Адӟытонысь — нюлэскы

Ангелина Снигирева
By Ангелина Снигирева Август 14, 2019 14:41

Адӟытонысь — нюлэскы

Шаерысьтымы нюлэсъёсты эскерыса возьыны, тылпулэсь утьыны табере капчигес луоз — Россиысь Президентэн дэмлам «Инкуазез утён» национальной проект чотын элькунамы вуиз 37 пумо техника. Огъя дунзы 58,6 миллион манет.

Шаерамы нюлэсэз эскерыса возьыны, тылпуосын нюръяськыны юрттӥсь техника вуттэмын
Фото: udmurt.ru

ГАЗ, УАЗ, «Лада» автомобильёс, «Беларус» тракторъёс, гусеница вылын машинаос, автоцистерна — ваньзы чуренак пуктэмын. Нюлэсчиос соослы верантэм шумпотэмын. Угось техниказы вуж ни, берлозэ кӧня ке автомобиль но трактор басьтӥзы вал ог 7 ар талэсь азьло.

— Таӵе техникалэн вуэмез — быдэс элькунмы понна шумпотон, — вераз Удмуртилэн Тӧроез Александр Бречалов. — Угось сое огдыре нюлэсэн герӟаськем пӧртэм ужъёсы кутыны луоз. Ар пумозь «Инкуазез утён» нацпроект чотын ик эшшо ог 20 машинаос, тракторъёс вуыны кулэ на. Озьы та удысын техникалы кулэяськон огдырлы быроз.
Туала техника вужезлэсь трослы висъяське быгатонлыкъёсызъя. Кылсярысь, гусеничной МСН-10-ГТМ-003-07 машина туж иназ луоз тылпу кысыку но, солэсь бервылзэ утялтыку но — пограм писпуосты радэн-радэн тыроз, музъемез ӵошкатоз, выль уд мерттыны инты дасялоз. «Беларус» тракторъёс нюлэс дуръёсты гырыны яралозы, кор кыскалозы, тылпу потыку, ву нуллозы. Выль техника пӧлын вань нюлэсъёсты чакласа возьыны быгатӥсьёсыз но. Соос законэз тӥяса пӧйшурасьёсын, тэль корасьёсын нюръяськыны юрттозы.
Адӟытонэ поттэм техника туннэ ик шаерысьтымы ёросъёсы кошкыны дась ни. 27-эз — «Удмуртлес» хозяйстволэн филиалъёсаз, 10-эз — Инкуазь узырлыкъя но инкуазез утёнъя министерстволэн учреждениосаз. Лесничествоос куспын соосты люкылӥзы, отысь техникалэсь вужмемзэ лыдэ басьтыса. Озьы трактор-машинаос матысь дыре ужаны кутскозы Сьӧлта, Дэри, Сюмси, Вотка но мукет ёросъёсын.
Удмуртилэн Тӧроез нимысьтыз пусйиз «Удмуртлеслэсь» азинлыко тыршемзэ. Ог 2 ар талэсь азьло солэн тыронъёсыз 115 миллион манет пала люкаськемын вал. Хозяйстволы выль кивалтӥсь пуктэм бере югдур чутрак воштӥськыны кутскиз.

Уноез техника кошкиз ёросъёсысь нюлэс хозяйствоосы
Фото: udmurt.ru

— Кылем арын августэ ми вань тыриськонъёсмес пытсаны быгатӥм — шуиз «Удмуртлеслэн» выль кивалтӥсез Евгений Родичкин. — Ужаськом инвестициосты кыскон бордын. Россиысь техника басьтыны вуэм 58 миллион манет — ми понна туж бадӟым уксё. Но дасьсэ гинэ ум возьмаське, асьмеос но коьдон шедьтон бордын ужаськом. Кылсярысь, ар пумозь ас кисыысьтымы 30 миллион манет висъяны чакласьком на нюлэс дасяны кулэ луись техника басьтонлы.
Пусйыны кулэ: Удмуртиысь нюлэсчиос Приволжск федерал округын адӟем карымонъёсыз пӧлы пыро. Соос тол но, гужем но, уй но, нунал но ужын. Кылсярысь, шаерамы туж бадӟым саклык висъяське выль тэль мерттонлы — вань ёросъёсын радъяськыло пӧртэм акциос. Отчы пичиос но, бадӟымъёс но мыло-кыдо пырисько. Туэ тулыс 9,5 сюрс гектар вылэ пичи кызъёс но пужымъёс выжыятэмын. Сентябрьысен та уж нош ик азьлантьтӥськоз.
Жаляса верано, тылпу потон учыръёстэк уг луы на. Ар кутсконысен тэльёсын 19 пол горд атас сямзэ возьматъяз. Но лесникъёс, тылпу кысӥсьёс дыраз синйылтэмен но ӝог ужрадъёс кутыны быгатэмен, соос вӧлскыны ӧз быгатэ. 4,9 гектар муос арам луизы ик ке но. Уката секыт югдур вал май толэзе: кӧс турын ӝуаны кутскыса, тылпу выжылӥз нюлэсъёсы но. Талы ӵемысь янгыш адямиос: тылпу потонэз алонъя куронъёсты уг чаклало.

Элина Кумачёва

Ангелина Снигирева
By Ангелина Снигирева Август 14, 2019 14:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<