Чузъяськозы нимыз но крезьгурез

Ангелина Снигирева
By Ангелина Снигирева Июль 22, 2019 13:34

Туэ Удмуртиын Геннадий Корепанов-Камскиез (1929-2001) буре ваё. 18-тӥ августэ крезьгурчилы 90 арес тырмысал. Таин сэрен элькунамы трос бадӟым ужрадъёс ортчозы.

Г. Корепанов-Камский
Фото: «Удмурт дуннелэн» архивысьтыз

3 юртлы — пул

Геннадий Михайлович вордскиз Дэбес ёросысь Ягвуко гуртын. Со йылпумъяз Москваысь П. Чайковский нимо консерваториез но Казаньысь консерваториез. Пӧртэм жанръёсын ужаса, со крезьгураз удмурт культуралэсь аспӧртэмлыксэ котьку пыӵатылӥз. Кылсярысь, «Чипчирган» опера-балетсэ со кылдытӥз, удмурт мадёсъёсты, сям-йылолъёсты тодаз вайыса. Михаил Петровлэн «Вуж Мултан» романэзъя сыӵе ик нимын симфонической поэма но «Заговор» опера гожтӥз. Со сяна, Геннадий Михайлович нырысетӥ удмурт «Италмас» балетлэн авторез луэ.
Г. Корепанов-Камский усто кырӟась, ӟеч педагог но вал, со трос лэсьтӥз Удмуртиысь Крезьгурчиослэсь союззэс кылдытон понна, бӧрысь солэн кивалтӥсез вал. Тыршемез понна со пусъемын Калык эшъяськон орденэн, Трудовой Горд Знамя орденэн, Удмуртилэн дано гражданинэз луэ.
Г. Корепанов-Камскиез котьку тодазы возё Дэбес ёросын. Дэбесысь искусствоосъя школалы композиторлэсь нимзэ сётэмын. 2011-тӥ арын Тыловай черкогуртын Г. Корепанов-Камскийлэн музей-усадьбаез усьтэмын. Таяз арын дэбесъёслэн «Байгурезь» землячествозы Президентлэн грантъёсъя фондысьтыз юрттэт басьтӥз. Озьы Дэбес ёросысь Тыловай черкогуртын композиторлэн вордскем нуналаз бадӟым ужрад ортчоз: «Певец земли удмуртской» удмурт культуралы сӥзем фестиваль, творческой лаборатория.
Матысь дыре, Г. Корепанов-Камскийлы сӥзьыса, 3 юрт вылэ тодэ ваён пулъёс шуккемын луозы. Огзэ интыялозы Тыловай черкогуртысь культурая юрт вылэ, мукетыз Ижысь элькун музыкальной колледжлэн юртэз вылэ юнматэмын луоз — татын Г. Корепанов-Камский директор луыса ужаз 1971-тӥ-1976-тӥ аръёсы. Со сяна, тодэ ваён пул шуккыны дасясько Ижысь Пушкинской ульчаысь 182 номеро корка вылэ — татын композитор куке но улӥз. Али Иж городлэн администрациеныз но та юртысь улӥсьёсын верасько, мед соос пул шуккыны лэзёзы шуыса. Со сяна, дэбесъёс Ижкарлэн администрацияз гожтэт лэзизы, Ижысь одӥгезлы ульчалы Г. Корепанов-Камскийлэсь нимзэ сётыны курыса. Администрация оскытӥз: куронэз быдэстозы, али быръё, кыӵе ульча крезьгурчилэсь нимзэ нуллоз.

Крезьгурлы — партитура

Удмурт кун филармонилэн кивалтӥсез Алексей Фомин верамъя, Удмуртиысь 2 быдӟым композиторъёс — Герман Корепанов (солэн вордскемез дырысен туэ 95 ар тырме) но Геннадий Корепанов-Камский — шаерысьтымы удмурт профессиональной крезьгурез вылӥе ӝутӥзы. Жаляса верано, али соослэсь крезьгурзэс шер быдэсто. А. Фомин пусъе: тросэзлэн произведениоссылэн партитураоссы поттэмын ӧвӧл, соин йырин симфонической орекстр соосты шудыны уг быгаты. Югдурез тупатон вылысь али филармония Удмуртиысь Культурая министерствоен ӵош Г. Корепанов-Камскийлэн произведениосызлы нотной патритураос поттыны дасяське. Нотной партитураос луизы ке, Удмуртиын но, мукет фин-угор но, бускель улосъёсын но удмурт композиторъёслэн крезьгурзы ӵемгес чузъяськоз, оло.
Со сяна, Удмуртилэн кунлыкезлы 100 ар тырмонлы сӥзьыса, филармониын вуоно сезонын Удмуртиысь композиторъёслэсь — классикъёслэсь но туала музыкантъёслэсь — крезьгурзэс быдэстозы. Вань концертъёсты гожтыса кельтозы, бӧрысь устоосыныз произведениосын аудиодиск поттэмын луоз. Нялтас вераса, та дыре но Г. Корепанов-Камскийлэсь куд-ог произведениоссэ кылзыны луэ — соос люкамын Национальной электронной библиотекаын. Кылсярысь, отын вань «Удмуртия» телерадиокомпанилэн материалъёсыз.
18-тӥ октябре филармониын Г. Корепанов-Камскийлы сӥзем нунал ортчоз: композиторлэн улонэз, творчествоез сярысь научно-практической конференция радъяськоз, Национальной библиотека адӟытон дасялоз. Ужрад йылпумъяськоз бадӟым концертэн. Отчы пыриськозы Удмуртиысь Композиторъёслэн союззылэн ёзчиосыз, Удмуртиысь искусство удысысь дано ужасьёс, дэбес землячество, композиторлэн ӵыжы-выжыосыз.
Вуоно сезонын «Певец земли удмуртской» концертъёсын филармониысь коллективъёс поталозы Удмуртиысь ёросъёсы но. Озьы дано композиторлэн крезьгурез быдэс шаермы тыр нош ик чузъяськоз.

Анастасия Шумилова

Ангелина Снигирева
By Ангелина Снигирева Июль 22, 2019 13:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<