Аналтэм коркаослы кузё сюриз

Ангелина Снигирева
By Ангелина Снигирева Август 8, 2019 15:52

Шаерамы трос квартираем юртъёс губиос сямен ӝужало. Но куд-ог застройщикъёс лэсьтӥськонзэс куспетӥ дугдыто. Туннэ пусъемын 11 сыӵе объект.

Фото: udmurt.ru

Пуктӥськон вакытэ квартираос дунтэмгес шуыса, уноез дунъёслы гочало, долевой пуктӥськонэ пырисько. Оскымон застройщик вань ужъёссэ дыраз быдэстэ. Но 7,9 процентэз огкылъёс ву вылын саникен гожтэм кадь луэмын. 294 адями шуге-леке вуэмын. Таослы юрттон бордын шаерысьтымы кивалтӥсьёс нырысетӥ арзэ уг ужало ни. 3-тӥ гудырикошконэ но Удмуртилэн Тӧроез Александр Бречалов пумиськылӥз олокӧня арзэ ни шуныт сэрегзэс возьмасьёсын.

Али тужгес секыт югдур кылдэмын Дэри ёросысь Хохряки гуртын. «Родниковый край» комплекс Ижлы матын шуыса, адямиос уксёзэс застройщиклы сётӥзы. Тодазы ик ӧз лыктылы, соосты кутчаны быгатозы шуыса — коркаос пумен ӝужаны ӧдъязы угось. Но отӥяз лэсьтӥськон ужъёс тыпак дугдӥзы. Застройщик олокытчы чиптэм-чаптэм ышиз. Туэ январе объектэз суд ортчем бере выль застройщиклы — «Холмы-2» огазеяськонлы — сётӥзы, азьвылзэ банкротэн ялӥзы. Но юртъёсты ӝогак вуттыны ӧз луы. Эскеронъёс возьматӥзы: дунтэм материалъёслэсь лэсьтэм коркаос лябесь, адямиосты отчы пыртыны кышкыт — куашканы быгатозы. Выль застройщик 2 коркаез сэрттӥз ни — борддоръёссэс гинэ тупатъяса, толыкез ӧй луысал. Эшшо 2-сэ кесяно.

— Фундаментъёсты юнматӥмы, борддоръёсты выль сямен ӝутыны кутскиськомы. 2020-тӥ арын 30-тӥ июне 4 юртэз вуттыны чакласькомы, — шуэ «Холмы-2» огазеяськонлэн кивалтӥсез Дмитрий Лукин.

Выль застройщиклы калык шумпотэмын. Пуктӥськон графиксэ дыраз быдэстэ, асьсэос но дольщикъёс объектэз чакланы вуыло.

Лэсьтӥськонъя, ЖКХ-я но энергетикая министр Дмитрий Сурнин пусъемъя, ву кыскон, канализация лэсьтон республикалэн бюджетэз чотын чакламын. Матысь дыре выль коркаос котырын ӝужалоз нылпи сад но.

— Нылпи сад пуктэм бере сюрес борды но басьтӥськыны чакласькомы, — шуиз Александр Бречалов.

Секыт югдур Ижысь Петров ульчаысь 49-тӥ юртын. Татын корка пырон ортчыны кулэ ни вал 2014-тӥ арын. 126 дольщикъёс мурт квартираосын уло, 2012-тӥ арысен кредит тыро. Туннэ корказы 30 процентлы быдэстэмын: 16 этаж интые вуттэмын 12-ез, со но каркасэз гинэ, борддоръёсыз ӝутэмын 7-8 этажозь, коммуникациос ӧвӧл. Застройщик воштэмын. Но югдурез капчиен бералтыны уг луы. Александр Бречалов пусъемъя, та лэчыт юанъёсты ӝоггес сэрттыны-пертчыны вырозы. Вылез застройщик Петров ульчаысь юртэз 2020-тӥ арын сентябре йылпумъяны оскытэ.

Лэсьтӥськонъя, ЖКХ-я но энергетикая министерствоез косэмын югдурез нуналлы быдэ чакланы но Тӧролы ивортыны.

Сергей Захаров

Ангелина Снигирева
By Ангелина Снигирева Август 8, 2019 15:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<