӧзмыт но огпорма уж. Мон валай, юнме пычкиськисько, та удыс мынам ӧвӧл шуыса, — вера Юлия.
Озьы нылаш выльысь дышетскыны пыриз Ижысь культурая колледже хореография специальносте. Ӧз, университетсэ со ӧз кушты — заочно амалэ выжыса, дышетсконзэ йылпумъяз.
Культурая колледжын дышетскон аръёсыз Юлялэн огшокчем кадь ортчизы. Анайзэ со колледжын ортчылӥсь концертъёсы ӧтчалляз. Нылызлэн бурдъяськем мылкыдыз кышномуртлы но паласькылӥз.

— Адӟиськод-а, мама, эктон — со мынам! — шуылӥз соку Юля.
Татьяна Николаевналы калык эктонъёс кельшылӥзы ик, нош балет сюлмаз нокызьы ӧз лякиськы, мар луоз со: сценалэн огпал пумысьтыз мукет палаз бызьылон, умме усёд, ява.
Колледж бере нылашлы дышетсконзэ азьланьтыны ӵектӥзы. Дышетӥсез Сария Сухенькая Пермьысь искуствоосъя но культурая институтэ сюрес возьматӥз: отын, пе, дышетон ӟеч радъямын. Юля кылзӥськиз, мумиз-бубиз но дышетом шуизы.

Перме вуи но, мылкыды куашказ: кыӵе пурысь но мӧзмыт город. Уг кельшы бере, кызьы мон татын дышетском? — тодаз вае Юля.
Озьы ке но институтэ дасяськонъя курсъёсы ветлӥз, кыксэ экзамензэ сётӥз, нош 3-тӥяз ӧз ни мыны, Якшураз бертӥз.
Ог 2 арня ортчыса, Пермьысь институтын тодматскем эшез жингыртӥз. Ойдо, пе, Белгородысь искусствоосъя но культурая университетэ йыгаськом. Юля паймиз но Белгородэ жингыртӥз.

— Лыктэлэ, эшшо арня ӵоже документъёсты кутӥськом на, — ивортӥзы нылашлы.
Юля сумкаоссэ кутӥз но выль интые вуиз.

— Вокзалысь потӥ но соку ик городлы синмаськи: котыр тӧдь-тӧдь, ваньмыз сяськаяське. Экзаменъёсме но капчиен сётӥ, озьы та городэ 5 арлы кыли, — тодаз вае Юля.

Ӟуч балерина доры — кузь черод

Эктӥсь артистлэн даурез кузь ӧвӧл. Сое шӧдыса, оло, Юлялы ӵектӥзы Белгородысь университетэ ужаны кыльыны, егитъёсты дышетыны. Но нылмуртлэн мылкыдыз пуксемын ӧй вал на — аслаз эктэмез потэ. Озьы Юля Ижевске берытскиз, ужаны кутскиз Операя но балетъя театрын. Но секыт учыр тупаз: балерина пыдзэ чигтӥз. Эмъяськонэз туж кема кыстӥськиз, пыдыз нокызьы пумозяз уг йӧна. Нош балерина понна быдэс ар эктытэк улон — со зэмос курадӟон, артистлэн формаез ыше, вылысь эктыны кутскыны секытгес ни. Таӵе вакытэ жингыртӥз Белгородысь дышетӥсез: лыкты, пе, университетэ ужаны, висказ эмъяськод, формае пырод. Выль интыын ар ужаса гинэ вуттӥз, нылашлы выль ӧтён вуиз — Мароккоысь Фес городын Ӟуч центрын балетлы дышетӥсь утчало. Озьы 2017-тӥ арысен Юлия Мароккоын эктыны дышетэ.

— Фес городэ сюресэ вакчи ӧй вал. Татчы вуон понна нырысь Москваысен Лиссабонэ (Португалие) лобоно. Собере Европаысь Африкае потоно ни. Озьы ке но татчы вуи но – сюлэмы ганяк луиз: мон мурт азьын ӧвӧл, туж тодмо инты кадь потӥз. Выль городлы туж чаляк дыши, — шуэ Юля.
Фес — Марокко королевствоысь быдӟалаезъя 3-тӥ город. Татын 1 миллионлэсь ятыр улӥсез. Марокколэн шоркараз — Рабатын — 1 миллион 800 сюрс пала калык. Тужгес трос адями Касабланкаын — Атлантика зарезь дурысь кар тодмо луэ бизнес-центръёсыныз но, курортъёсыныз но. Татын 3 миллионлэсь трос адямиез.
Эшшо Фес — Мароккоысь наукая но культурая вашкалаез центр. Татын Россилэн представительствоез бордын ужа Ӟуч центр, отын усьтэмын искусствоосъя школа. Татчы вожмаськыса ӟуч балетлы дышетыны ваё нылъёсты. Вераны кулэ: дышетон дунын радъямын. Озьы ке но буш интыос уг луо.

