Ужлэн пайдаез — син азьын

Ангелина Снигирева
By Ангелина Снигирева Июль 18, 2019 15:25

Кылем арня пумын Удмуртиын ужазы Федерацияя Кенешлэн ёзчиосыз но Кун Думаысь депутатъёс. Соос чаклазы, кызьы быдэсмо «Огъя Россия» партилэн мытэм нацпроектъёсыз.

Подъёмникен машинаос шуг ветлӥсь адямиос понна чакламын
Фото: udmurt.ru

Калык сярысь сюлмаськыса

Удмуртиын 52 нацпроектъёс быдэсмо. Соосты улонэ пыӵатонлы туэ федерал бюджетысь вуоз ог 17 миллиард манет, эшшо 4 миллиард манет висъяськоз элькун кисыысь.
Сенаторъёс но депутатъёс нацпроектъёслэсь быдэсъяськемзэс 6 удысъя эскеризы: «Тазалыкез утён», «Демография», «Экология», «Дышетон», «Цифровой экономика», «Покчи но шоро-куспо ужбергатон».
Тани «Демография» нацпроектэз верано ке, со огазея нылпиосты но, ужась калыкез но, арлыдоосты но. Проектлэн валтӥсь ужпумез — улонлэсь ӟечлыксэ ӝутон.

— Мыным кельшиз Удмуртиысь Калыкез улон-вылонын утён политикая но ужъя министерстволэн ужзэ радъямез. Ведомстволэн сайтысьтыз шедьтыны луэ вань иворез: кыӵе адямиослы кун ласянь юрттэт чакламын, кӧня но кыӵе пособиос вань, — вераз Кун Думаысь комитетлэн кивалтӥсезлэн воштӥсез Ольга Окунева.
Мӧйыос сярысь сюлмаськыса, Удмуртие ӵапак та нуналъёсы вуизы 5 выль машинаос — соос чакламын арлыдоосты больницае нуыны-вайыны. Транспортын 8 интыез, отчы пуктыны нимысьтыз подъёмникъёс вань инвалид коляскаен ветлӥсьёслы но. Августэ эшшо 16 таӵе машинаос вуозы республикаямы, ваньмыз ик соос ёросъёсы кошкозы.
Ольга Окуневалы туж кельшиз реабилитацияя «Адели» центр. Татын сӧсыр нылпиос быгато эмъяськыны, соосын ӵош та центре анайёссы но лыкто.

Кивалтӥсьёс «Адели» центре вуылӥзы
Фото: udmurt.ru

— «Адели» центрын ужало туала эмъян тӥрлыкен. Сое уг луы басьтыны бюджет чотын висъяськись коньдонэн гинэ. Валамон, таӵе центрез возён но дуно усе. Озьы ке но республикалэн Тӧроез юрттэ возьыны та учреждениез, соглаш луэ, выль расходъёс кылдо ке. Со вала, мар понна та уж лэсьтӥське. Центрын эмъяськись нылпиослэн анайёссылэн тусъёссы ик возьмато: соос татын шудогес луо, — вераз депутат.
Нацпроектъёсты быдэсъянын пумисько шуг-секытъёс но. Кылсярысь, 100 сюрслэсь дуногес ужан тӥрлык басьтонэз радъяно госзакупкаос пыр. Мукет учыръёсы одно ик тендеръёс ортчытоно. Депутатъёс асьме республикаысь сюлмаськонъёсты но кылӥзы – та ужпумъя законодательствое воштонъёс пыртыны дасяно, шуизы.

Косэмез ӧз возьмалэ

Федерацияя Кенешысь сенаторъёс Татьяна Лебедева но Юрий Фёдоров (таиз луэ Удмуртилэсь сенатор) пыр-поч чаклазы, кызьы быдэсме тазалыкез утёнлы сӥзем проект. Со понна вуылӥзы Ижысь 8 номеро нылпи поликлиникае но 4 номеро больницае.
8 номеро нылпи поликлиника пыриське выль моделья ужась эмъян организациослы сӥзем «Шыръясь поликлиника» проектэ. Сое пыӵатонлы республикалэн бюджетысьтыз висъямын 4 миллион манет, эшшо 6 миллион вуиз федерал бюджетысь.
Та уксёез бадӟым коньдон уд шуы, но ужлэн пайдаез — син азьын, пусъё сенаторъёс. 8 номеро нылпи поликлиникае вазиськисьёс табере 2,5 поллы ичигес черодъёсын пуко. Со понна 2 поллы тросгес дырзэ висъяны быгатэ врач, нылпиосты пыр-почгес учкон понна. Эмъясь доры Интернет пыр гожтӥсько 97,5 процентэз пациентъёс. Соин ӵош ик поликлиникаысь специалистъёслэсь ужамзэс ӟечен дунъя 84 процентэз калык — тае тодон понна страхованиея компаниос нимысьтыз эскерон ортчытӥзы.

Ужзэс тазьы радъяны мед сюлмаськысалзы мукет больницаос но. Нимысьтыз пусъёно: «Шыръясь поликлиника» проектэ пыриськыны та нылпи учреждениез нокин ӧз косы, врачъёс ас мылкыдзыя отчы кыткиськизы. Соослэсь адӟем карыны быгатозы мукет больницаос но, — пусйиз Федерация Кенешысь социальной политикая комитетлэн ёзчиез Татьяна Лебедева.
Дырез шыръяны юрттӥсь технологиослэсь пыӵамзэс дунъяз Юрий Фёдоров но.

