Шунды эктон

Ангелина Снигирева
By Ангелина Снигирева Июль 9, 2019 17:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Герберлэн йылпумъянэз «Шундэктон» позыръяськон луиз. Сое Эграысь этнопаркын егитъёслэн «Шунды» огазеяськонзы ортчытӥз. Эграос ужрадэз радъянын «шундыослы» бадӟым юрттэт сётӥзы.

Bobolenin рок-группа
Фото: басьтэмын «Нефтяник» культурая дворецлэн «ВКонтакте» бамысьтыз

— Тау «Нефтяник» лулчебертъя юртысь режиссёрлы Лариса Усковалы, — шуиз «Шунды» огазеяськонлэн тӧроез Алина Чернова. — Со вылэ туж трос сюлмаськонъёс усизы. Шумпотымон, бордамы Эграысь ӝужась кизилиос но итӥськизы шуыса.
«Шундэктон» 4 час ӵоже кыстӥськиз. Этнопарке пӧртэм аресъем калык люкаськиз: татын ик сцена азьын пичиос тэтчало, вӧзазы песянайёс сцена вылысь артистъёс шоры сак учко. Адӟиське вал, тросэз артистъёсмес нырысьсэ кыло шуыса.
Кылсярысь, кылем арын гинэ кылдэм «Bobolenin» рок-группа потэм бере калык чусомиз. Мар меда али луоз, пе. Пумен егитъёс интыосазы пукыса «эктыны» кутскизы, пумаз чидатэк султӥзы ини. 2 нылашъёс «шундыослэсь» юаллясько: «Нош кытысь та группа? Тӥ соосты тодӥськоды-а? Трос на-а кырӟанъёссы? Та пумыз ини? Малы сыӵе ичи?» Озьы рок кырӟасьёслэн Эграын выль кылзӥсьёссы кылдӥзы, йырзэс поромытӥллям музыкантъёс.
Валамон ини, нуисьёслэн «Али сцена вылын возьмаськомы Богдан Анфиногеновез» верамзы бере калык зол чабыны кутскиз. Тазэ тодо, ярато, иське. 2 пичи пиос, ваче пумит султыса, зэмос баттл ортчытӥзы, кин, пе, Богданлэн кырӟанъёсызъя устогес эктэ. Ульчаын пеймыт вал ке но, соос шундылэсь утись очкиосын тэтчало, Богдан сямен, позыръяськыны выро. Дотово мусоесь.

— «Шундэктонэ» ми пӧртэм кырӟасьёсты вайыны тыршимы, — вераз Алина Чернова, — возьматэммы потӥз удмурт кылын пӧртэм шӧмо крезьгур вань шуыса: поп, рок, рэп.
Алексей Пикулевлэн но Ольга Ипатовалэн ӵош кырӟамзы сюлме пыриз. Туала ӟуч но кунгожсьӧр кырӟасьёс пӧлын сыӵе ик яркыт адӟиськысалзы, дыр. Нош Ольга Ипатовалэн кырӟамез «Дисней» мультфильмъёсысь принцессаосты тодам вайытэ. Отысь саундтрекъёс сямен чузъясько кадь. Со сяна, ненег куараосынызы Евгения Аркова но Виталий Белков лэйкатӥзы.
Эгра егитъёс пӧлысь Style FM группа яраз, жаляса верано ӟуч, озьы ке но усто крезьгур быдэстэ. Motion Up эктон студизылэн номерез кӧня ке абдратӥз. Нылъёс пӧртэм, кырӟанъёсты огазеяса, пӧртэм шӧмо эктонъёс возьматӥзы. Но кыӵе ке огъя суред ӧз кылды.
«Шундэктонэ» кунгож сьӧрысь куноос но пыриськизы. Эстониысь группа ассэ «Куинь Р, яке 35 ар ортчыса» нима. Отын вань шудӥсьёслэн нимъёссы «Р» букваен кутско: Ромет, Райво но Рита. Группазы 35 ар талэсь азьло кылдэм ини. Сцена вылын пӧртэм крезьгур шудо: быдэс дуннелы тодмо кырӟанъёсты ас сяменызы быдэсто. Татын ик Abba группалэн гуръёсыз но, Америкаысь кантри крезьгур но. Оглом группа учкисьёслы капчи, гань-гань мылкыд кузьмаз, шуыны луоз.

— Группа Эстониысь лыктӥз бере, туж потэ вал эстон калыклэн лулчеберетэныз тодматскеммы, жаляса верано, группа сое возьматыны ӧз быгаты, — веразы куд-ог учкисьёс.
«Шунды» огазеяськонлэн эктон ӝытаз Эгра калыкез пӧртэм шӧмо крезьгурен, удмурт егитъёслэн туала улонэнызы тодматыны быгатӥз.

Мария Емельянова

Ангелина Снигирева
By Ангелина Снигирева Июль 9, 2019 17:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<