Куд-огез ог 3 толэзь ветлыны чидало, урокъёс дыръя асьсэды фотое уськытыны косо. Собере та туспуктэмъёсты, тодмооссылы возьматыса, ушъясько: мон ӟуч дышетӥсь доры 5 ар эктыны ветлӥсько ни, — пальпотэ Юлия. — Мароккоын таӵе ушъяськон урод уг лыдъяськы, соослэн сыӵе сямзы вань: кӧня ке бадӟыматыса, чеберъяса вераны.
Мароккоын балетлы дышетско нылъёс гинэ. Асьмелэн сямен ик, кружок кутске школаын урокъёс бырем бере. Дышетӥсез — уката ик ӟуч балеринаез — нылъёс дышемын котьку чеберен адӟыны. Мароккоын улӥсьёс уз валалэ, балерина штан золтӥз ке. Соин Юля котьку но юбка дӥся. Тазамем балеринаез но уз яратэ — эктӥсь мурт котьку веськрес луыны кулэ. Эшшо медло макияжед но причёскаед, соку вань дышетскисьёслэн ӟуч балерина кадь луэмзы потэ.
Пиналъёсты сяна, Юля балетлы дышетэ студентъёсты но. Эшшо нуназезэ йога нуэ. Балетэ ветлӥсьёс дышетскон ар пумын пукто бадӟым спектакль. Отчы дышетскисьёслэн сомында ӵыжы-выжыоссы вуо — ваньмызлы пуксьыны инты уг шедьы. Спектакльлы дасяськыса, Юля ачиз ик костюмъёс малпа, соосты вурыны басма утча. Собере малпанъёссэ кутюрьелы вера — таиз но Россиысь вуэмын, балет эктӥсьёслы костюм дася.

— Туэ ачим но нылпиосын ӵош сцена вылын эктӥ — «Снежная королева» балетын валтӥсь ролез быдэстӥ. Эшшо эктыны ӧтчало пӧртэм фестивальёс дыръя, Россилэн посольствояз приёмъёс ортчыку, — шуэ балерина.

Шаньгалэсь мӧзме

Мароккое Юля мынӥз, англи но француз кылъёсты ӧжытак гинэ тодыса. Француз кылэз со дышетӥз университетын – балетысь терминология кылдэмын француз кылын. Нош Марокко Францилэн колониез вал бере, татын француз кыл паськыт вӧлмемын. Нылпиос Юляез дышетӥзы ни Мароккоын кутӥськись араб кыллэн диалектэзлы — «дарижа» нимаське.
Фес городын Россиысь, СНГ кунъёсысь лыктэмъёс трос. Ваньзэсты огазея ӟуч кыл, ӟуч ужрадъёс. Ӟуч центрын пусъё Вӧйкелянэз но, Паскаез но, мукет праздникъёсты но. Юлялэн, ӟуч эшъёсыз сяна, араб юлтошъёсыз но кылдӥзы ни.
Россиысь балерина понна уката кельшымон соиз — емышъёс но бакча сиёнъёс быдэс ар ӵоже кисьмало, соос дунтэмесь. Веськрес возиськон понна сокем сюлмаськоно ӧвӧл, шуэ Юлия.
Татын, Европаын сямен ик, пыӵамын ни кафеосын кӧттырон сям. Ӵукна кофе юыны потоно кафее, нуназе но, ӝыт но татын ик кӧтсэс тыро. Доразы сиён лэсьтыны котькуд нунал уг сюлмасько.

— Мароккоын улӥсьёслэн тужгес вӧлмем сиёнзы «пастилья» нимаське. Со векчи погыльтэм ыльняньлэсь пирог кадь. Огез сӥез курег сӥль, собере — векчи юдэм кукей, татын ик вань миндаль мульыез но, вож турын-куарез но, чечыез но, вылаз эшшо сакыр пудраен пазямын. Нырысь со мыным винегрет кадь потӥз вал. Табере дыши, туж ческыт, — пальпотэ Юля.
Озьы ке но асьме сиёнлэсь туж мӧзмисько, шуэ балерина. Тулысысен ик анайзэ телефон пыр иса: бертӥ ке, шаньга пыжод-а? Нош табанен сюдод-а?
Мароккое кошкыса, Юля вуылӥз ни Португалие, Испание, Францие. Нош Африкаысь Сахара пустыняез ӧз адӟы на. 3 ар ӵоже Мароккоын улыса, Юлялэн кӧтыз ӧз на тыры. Татын куддыръя 44 градус пӧсь луэ ке но, Фес городын солы ваньмыз сюлмызъя.

Елена Скворцова

Ангелина Снигирева
By Ангелина Снигирева 2 августа, 2019 11:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<