Реабилитацияя центр
Фото: udmurt.ru

— Милям группамы 30-лэсь трос улосъёсы вуылӥз ни. Быгатӥськом табере ӵошатыны. Мыным кык полэс шумпотымон, Удмуртиын югдур ӟеч луэ, усто поликлиникаосмы вань шуыса, — вераз Юрий Фёдоров.
Озьы Юрий Фёдоров ушъяз Ленин ёросын усьтӥськем 4 номеро больницалэсь поликлиниказэ. Та эмъян учрежденилэсь пуктӥськемзэ 7 ар возьмазы. Ужъёс мытэмын вал ни 2012-тӥ арын. Лэсьтӥськонлы коньдон тырмымтэен, ужъёс дугдытэмын вал. Соосты азинтыны луиз 2017-тӥ арын – Удмуртилэн Тӧроез Александр Бречалов сюлмаськемен, Россиысь Президентлэн резервной фондысьтыз 274 миллион манет висъяськиз. Со уксё чотын лэсьтӥськон быдэстэмын. Табере выль поликлиникалэн липет улаз огазеяськизы пӧртэм службаос — та дырозь соос пӧртэм интыосын вал. Озьы огазеям поликлиникаын вань нылкышноослы консультация, гинекология отделенилэн нуназе эмъяськыны чаклам стационарез, рентгенологияя служба, физиотерапия, лаборатория но мукетъёсыз.
Татын озьы ик ужало, дырзэс шыръяса. Озьы ке но поликлиникалэн сюлмаськонэз вань ик – уг тырмо эмъясьёс. Та шугъяськонэз вормон вылысь 4 номеро больница, целевой договоръёс гожтыса, вуоно специалистъёсты дышетскыны ыстэ Ижысь Медициная академие.

Палэнысен ӟечгес адске

Уката ӟеч мылкыдзы кылиз ужбергатон удысэз эскерись куноослэн. Кун Думалэн депутатэз Дмитрий Сазонов но «Опора России» огазеяськонлэн вице-президентэз Марина Блудян вуылӥз «Металлургический» промпарке. Та площадка кылдэмын Ижысь азьвыл Металлургической комбинатлэн интыяз. Промпаркын радъямын выль инфраструктура: вань электроподстанциез, газэз, аслаз котельноез, лэсьтэмын сюресъёс. Татын аслэсьтыз производствозэ радъяны быгатэ кутскись ужбергӥсь но.
Али промпаркын 14 компания ужа. Кылдытэмын 184 ужан интыос. 2023-тӥ арозь ужан площадьёс эшшо йылозы на. Татын эшшо 400 ужан интыос луозы.

— Таӵе тунсыко проектэз котькытысь уд шедьты. Мон 10-лэсь трос улосъёсы вуылӥ ни. Удмуртиын кылдытэм промпарк ваньмызлы адӟем карымон ужа. Тани промпарк компаниослы ужан инты гинэ уг висъя. Со сюлмаське заказ утчаны, кооперация радъя. Татын ваньмыз лыдъямын-чотамын, соин проект азинлыко, — шуиз «Опора России» огазеяськонлэн вице-президентэз Марина Блудян.
Промпарке вуыса, Москваысь делегация пыриськиз акселерацияя программаосын тодматсконэ. Али Удмуртиын 3 программа кылдытэмын: экспортэз, гурт удысэз но бизнесэз азинтонъя. Солэн огъя сюлмаськонэз — покчи но шоро-куспо ужбергатӥсьёсты будэтон, соос мед быгатозы шоро-куспо предприятиозь ӝутскыны, соку асьсэлэсь поттэм вуззэс кунгож сьӧры поттыны мед быгатозы.

Экспортъя акселераторын туж усто практика радъямын. Проектъёсты эскеро, быръё, сӥс пыр потто. Устоосызлы меӵак коньдон вуоз, лябъёсызлы – визь-нод, соос азьланяз эшшо акселераторе пыриськыны быгатозы на, пусйиз депутат Дмитрий Сазонов.
Элькун Правительстволэн Тӧроез Ярослав Семёнов тау кариз саклык висъямзылы:

— Милесьтым ужмес федерал кивалтӥсьёс ласянь дунъян — туж кулэ уж. Палэнысен ӟечгес адско умой палъёсыз но, ляб интыосмы но. Тӥляд верамъёсты азьланяз ужамы одно ик лыдэ басьтэмын луозы.
Эскеронэз радъясь группалэн кивалтӥсез, Кун Думаысь депутат Александр Авдеев пусйиз:

— Пӧртэм улосъёсын югдур пӧртэм сямен радъяське. Удмуртия – кужмо улос, со кутскем проектъёсты умой азинтэ, валтӥсь удысъёсты бырйыны быгатэ. Валамон, шуг-секытъёстэк уг луы. Демография удысэз чаклано ке, тӥляд выллем трос шугъяськонъёс кылдо мукет улосъёсын но. Соин огъя кылдӥсь ужпумъёсты федерал удысын сэрттыны-пертчыны кулэ. Югдурез воштон понна калыклэсь улон ӟечлыксэ, доходъёссэ ӝутоно, со понна азинтоно экономикаез.

Елена Скворцова

Ангелина Снигирева
By Ангелина Снигирева Июль 18, 2019 15:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<